1 Corinto 6 - Tagbanwa

In unuy magayeng buwaten it mga magpamayaꞌ in beteꞌ may masakal kat nakem nira

¹ May esa paꞌ gasiꞌ nga iꞌaat kut imyu. Unuy kat pikir mi, in beteꞌ may ipagkupaꞌayus it esa nga namayaꞌ nga ega magkapakay ya duꞌun it sulsug ya kat pamayaꞌ? Unu, magayen nga iꞌapyat ya duꞌun it mga taw nga ega magkilala it Ampuꞌang Diyus? Unuy maꞌrutan nira pasar it kataldengan nga magayen kat panleteg ya? Kaꞌilangan iꞌapyat lamang kat mga kasubung mi nga magpamayaꞌ.

² Ka unu, ega magkaꞌrutan mi nga, mga magpamayaꞌ, uyut it magꞌukuman it banwa ngaytu kat pagdadarapaꞌen? Ta it atkayan, unu, ega kaya mi nga ayusun i atkayan mana ngayang kadedekeyet bagay?

³ Sabap maski mga anghil, uyut tami it mukuman it kanira. Ta daꞌga subraꞌ ta nga kaya nga ayusun i mga bagay kat pangaꞌgenan tami?

⁴ Aypaꞌ in beteꞌ may masakal kat nakem mi, unu, iꞌapyat mi paꞌ duꞌun it mga taw nga pagkilalaen mi nga belag i nakem ka egay pagkilala nirat Ampuꞌang Diyus?

⁵ Beteꞌ ayaw na. Eyaꞌan mi na. Ka unuytu, egay taw asan nga magkaꞌrut mayus it in unuy piyagsasaꞌran it kasubung yang magpamayaꞌ?

⁶ Unuka atkayan pay pagbuwaten mi nga magdima-dimandaen kamu nga sang sulsugan kat pamayaꞌ? Bawnga duꞌun paꞌ it mga taw nga ega magpamayaꞌ it ki Cristo i pagꞌapyatan!

⁷ Ipagsugid kut imyu nga in ipagdimanda mi i mga sulsug mi kat pamayaꞌ, sikayan subuk diyaꞌeg kamu nga lagi kat panleteg it Ampuꞌang Diyus. Sana yay magayen, palipasen mi na lamang i kamaliꞌ nga pagbuwaten baw panluku it imyu.

⁸ Temed ta, it sang kamu-kamuwan naga nga sang sulsugan kat pamayaꞌ i magbuwat it kamaliꞌ baw magpanluku it esa may esa!

⁹ Unu ega paꞌ magkaꞌrutan mi nga iyan mga ega magpangindiꞌ it kasalaꞌan nira, talagang egay maski unu nga kabagiꞌan duꞌun it kaꞌadiꞌan it Ampuꞌang Diyus? Ega ambutan mi i sadili mi. Ka iyan mga mapiyamakun duꞌun it ega asawa nira, mga magsirbi it pagbete-beteꞌen nga diyus, mga magbungad it atay it nagꞌasawa, iyan mga magpasbung it babay takaꞌ lalaki naga, baw mamagꞌuꞌunay nay nagsubung nga lalaki, ega talagay kabagiꞌan nira duꞌun it kaꞌadiꞌan it Ampuꞌang Diyus.

¹⁰ Atnaga i mga mananakaw, mga maꞌirak it kusas nga magkapisiꞌ situt banwa, mga mapiyalangu, mga mapiyandiyampaꞌ baw mga mapiyanreges-reges.

¹¹ Iyan katꞌesa may atkayan naga yan asat imyu. Temed kayti, linimpiyuꞌ kamu na kat mga kasalaꞌan mi, baw ipiyasiguru kamu na duꞌun it Ampuꞌang Diyus nga mga taawan ya na. Ipagpabetang ya na kamu nga ega nay kakasalaꞌan kat panleteg ya. Muꞌsa ngaytu, kat keseg it binwat it Ampuꞌan nga si Jesu-Cristo baw guna it Espiritu Santo it Ampuꞌang Diyus nga ipiyapasarum ya situt bilug ta.

