1 Mga Adiꞌ 12 - Tagbanwa

Nabagiꞌ i kaꞌadiꞌan it Israel

¹ Ta it atkayti, isaꞌun kilalaen kanya it mga taga nurti nga mga Israelita, naꞌaduꞌun si Roboam it piyakamabantug nga lansangan nira nga Siquem. Sabap duꞌun it iting lansangan i piyagtingpedan it mga taga nurti ngayti nga kilalaen i pagkaꞌadiꞌ ni Roboam ngayti.

² Kat iting timpu nakaꞌuliꞌ na duꞌut Israel si Jeroboam ngayti nga anak ni Nabat garing duꞌun it Egipto, ka duꞌun i piyalagyuwan ya it pagkuꞌimatayen ngayti kanya ni Solomon. Pagkabaritaꞌ ya it si Roboam nay adiꞌ nga ganti it amaꞌ ya, yapay liꞌid ya duꞌun it Egipto.

³ Ta, it nakaꞌuliꞌ na kanya, ipiyapisiꞌ kanya it mga taga nurti ngayti, ka sang siraan i naꞌaduꞌun it adiꞌ ngayti nga si Roboam. Pagꞌabut nira maat nira,

⁴ “Talagang piyabeꞌgatan kami it amaꞌ mu nga si Solomon it ega basta-bastang kaꞌigpit kat pagsirbi namen it kanya. Ta kayti, pagꞌangutun namen nga, kat pagꞌadiꞌ mut imu, payaꞌnganen mu naga i kaꞌigpit ngayti nga ipiyapanaw it amaꞌ mu. Basta payaꞌnganen mu ga, talagang magayen i pasakep namen it imu.”

⁵ Pagkagneg ni Roboam, katubag kanya, “Pikiren ku daꞌan. Katlu kayti bawnga paꞌuliꞌ kamu, baw yan nga maꞌrutan mi in unuy tubag kut imyu.”

¹² Nagtaꞌlib i tulung aldaw namagpaꞌuliꞌ na Jeroboam baw mga kaꞌibaan ya ngayti, ka iti i ipiyagꞌaat it kanira it adiꞌ ngayti nga si Roboam nga ipaꞌuliꞌ nira.

¹³ Ta it lamang minsiꞌ si Roboam it paꞌiguꞌ-iguꞌ nga magayen duꞌun it mga magugurang nga yay itubag yat mga taw ngayti, ega naga iti i itiyubag ya, ka biyugrak-bugrakan ya ga sira.

¹⁴ Ka paꞌiguꞌ-iguꞌ it mga kaꞌebay-ebayan yay itiyubag yat kanira nga magꞌaat, “Maat mi, mabeꞌgat i ipiyapanaw ni Amaꞌ. Temed kayti, pabeꞌgatan ku paꞌ kamu nga banar. Ka in subuk piyaripdasan ya kamu it riripdas nga kulit it bakaꞌ i binwat, ta, aken nga iripdas it imyu, pagtatakinan nat matatarem.”

¹⁵ Talagang ega inintindi ni Roboam i pagꞌangutun it mga taw ngayti. Temed, pikir ya ngayti, pabetang-betang nagat AMPUꞌANG DIYUS isaꞌun matuman i ipiyagꞌaat it ki Jeroboam ngayti nga anak ni Nabat, iyan ipiyagꞌaat it prupitaꞌ nga si Ahias nga taga Silo, kat panakem it AMPUꞌANG DIYUS.

¹⁶ Pagkamuya it kadakel ngaytit taga nurti nga mga Israelita it atkayti gay itiyubag it kanira it adiꞌ, miyampang sira nga magꞌaat, “Bilaꞌ, in atkayan, awaꞌen tami na kat nakem tami si David ngayti nga anak ni Jesse baw mga kaꞌanakan ya ngaytu. Muliꞌ tami nay aten nga bangsa it Israel, pataꞌnan nga magꞌadiꞌ si Roboam ngayan kat sadili ya nga pamalay-balay.” Aypaꞌ miyuliꞌ na sira nga matuud.

