1 Juan 5 - Tagbanwa

Kaꞌilangan pamayaꞌnen i pamatuud nga Anak it Ampuꞌang Diyus si Jesu-Cristo

¹ In siyu-siyuy magpamayaꞌ nga si Jesus, kanya nay paꞌaateng Cristo ngayti nga Manriribring Adiꞌ nga isiyanggup, subung na kanyat ipiyanganak it Ampuꞌang Diyus. Baw yay matuud, in pagmaꞌalen ta kanya ngaytu nga bilang nanganak, simpri rarasan ta na i kumpur bilang ipiyanganak ya nga beken.

² Baw ituytu i ikasiguru ta nga pagrarasan tami i kumpur bilang ipiyanganak it Ampuꞌang Diyus, itu nga pagmaꞌalen tami i Ampuꞌang Diyus ngaytu baw pagsunudun tami i kumpur ipiyagꞌurdin ya.

³ Ituytu i paꞌaaten nga pagmaꞌal tat Ampuꞌang Diyus, masunud tami it mga urdin ya. Ka mga urdin ya ngaytu, ega nagaytu subraꞌ nga mabeꞌgat.

⁴ Sabap kada bilang ipiyanganak nat Ampuꞌang Diyus, magkaꞌindaꞌeg ya na i pagsakep it kanya it karaꞌe-raꞌetan situt banwa ngaytu. Magkaꞌindaꞌeg ta naytu kat keseg it pamayaꞌ baw pagsarig tat ki Jesu-Cristo.

⁵ Ta siyu may siyuytu i magkaꞌindaꞌeg it pagsakep ngaytut kanya it karaꞌe-raꞌetan situt banwa ngaytu? Sira lamang nga magpamayaꞌ nga si Jesus, egay beken, Anak talaga kanya it Ampuꞌang Diyus.

⁶ Si Jesu-Cristo ngaytu, kanyay limnampud situt denaꞌ. Biyawtis kanya duꞌun it danum. Ipiyaturuꞌ i duguꞌ ya kat kamataynen ya. Talagang ega lamang desang nagpabawtis kanya duꞌun it danum, in daꞌga ipiyaturuꞌ ya naga gasiꞌ i duguꞌ ya. Baw yay magpamatuud kaytu, Espiritu Santo, sabap purus kamatuudan i ipagpaliꞌwan it Espiritu Santo ngaytu.

⁷ Yay matuud, tulu talagay magpamatuud kaytu pasar it ki Jesu-Cristo, in siyu talaga kanya.

⁸ Tulu ngaytu, Espiritu Santo, danum baw duguꞌ. Baw nagꞌuyu-uyunun i tulu ngaytu.

⁹ In pagpamayaꞌnen tami i pamatuud it taw, subrang mapaꞌgen i pamatuud it Ampuꞌang Diyus, aypaꞌ simpri kaꞌilangan pamayaꞌnen tami. Baw iyan ngayan, talagang ipagpamatuud it Ampuꞌang Diyus nga Anak ya talaga si Jesu-Cristo.

¹⁰ Aypaꞌ siyu-siyuy magpamayaꞌ baw magsarig it Anak it Ampuꞌang Diyus, pagsisiguruun ya kat nake-nakem ya nga talagang matuud i pamatuud ngaytut Ampuꞌang Diyus. Temed iyan ega magpamayaꞌ it pamatuud ngaytut Ampuꞌang Diyus, egay beken, pagpakiꞌambutun yay Ampuꞌang Diyus ngaytu, ka ega pagpamayaꞌnen yay ipagpamatuud ya pasar it Anak ya.

¹¹ Ka ituytu i pamatuud ya ngaytu. Kaꞌgenan nga egay kaskedan i begay it Ampuꞌang Diyus it aten, baw maꞌaten tu sabap duꞌun it pamayaꞌ baw pagsarig tat Anak ya ngaytu.

¹² Iyan nga maglalagpit nat Anak it Ampuꞌang Diyus, iyan i may kaꞌgenan ngayan nga egay kaskedan. Temed iyan ega maglalagpit it Anak ngaytut Ampuꞌang Diyus, talagang daꞌgay kanya.

Pangiyaꞌpusang sugi-sugid ni Juan

¹³ Itung mga bagay, ipagsurat kuytu asat imyu nga mga magpamayaꞌ baw magsarig it Anak it Ampuꞌang Diyus, isaꞌun masiguru mi nga kamu, may kaꞌgenan na nga egay kaskedan.

¹⁴ Baw ega na kaꞌilangan magꞌaliꞌ-aliꞌ ta pat madap duꞌun it kanya ka pagsisiguruun ta nga, maski unuy angutun ta nga uyun kat kaꞌirgan ya, talagang sumambung kanya.

¹⁵ Ta it magkaꞌrutan ta na nga magsambung na kanyat aten, magkaꞌrutan ta na gasiꞌ nga ipagbegay ya nat aten i unu-unu nga pagꞌangutun ta ngaytu duꞌun it kanya.

¹⁶ Itu paꞌ gasiꞌ i ireg ku nga iꞌaat it imyu. In beteꞌ maltegan muy esang sulsug mu kat pamayaꞌ nga nakabwat it kasalaꞌan nga mapasinsiya nagat Ampuꞌang Diyus, kaꞌilangan ipanalangin mu kanya, isaꞌun ildawan kanyat Ampuꞌang Diyus nga makaꞌuliꞌnang kemseg i pamayaꞌ ya. Temed may kalasit kasalaꞌan nga ega na pasinsiyaen it Ampuꞌang Diyus, kasalaꞌan nga ikataban it magbuwat kaytu duꞌun it panriga nga egay kaskedan. Iyan magbuwat it itu ngaytung kasalaꞌan, ega maꞌaat ku nga mapanalanginan.

¹⁷ Yay matuud, kada mabwat ta nga kuntraꞌ it kaꞌirgan it Ampuꞌang Diyus, kasalaꞌan nayan. Temed magpuyrat iyan ngayang siyangpit ku, may kapasinsiyaan naga.

¹⁸ Talagang magkaꞌrutan ta na nga iyan mga bilang ipiyanganak nat Ampuꞌang Diyus, ega na maat magpasigi pat muwat it kasalaꞌan, sabap pagtatarimaen na sira ni Jesu-Cristo ngayting Anak it Ampuꞌang Diyus. Ega na mapakay nga sakpen siꞌ ni Satanas.

¹⁹ Magkaꞌrutan ta nga kita, mga anak nat Ampuꞌang Diyus. Temed si Satanas pay magsasakep situt sinirungat langit.

²⁰ Baw talagang magkaꞌrutan ta nga limnampud na situt aten i Anak it Ampuꞌang Diyus, baw binggayan ya na kita it ipagkasepsep, isaꞌun makilalaan tami nga banar i matuud nga Ampuꞌang Diyus. Kayti magpakiꞌuyun tami na it Ampuꞌang Diyus sabap maglalagpit ta nat Anak ya nga si Jesu-Cristo. Yay matuud, si Jesu-Cristo ngaytu, kanya talagay matuud nga Ampuꞌang Diyus nga puꞌun it kaꞌgenang egay kaskedan.

²¹ Mga bilang anak ku, magꞌintur kamu in unuy pagpamayaꞌnen baw pagsirbiyan mi. Siguruun mi nga egay maski unu nga iganti mi it matuud ngaytu nga Ampuꞌang Diyus.