1 Corinto 7 - Tagbanwa

Panulduꞌ pasar it pagꞌasawa

¹ Ta, itu nay mga ipagtubag ku it mga isiyurat mi nga ingkut. Maat mi, maski nagꞌasawa subuk magayen in ega riꞌnge-riꞌngen it lalaki i bilug it babay.

² Temed in yay magkataban it mga lalaki duꞌun it pamakun duꞌut ega asawa nira, kaꞌilangan, kada nagꞌasawa, babay, lalaki, pagsagyaan yay kanya-kanyang asawa.

³ Bawnga, in pasar it adat it nagꞌasawa, kaꞌilangan mapiyabayaꞌ-bayaꞌ i lalaki it asawa ya, atkayan naga i babay.

⁴ Sabap, kat mga nagꞌasawa, ega maat babay i may pudir kat sadili yang bilug, in daꞌga asawa ya. Atkayan naga i lalaki. Ega gasiꞌ i pudir ya kat sadili yang bilug in daꞌga iyan asawa ya.

⁵ Ayaw kamut daꞌga it asawa mi, magpuyrat piyagꞌupakatan mi nga daꞌkamu daꞌan magꞌulid it pirang aldaw isaꞌun kasarunga it magayen it panalangin. Ta in matupus mi na i timpu nga piyagꞌupakatan mi, kaꞌilangan magꞌulid kamu siꞌ. Atkaytuy magayen isaꞌun daꞌkamu marayak ni Satanas nga sumalya kat taw nga ega asawa mu, in beteꞌ ega magkapuꞌgunan mi i sadili mi.

⁶ Temed maski itu ngaytu pasar it pandaꞌga it asawa it ega maꞌlay, egaytu maat urdin kut imyu, temed mapakay naga in yay pikir mi nga magayeng buwaten.

⁷ Sana, ireg ku, pasbung kamung muꞌsa it aken nga ega kaꞌilangan nga may asawa. Temed egaytu muꞌsa i inildawan it Ampuꞌang Diyus it itung kakayaan. May kanya-kanyang pagtanggapen nga ildaw nga garing duꞌut kanya. Ega siyurubung i muꞌsa.

⁸ Ta, ituy iꞌaat ku it mga balu, babay, lalaki. In beteꞌ mabwat nira, magayen in maneꞌteꞌ sira nga egay aꞌasawa, subung nagat aken.

⁹ Temed in ega magkasupil nira i sadili nira, magayen mangasawa u paꞌasawa siꞌ sira. Ka magayen pay atkayan, ega gat magrambang mata.

¹⁰ Ta, kamung magpamayaꞌ nga nagꞌasawa, itu i ipagꞌaat ku, baw ega lamang aku in daꞌga Ampuꞌan i nagꞌurdin kaytu. Ega mapakay nga pablag i babay it asawa ya.

¹¹ Takaꞌ in pablag kanya, kaꞌilangan nga maneꞌteꞌ na i uꞌumbay ya. In ega magayen yay maneꞌteꞌ nay uꞌumbay ya, kaꞌilangan, muliꞌ naga duꞌun it asawa ya. Baw urdin gasiꞌ kat mga lalaki, ega pablagan mi i asawa mi.

¹² May ipagꞌaat ku gasiꞌ kat mga beken. Ituꞌun ngaytu, ega Ampuꞌan i nagꞌaat, esa-esang aku na. Kayti, in beteꞌ esang lalaki nga magpamayaꞌ, magꞌaꞌasawa it ega magpamayaꞌ, takaꞌ ireg nat ega ngayti magpamayaꞌ nga magteꞌteꞌ sira, magayen ega na pablagan ya.

¹³ Ta, atkayan naga, in esang babay nga magpamayaꞌ, pagꞌaꞌasawaen it ega magpamayaꞌ, takaꞌ ireg nat lalaki nga magteꞌteꞌ i pagꞌasawa nira, ega na pablagan it babay.

¹⁴ Sabap paribasay namayaꞌ nay asawa ya, maski ega paꞌ magpamayaꞌ i lalaki ngayan, ipagpapinpin na kanya it Ampuꞌang Diyus kat beken nga taw nga ega paꞌ magpamayaꞌ i asawa. Ta atkayan naga in beteꞌ babay i ega paꞌ magpamayaꞌ, temed namayaꞌ na i lalaki nga asawa ya. Ka in ega atkayan i pabetang it Ampuꞌang Diyus it mga taw nga may asawa nga namayaꞌ na, simpri ega gasiꞌ atkayan i pabetang ya it mga anak nira. Temed yay matuud, pati mga anak nira, ipagpapinpin gasiꞌ it Ampuꞌang Diyus kat beken nga mangaꞌwaꞌ nga ega magpamayaꞌ i giyaringan nira.