¹⁷ Mga Israelita ngayti lamang nga magtataꞌid duꞌun it mga lansangan it Juda i naꞌped nga masakep it adiꞌ ngayti nga si Roboam.

²⁰ Ta, it atkayti na nga nakaꞌuliꞌ na si Jeroboam garing duꞌut Egipto, ipiyapisiꞌ kanya it mga taga nurti ngayti nga mga Israelita ka magꞌupa-upakaten. Pagkatiꞌmes nirang muꞌsa, ipiyaꞌdung nira na si Jeroboam nga magꞌadiꞌ it sang puluꞌ ngayti nga kuyunan nga mga tungtung-inapuꞌ it anak ni Israel. Kaduguꞌ-duguꞌan mana nga Juda i naneꞌteꞌ nga nagpasakep it kaꞌanakan ngayti ni David.

Nakapakursud ni Jeroboam kat ega basta-bastang kasalaꞌan i mga Israelita

²⁷ Ta, ega naꞌlay, napikir ni Jeroboam ngayti nga ega magayen in pasigi paꞌ nga magꞌadu-aduꞌun it Jerusalem i mga sinakepan ya, nga magbuwat duꞌut Templo it ipagsamba duꞌun it AMPUꞌANG DIYUS, uyun duꞌun it ipiyagꞌurdin it kanira it tagnaꞌ. Napikir ni Jeroboam, “Iyan nga buwat nira, magꞌindadangep talaga it magꞌuliꞌnan siꞌ nga pasakep sira it adiꞌ ngayti duꞌun it Juda nga si Roboam. Ta, baraꞌan ya kayan, imatayen nira aku.”

²⁸ Aypaꞌ ka, pagkapakirunding ya it mga katimbang ya, nagpatunaw kanya it bulawan nga buwaten nga ipasbung it uꞌuybun it bakaꞌ. Duway ipiyabwat ya. Bawnga maat ya it mga sinakepan ya, “Iyan ayaw kamu nat pasasaw it paJerusalem, ka waytu na, bangsa nga Israel, i mga ladawan it Ampuꞌang Diyus mi nga nagpaliꞌwan ngayan it imyu kat pagkaꞌuripen mi duꞌun it Egipto.”

²⁹ Duꞌun it Betel i piyatindegan ya it sangbat ngayti, iyan sangbat, duꞌun it Dan.

³⁰ Ta, iting bagay, nagbaraꞌ talaga nga ikiyakursud it mga Israelita, nga ipiyagkasalaꞌan nira. Ka buwat nira, mamagsamba duꞌun it sarungaan it mga binwat ngayti nga pagbete-beteꞌen. Iyan beken, maski duꞌut Dan ngayti nga alaid, magpaꞌaduꞌun ka sumamba.

³¹ Nagpatindeg si Jeroboam ngayti it mga papagsambaan duꞌun it kamumungsuꞌan, baw rimnumra paꞌ kanya it maski mga raꞌyat i duguꞌ nga magsasirduti, nga ega duꞌut mga kuyunang mga tungtung-inapuꞌ ni Levi i pinsiꞌan.

³² Bawnga ipiyapanaw yay esang pistaꞌ nga subung it pamistaꞌ it taga Juda. Temed ipiyagꞌurdin ya nga kalubukan it ikawalung bulan i ipagpistaꞌ duꞌut kanira ngayti. Baw nangaas kanya muwat it buwaten lamang it sasirduti, ka duꞌut Betel ngayti nagꞌimatay kanya it ramu-ramu nga ipagsamba duꞌun it mga binwat ya ngayti nga ipiyasbung it uꞌuybun it bakaꞌ. Duꞌun gasit Betel ngayti, kada binwat ya nga papagsambaan duꞌun it kamumungsuꞌan, dinistinuwan ya it esang sasirduti ngayti nga riyumraan ya nga manigsirbi duꞌun.