1 Corinto 9 - Tagbanwa

Maski unu nga pudir ta, yay ipadaꞌeg kat nakem, ikagayen it beken

¹ Talagang may pudir ku nga muwat u ega muwat it in unuy ireg ku, basta ega kasalaꞌan. Baw talagang kamatuudan aku nga apustul. Talagang naltegan naga it duwa nga mata ku si Jesus nga Ampuꞌan tami. Baw daꞌga baꞌ, kamu ngaytu, bilang buwaꞌ it pagsirbi kut kanya kat pagkaꞌapustul ku?

² Maski ega pagkilalaen it beken i pagkaꞌapustul ku temed kamu siguru, pagkilalaen mit imyu. Ka pamayaꞌ mi ngaytu it Ampuꞌan i magpamatuud it pagkaꞌapustul ku.

³ Ta, itu nay tubag ku kat mga magpakiꞌambut it pagkaꞌapustul ku asan.

⁴ Panawun it pikir mi i katengdanan namen. Daꞌga baꞌ may pudir namen nga gastuꞌan it mga pagtulduꞌan namen kat mga pagkaꞌilanganen namen nga subuk mga pagkaꞌnen baw pagꞌimnun?

⁵ In ipagpanlekep namen i Magayeng Baritaꞌ, daꞌga baꞌ may pudir namen nga pabayaꞌ it asawa, basta subung nga magpamayaꞌ, nga subung it ki Pedro, iyan beken nga mga apustul, baw iyan mga sulsug it Ampuꞌan?

⁶ Maski magpanulus i adat namen ni Bernabe in magpangadal kami, ega pikiren mi nga egay pudir namen nga medek it panulus isaꞌun kasarunga it katengdanan namen.

⁷ Ka siyung sundaluꞌ i magsirbi kat sadili yang gastuꞌ? Siyung tagluwak i ega makapakinabang it buwaꞌ it diniyu-diyu yang luwak? Siyuy manigꞌeper it tupa nga ega makapakinabang it gatas it pagꞌeperan ya? Simpri ega.

⁸ Pagsugiden ku ngaytu, ega lamang kat pagbuwaten it taw i pagpisiꞌan. Iyan naga i pagsugiden it mga urdin.

⁹ Ka magꞌaat duꞌun it mga urdin nga ipiyasurat it Ampuꞌang Diyus it ki Moises, “Ega bangkurungan muy baꞌbaꞌ it bakaꞌ nga pagpagiꞌken mu mintras pagtaꞌad-taꞌadan yay ipagpagiꞌek ngaytu.” Unu baꞌ, ipiyasurat it Ampuꞌang Diyus i atkaytu sabap subray raras yat mga bakaꞌ?

¹⁰ Ega, in daꞌga ipiyasurat ya kat ikagayen tami gasiꞌ nga taw. Ka alimbawa, taw nga magꞌaradu baw taw nga maggiꞌek in timpu na, mapakay talaga nga siguruun nira nga bagiꞌan sira it kaygen nga bilang tumbas it karigaan nira.

¹¹ Ta, kami ngaytu, subuk liminwak kami asat imyu it ega basta-bastang biꞌni nga yay timnaban it imyu it magsarig baw magpamayaꞌ kamu na it ki Cristo. Aypaꞌ daꞌga baꞌ mapakay na nga bagiꞌan kami it bilang kaygen it karigaan namen ngayan nga gastuꞌan kami lamang kat mga pagkaꞌilanganen namen it aldaw-aldaw?

¹² Ka subuk pagpakinabangan it beken nga mga manigpangadal asan i pudir nira nga pagastuꞌ it imyu it atkaytu. Daꞌga baꞌ subraꞌ kami paꞌ? Temed iyan asan kami it imyu magpangadal, ega giyamit namen i pudir namen. Talagang ega ireg namen nga bilang palsaan namen i Magayen ngaytung Baritaꞌ pasar it ki Cristo nga ipagpangadal namen. Aypaꞌ talagang pagsagkaꞌen namen lamang i kakuriꞌan namen ngaytu nga magpanulus it sadili.

¹³ Unu, ega magkaꞌrutan mi nga iyan mga manigsirbi duꞌun it Templo it mga Judio, mamagtanggap it pangaꞌen nira nga garing duꞌun it Templo? Ka iyan baꞌ, mga manigsirbi duꞌun it papangantengan, may kabagiꞌan nira it mga salisi nga ipagsamba duꞌun it papangantengan ngayti.

¹⁴ Atkayan naga nga pabetang-betang, ipiyagꞌurdin it Ampuꞌan nga iyan mga manigpangadal it Magayeng Baritaꞌ, dapat talaga nga ikaꞌgen nira i Magayen ngaytung Baritaꞌ.

¹⁵ Temed maski may pudir ku, seked kayti, ega talaga magꞌangut akut tabang it mga pagtulduꞌan ku. Baw ega maat pagsuratan ku kamu kayti isaꞌun begayan mi lamang aku it tabang mi. Ka ire-ireg ku pay puyangten aku lamang, ega gat mapalsaan i ipagpadayaw ku nga pagbuwaten it Ampuꞌang Diyus kat pagpangadal it Magayeng Baritaꞌ.