¹⁵ Takaꞌ in beteꞌ kupablag it asawa ya i ega ngaytu magpamayaꞌ, paꞌuyunan mi na lamang nga pablag kanya. Ega na kaꞌilangan nga daꞌgaen. Temed dedemdemen mi nga yay pabetang-betang it Ampuꞌang Diyus it aten, maꞌimbeng nga pangaꞌgenan.

¹⁶ Ka in ega maranggaꞌ i pagꞌasawa, paribasay magpamayaꞌ i asawa ya, barang yay tumaban it ega paꞌ ngaytu namayaꞌ it mamayaꞌ na isaꞌun maribri.

Teꞌteꞌan ta lamang it masagyay nakem i kabetangan nga ipiyabetang-betang it Ampuꞌang Diyus it aten

¹⁷ Iyan bay magayen, in unuy ipiyabetang-betang it Ampuꞌang Diyus nga kabetangan it kada esa pagpanakem yat aten nga sumarig baw mamayaꞌ it ki Cristo, kat kabetangan ngayan, tumanen tami i ipiyabetang-betang ya it aten. Ituytu i ipagpanulduꞌ kut muꞌsa nga mga magpamayaꞌ.

¹⁸ In beteꞌ naturiꞌan na nga uyun kat urdin ni Moises i esang taw parabir piyanakman kanya nga mamayaꞌ it ki Cristo, ega na maat awaꞌen ya paꞌ i mga tandaꞌanan nga kanya, naturiꞌan na. U in beteꞌ, taw nga ega naturiꞌan ka ega sakep it iyang urdin, maski ega na paturiꞌ kanya.

¹⁹ Ka yay matuud, ega naga impurtantiꞌ in naturiꞌan kanya u ega. In daꞌga iyan talagay impurtantiꞌ, pagsunud it muꞌsang ipagpasunud it Ampuꞌang Diyus nga kaꞌirgan ya.

²⁰ Aypaꞌ, magayen in teꞌteꞌan it kada esa i kabetangan ya, iyan piyanakman kanya it Ampuꞌang Diyus nga pasakep it kanya.

²¹ In beteꞌ uripen ka iyan piyanakman ka na it Ampuꞌang Diyus, ega maat sasawun mu i pikir mu. Temed in beteꞌ begayan ka nat rugar nga maribri ka kat pagkaꞌuripen, simpri ega na palipasen mu.

²² Ka maski uripen ka, basta namayaꞌ kang matuud it ki Cristo, kat Ampuꞌan ka na nga binggayan ya nat ega basta-bastang karibriyan. Baw iyan taw nga ega uripen iyan piyanakman na kanya it Ampuꞌang Diyus, subuk nagbaraꞌ kanya nga uripen, ka manigsirbi na ni Cristo.

²³ Talagang kat ega basta-bastang kantidad subuk inalang kamu it Ampuꞌang Diyus isaꞌun mga taawan ya na. Aypaꞌ, kaꞌilangan, daꞌkamu na paꞌuripen it masigkataw mi in daꞌga kat Ampuꞌang Diyus na lamang.

²⁴ Mga sulsug ku kat pamayaꞌ, in unuy kabetangan mi it iyan piyanakman kamu it Ampuꞌang Diyus nga pasakep it kanya, teꞌteꞌan mi lamang nga pagsunudun i padisir ya.

May kagayenan it ega magꞌaꞌasawa temed ega naga kasalaꞌan in magꞌaꞌasawa

²⁵ Ta, sabap gasiꞌ it mga egay aꞌasawa, egay makabgay ku nga urdin nga garing duꞌun it Ampuꞌan. Temed ipaliꞌwan ku i in unuy kat pikir ku. Siguru ega naga yan kamaliꞌ i ipagsugid ku ngaytu sabap inildawan aku it Ampuꞌan it magayeng kasepsep.

²⁶ Ka sabap it subraꞌ na ngaytung kakuriꞌan, kayti pagpikiren ku nga magayen in maneꞌteꞌ i lalaki it in unuy kabetangan ya.

²⁷ In beteꞌ may upakat mu na nga babay, ega na maat kaꞌilangan pasurut ka. U in beteꞌ egay upakat mu, ega na beteꞌ tumulus ka it babay nga asawaen mu.

