1 Juan 4 - Tagbanwa

In magꞌuꞌunu ta masiguru in Espiritu Santo i magpanakem it esang taw it mga ampangen ya

¹ Mga pagmaꞌalen ku, ega basta-basta pamayaꞌnen mi i magꞌaat nga, “Ampang ku ngaytu, garing duꞌun it Espiritu Santo, ka ipiyanakem yat aken.” Kaꞌilangan niidan baw ineꞌteꞌen mi daꞌan, isaꞌun masiguru mi nga garing nga matuud duꞌun it Ampuꞌang Diyus i inampang ya ngayan. Sabap kayti, dakel nay mga magpapru-prupitaꞌ nga magpangadal nat katataawan situt sinirungat langit.

² Magꞌaꞌatkaytu yan i ikaꞌrut mi in talagang Espiritu Santo nga piyapasarum it Ampuꞌang Diyus i magpanakem it esang taw. Iyan nga magpamatuud nga si Jesu-Cristo, nagbalyu talaga nga taw nga banar baw limnampud situt banwa, siguradung Espiritu Santo it Ampuꞌang Diyus i magpanakem it kanya.

³ Temed iyan magpaliꞌwan nga ega nagbalyung taw nga banar si Jesus, siguradung ega yan Espiritu Santo it Ampuꞌang Diyus i magpanakem it ampangen ya. In daꞌga, yay matuud, panakem yan it kakuntraꞌ ngaytu ni Cristo, kanya nga ipiyagꞌaat ngayan it imyu nga mabut. Baw maski kayti, situ nat banwa ngaytu i atkaytung pakikuntraꞌ it ki Cristo.

⁴ Kamu, mga bilang anak ku, mga anak kamu na it Ampuꞌang Diyus. Baw nakaꞌindaꞌeg kamu nat mga maꞌambut ngayang magpapru-prupitaꞌ. Naꞌindaꞌeg mi na sabap subraꞌ pang gunaan i Espiritu Santo nga magsasarum asat bilug mi, subraꞌ pat maraꞌe-raꞌet ngayting si Satanas nga magpanakem it mga taw nga ega nagpasakep it Ampuꞌang Diyus.

⁵ Sira ngaytu nga mga magpapru-prupitaꞌ, kaꞌibaan tu sira it mga ega magpamayat ki Jesu-Cristo, aypaꞌ mga ampang nira, uyun nagat mga adat it mga ega magpamayaꞌ ngayti. Ta, mga kasubung nirang ega magpamayaꞌ, iyan i magpagneg it kanira.

⁶ Temed kita, sakep ta nat Ampuꞌang Diyus. Baw in siyuy magkilala it Ampuꞌang Diyus, iyan i magpagneg it aten. Iyan ega sakep it Ampuꞌang Diyus, ega magpagneg kanyat aten. Sikayan ta maꞌrutan i kamatuudang ampang nga garing duꞌun it Espiritu Santo baw kaꞌambutang ampang nga garing duꞌun it ki Satanas.

Ampuꞌang Diyus i puꞌun it kararas

⁷ Mga pagmaꞌalen ku, siguruun ta nga magsigraras tami it esa may esa, sabap Ampuꞌang Diyus, kanyay puꞌun it kararas ngaytu. Ta kada may raras na ngaytu, maꞌyag nga bilang ipiyanganak na kanya it Ampuꞌang Diyus baw kilalang-kilala ya na kanya.

⁸ Temed iyan ega pay raras ngaytu, ega payan magkilala it Ampuꞌang Diyus, sabap Ampuꞌang Diyus talagay puꞌun it raras ngaytu.

⁹ Eeꞌ baꞌ, talagang ipiyalteg nat Ampuꞌang Diyus i kadakulat raras yat aten, iyan ipiyalampud ya na ngayan situt denaꞌ i Anak yang paeꞌesa-esa nga egay kasbung, nga tumanggung it kasalaꞌan ta, isaꞌun mabgayan ya kita it kaꞌgenan nga egay kaskedan.