¹⁶ Ega ireg ku nga sugiden nga pangadal ku ngaytut Magayeng Baritaꞌ i ipagkadayaw it aken, ka yay katengdanan nga ipiyagrumra it aken. Talagang ega magkapakay it nakem ku baw ukuman it Ampuꞌang Diyus i pagꞌangutun ku in ega mangadal aku.

¹⁷ In beteꞌ pagbuwaten kuytu kat sadili ku nga kaꞌirgan, mapakay nga paꞌbutun kuy tabang it mga pagtulduꞌan ku kat mga pagkaꞌilanganen ku, nga bilang tumbas it paꞌres ku. Temed it Ampuꞌang Diyus i garing it katengdanan ku ngaytu, pagsarungaen ku lamang i ipiyakarguꞌ yat aken.

¹⁸ Ta, it atkayan, unuy tumbas it aken? Itu na, kasasagyaan it nakem ku nga ipagpangadal kuy Magayen ngaytung Baritaꞌ it daꞌku magpagastuꞌ, isaꞌun ega masubraꞌan kuy pudir ku ngaytu nga pagastuꞌun ku i mga pagtulduꞌan ku.

¹⁹ Talagang daꞌku uripen it maski siyung taw. Temed kayti subuk nagpaꞌuripen aku it masigkataw ku isaꞌun, kat tabang ku, subrang dakel i sumarig baw mamayaꞌ it ki Cristo.

²⁰ Ka in duꞌun akut mga Judio, adat ku, adat it mga Judio isaꞌun makabig ku sira. Maski maat daꞌku na pagsasakpen it mga urdin ni Moises, pagpaꞌuyunan ku naga mintras kaꞌibaan ku sira nga magpasakep paꞌ it mga urdin ngaytu, isaꞌun, subung nat inaat ku, makabig ku sira.

²¹ Ta in duꞌun sit mga taw nga ega Judio nga ega pagsasakpan it mga urdin ngaytu nga ipiyaskel it Ampuꞌang Diyus it ki Moises, subung aku gasiꞌ it ega Judio, nga ega pagsasakpan it urdin, isaꞌun makabig ku gasiꞌ sira. Egaytu maat nangangaꞌulugan nga ega pagꞌintindiyen ku i mga urdin it Ampuꞌang Diyus, sabap pagsunudun ku talaga i muꞌsang ipiyagꞌurdin ni Cristo.

²² Ta in iyan siꞌ i pagtulduꞌan ku, mga malulubay paꞌ nga pamayaꞌ, nga dakel pay pagliꞌyan nira, pagpaꞌuyunan ku sira isaꞌun mapakseg ku i pamayaꞌ nira. Basta ega kuntraꞌ kat inaat it Ampuꞌan talagang pagpaꞌuyunan ku i muꞌsang taw kat in unu nga buwat isaꞌun, sana, may makaparibri ku kat panriga it kasalaꞌan nira.

²³ Pagbuwaten kuy muꞌsa ngaytu isaꞌun subrang dakel i kaꞌibaan ku nga magpamayaꞌ it Magayeng Baritaꞌ nga mabagiꞌan it kagayenan nga maggaring sikaytu.

²⁴ In ipasubung tat kuntis i pagsunud tat Ampuꞌan, daꞌga baꞌ magkaꞌrutan mi nga iyan mga uyut it malagyu, mamagpalagyu nga muꞌsa, temed simpri iyan mandaꞌeg lamang i katanggap it pirimyuꞌ? Aypaꞌ gayen-gayenen mi nga palagyu isaꞌun mapirimyuꞌan kamu gasiꞌ i imyu.

²⁵ Atkayan naga, iyan mga manigkuntis, ereꞌeret i pangigpit nirat sadili nira kat muꞌsa nga mga bagay isaꞌun mandaꞌeg sira. Temed iyan pirimyuꞌ nga matanggap nira, linikaw nga dikut lamang nga ega maꞌlay manluyus. Temed pirimyuꞌ tat aten nga pagsisiguruun tami, egay katupusan ya. Aypaꞌ ega gasiꞌ kalabtaꞌen tami i aten nga pagsirbi it Ampuꞌan, in daꞌga paꞌresan.

²⁶ Yanagay buwat kut aken nga pagpaꞌresan kuy aken nga pagsirbi. Subung akut manigpalagyu nga makseg baw diritsu i palagyu ku duꞌun it siguradu nga pagꞌabutun. Kabilangan ku gasiꞌ, subuk manigsuntuk nga magkaꞌiguꞌ yang pirmi i kalaban ya, ega maat magsuntuk lamang it lawang.

²⁷ Talagang pagsagkaꞌen ku i maski unu nga kakuriꞌan it bilug ku baw talagang pagbegbegan kuy sadili ku. Ka barang pagkapangadal ku duꞌun it beken in magꞌuꞌunu makaniray pirimyuꞌ, aku siꞌ i ega mabgayan.