Kaꞌilangan, paꞌalaidan i muꞌsang kalasit pamakun duꞌun it ega asawa mu

¹² Ta, barang may magꞌaat, “Mapakay ta nga buwaten i maski unu, basta ega biyawal it Ampuꞌang Diyus.” Sabagay na, temed ega muꞌsang buwat, kat ikagayen tami. Baw maski matuud nga magkabwat tami i kumpur ireg tami nga buwaten, nga iyan ega biyawal it Ampuꞌan, temed kaꞌilangan magꞌintur nga ega nay adat nga subraꞌ tami nga pagrarasan, nga subung nat magꞌuꞌuripen it aten.

¹³ Maat siꞌ it beken, “Iyan pangaꞌen, talagang ipagbetang lamang kat tinaꞌi, baw egay beken nga pagꞌargan it tinaꞌi in daꞌga pagbetangan it pangaꞌen. Aypaꞌ in paggetmanan, simpri kumaꞌen. Tutal, mabut i aldaw nga awaꞌen it Ampuꞌang Diyus i pangaꞌen, pati tinaꞌi ta ka ega nay pagꞌargan. Atkayan naga i bilug ta. Unuka ega sumbayaꞌen tami i kaꞌirgan ya nga manguꞌi-kuꞌit it maski siyu nga magꞌireg gasiꞌ? Tutal, mabut i aldaw nga maꞌawaꞌ gasiꞌ i bilug ta, pati mga kaꞌirgan ya ngaytu.” Temed ega talaga magayen yan. Sabap ega yay pagꞌargan it bilug ta, pamakun duꞌun it ega asawa ta. In daꞌga iyan i pagꞌargan, ikabantug it Ampuꞌan. Baw Ampuꞌan ngaytu i kat ikagayen it bilug ta.

¹⁴ Baw bilug ta, talagang egnen it paꞌuliꞌ it Ampuꞌang Diyus kat keseg it guna ya, subung nagat iyan inggen yat paꞌuliꞌ i Ampuꞌan.

¹⁵ Unu bayan, ega paꞌ magkaꞌrutan mi nga, kitang mga magpamayaꞌ, bilang sang bagiꞌ na nga bilug ni Cristo i bilug tami? Ta unu, pisiꞌen tami i sang bagiꞌ ngaytu nga bilug ni Cristo, ka buwaten ta nga sang bagiꞌ nga bilug it babay nga ega magayen i pangaꞌgenan ka ipagpanulus yay bilug ya? Talagang ega mapakay yan.

¹⁶ Unu, ega magkaꞌrutan mi nga iyan magsalya it atkayang babay, magbaraꞌ nang sang kabilu-bilugan na sira? Sabap magꞌaat ngayan duꞌun it kasuratan, “Sira nga duwa, sang kabilu-bilugan na sira.”

¹⁷ Temed iyan magpasakep na it Ampuꞌan, kalagpit ya na baw sang kanake-nakeman na sira.

¹⁸ Aypaꞌ paꞌalaidan mi nga pirmi i muꞌsang kalasit pamakun duꞌun it ega asawa mu. Ka itung kasalaꞌan, belag kat muꞌsang kasalaꞌan nga beken nga magkabwat it taw. Sabap kat pamakun ngaytu duꞌun it ega asawa mu, ipagkasalaꞌan mu i bilang sang bagiꞌ it bilug ni Cristo duꞌun it ega bagiꞌ it bilug ya.

¹⁹ Unu, ega paꞌ magkaꞌrutan mi nga bilug mi, kabilangan ya, ega basta-bastang balay nga pagtataꞌidan it Espiritu Santo nga ipiyapasarum it Ampuꞌang Diyus? Aypaꞌ talagang ega nayan imyu i bilug mi in daꞌga, kat Ampuꞌang Diyus na.

²⁰ Ka subuk inalang ya kamu it ega basta-bastang kantidad isaꞌun mga taawan ya na. Aypaꞌ ka inturun mi i bilug mi, nga kat ikabantug it Ampuꞌang Diyus i muꞌsang pagbuwaten.