¹⁰ Itu naytuy matuud nga pagmaꞌal, ega maat aten nga pagmaꞌal it Ampuꞌang Diyus, in daꞌga kanya ngaytung pagmaꞌal nga may raras it aten. Ka piyapaꞌasitu yat aten i Anak ya nga buwaten nga panalisi, isaꞌun mapasinsiya it aten i mga kasalaꞌan tami.

¹¹ Mga pagmaꞌalen ku, ta it atkaytuy kadakulat raras it Ampuꞌang Diyus it aten, kaꞌilangan magsigraras tami gasiꞌ i aten.

¹² Garing it tagnaꞌ paꞌ, egay nakalteg it Ampuꞌang Diyus. Temed in talagang may raras ta nat esa may esa, maꞌyag nga magsasarum na talaga situt aten i Ampuꞌang Diyus ngaytu, baw kiyumplitu ya na i raras ta ngaytu.

¹³ Baw magkaꞌrutan tami nga magpaneꞌteꞌ ta na duꞌun it Ampuꞌang Diyus, baw kanya, teꞌteꞌ gasiꞌ situt aten, sabap pirmi ta nga pagtabangen it Espiritu Santo nga piyapasarum ya situt bilug tami.

¹⁴ Baw kami ngaytu, talagang naltegan namen i Anak it Ampuꞌang Diyus, baw ipagpamatuud nga tiyaꞌeg it Diyus Amaꞌ i Anak ya ngaytu, nga kanyay Manriribri it muꞌsang taw situt sinirungat langit.

¹⁵ Ta kayti, in siyuy magpamatuud nga si Jesus, Anak kanya it Ampuꞌang Diyus, talagang pagteꞌteꞌan kanya it Ampuꞌang Diyus baw kanya, teꞌteꞌ na gasiꞌ duꞌun it Ampuꞌang Diyus ngaytu.

¹⁶ Magkaꞌrutan ta na talaga baw pagpamayaꞌnen ta nga kita, pagrarasan nga banar it Ampuꞌang Diyus. Ampuꞌang Diyus talagay puꞌun it kararas. Ta kanya nga magpaneꞌteꞌ kat raras yat masigkataw ya, pagteꞌteꞌan ya gasiꞌ i Ampuꞌang Diyus, baw Ampuꞌang Diyus, magpaneꞌteꞌ naga duꞌun it kanya.

¹⁷ Sikayan magkatantuwan ta na nga nakumplitu na i kararas ta ngaytu. Aypaꞌ ka ega na pagꞌiꞌlaman tami i aldaw ngayan nga ipangukuman. Sabap unu pay maiꞌlaman it magpasbung ta nat ki Jesu-Cristo situt banwa ngaytu?

¹⁸ Ka basta kamatuudan i pagmaꞌal tat Ampuꞌang Diyus baw kararas tat masigkataw ta, ega nay iꞌlam tamit panriga. Sabap iyan ustuꞌ nga pagmaꞌal, subuk magkataburan yay iꞌlam ngaytu. Ka iyan talagay pagꞌiꞌlaman it mga taw, rigaen. Aypaꞌ in magꞌiꞌlam ta pat rigaen, maꞌyag nga kurang pay pagmaꞌal baw kararas ta.

¹⁹ Yay matuud, may pagmaꞌal baw kararas tami nay aten sabap it pagmaꞌalen baw pagrarasan ta nga lagi it Ampuꞌang Diyus.

²⁰ In beteꞌ may magꞌaat nga, “Pagmaꞌalen ku nay Ampuꞌang Diyus,” temed in may sulsug ya paꞌ kat pamayaꞌ nga pagpakitabugan ya, ambut ya lamang i pagmaꞌal ya ngayan. Ka in ega pay raras yat kaꞌibaan ya nga lelete-letegan ya nat kaꞌlay, magꞌuꞌunu maꞌalen yay Ampuꞌang Diyus nga ega magkaltegan ya?

²¹ Ka yay ipiyagꞌurdin ya ngaytu it aten, nga in siyuy magmaꞌal it Ampuꞌang Diyus, dapat nga rarasan ya gasiꞌ i sulsug ya kat pamayaꞌ.