²⁸ Takaꞌ in mangasawa ka, ega maat nagkasalaꞌan ka. Atkayan naga i babay nga upakat mu, in paꞌasawa kanyat imu ega naga kasalaꞌan ya. Temed subraꞌ pay mga kakuriꞌan baw pagregnan kat pangaꞌgenan it mga magꞌaꞌasawa. In maat beteꞌ ega magꞌaꞌasawa kamu, ega dumungag i mga pagregnan baw kakuriꞌan kat pangaꞌgenan mi.

²⁹ Ituy ireg ku nga sugiden, mga sulsug ku kat pamayaꞌ. Piyaꞌababaꞌ nay timpu nga magkasirbi ta it Ampuꞌang Diyus. Aypaꞌ ka, garing kayti, iyan may asawa, sana ega naga buwaten ya nga baer nga yay ega ikasarunga yat magayen it pagsirbi ya it Ampuꞌan.

³⁰ Atkayan naga, ega naga ikabaer kat pagsirbi mi it Ampuꞌan i kasmek, kasagyaan u pagngatanan.

³¹ Simpri, mga bagay situt banwa ngaytu, mapakinabangan ta. Temed, kaꞌilangan, ega naga yay labiyen tami. Ka mabut i aldaw nga maꞌiriꞌ i banwa ngaytu baw muꞌsang betang ya.

³² Ta, ireg ku baꞌ, alaid it imyu i magkalibegan it pikir kat pangaꞌgenan. Iyan umbay nga lalaki, paribasa it egay asawa ya, magkasarunga ya it magayen i kaꞌirgan it Ampuꞌan, isaꞌun sagyaan it Ampuꞌan i pangaꞌgenan ya.

³³ Temed iyan lalaki nga magꞌaꞌasawa na, mga bagay gasiꞌ situt banwa i kaꞌilangan ya nga sarungaen, in magꞌuꞌunu mapasagya ya i asawa ya.

³⁴ Aypaꞌ pagbabagiꞌen i paꞌres ya. Atkayan naga i babay nga ega nay asawa baw mga umba-umbay paꞌ. Magkasarunga ya i kaꞌirgan it Ampuꞌan, isaꞌun mapasiguru ya i sadili, kat bilug baw kat nakem, nga kat Ampuꞌan talaga. Temed babay nga magꞌaꞌasawa na, mga bagay gasiꞌ situt banwa i kaꞌilangan ya nga sarungaen, in magꞌuꞌunu mapasagya ya i asawa ya.

³⁵ Ireg ku sana nga mga naꞌampang ku ngaytu, kat ikagayen mi, ega maat kat ikagipit mi. Ka iyan talagay ireg ku, matabangan ku kamu nga muwat it in unuy bagay it imyu kat panleteg it Ampuꞌan, isaꞌun, magꞌaꞌasawa it daꞌga, makapagsirbi kamu nga banar duꞌun it kanya it egay magkalibegan it pikiran mi.

³⁶ Temed in beteꞌ may lalaki nga may upakat na duꞌut esang babay, temed pagpikiren ya nga barang kasalaꞌan ya in ipatabus yay upakat nira, magayen in ipatabus ya naga, maꞌget in makuriꞌ nga supilen yay sadili ya. Ega naga kasalaꞌan ya in magꞌasawa na sira.

³⁷ Temed in yay kat nakem it lalaki, ega na asawaen ya i babay ngayti nga inupakat ya, ka maneꞌteꞌ it uꞌumbay ya, magayen gasiꞌ. Basta nasiguru ya nga banar kat nakem ya nga yay magayeng buwaten ya, nga ega magkaregesan lamang, baw inildawan kanya it kakayaan nga supilen i sadili ya.

³⁸ Aypaꞌ, mangasawa it daꞌga, magayen naga. Temed subraꞌ nga magayen in ega na asawaen ya.

³⁹ Iyan babay nga may asawa na, ega mauꞌbadan kanya mintras egen pay asawa ya ngayti. Takaꞌ in natay nay asawa ya, subuk nauꞌbadan na. Mapakay na nga paꞌasawa siꞌ it maski siyuy ireg ya, basta gasiꞌ magpamayaꞌ it Ampuꞌan i paꞌasawaen ya.

⁴⁰ Temed, kat pikir ku, subraꞌ kanya nga masagya in maneꞌteꞌ kanya it uꞌumbay ya. Baw, pikir ku ngaytu, uyun naga siguru it pikir it Espiritu Santo it Ampuꞌang Diyus.