1 Corinto 5 - Tagbanwa

Ega mapakay kat mga magpamayaꞌ i adat nga mapiyamakun duꞌun it ega asawa ya

¹ Ta, itu nay esang ega magkapakay ku asat imyu. Ka nanlekep nay baritaꞌ nga maat kunuꞌ may esang magpamayaꞌ it Ampuꞌan asan nga may pagbuwaten nga ega magayen. Pagꞌasa-asawaen ya i asawa it amaꞌ ya. Talagang maraꞌway tu ka maski mga taw nga ega magkilala it Ampuꞌang Diyus, ega magbuwat it atkayang raꞌway it pagbuwaten.

² Temed kamu asan, ipagpatuꞌgud mi i pagsunud mit Ampuꞌan maski pagbaliwalaꞌen mi i yanang raꞌway it pagbuwaten! Sana nasmekan mit ereꞌeret baw inawaꞌ na kat gurupu mi i magbuwat it atkayan ngayan.

³ Maski maat ega asan i bilug ku takaꞌ in kat nakem, subung it asan aku naga nga pagbetanganan ku nat ukuman i magbuwat ngayan it atkayan.

⁴ Ituy kaꞌilangan mi nga buwaten. Magtingped kamung mga magpamayaꞌ nga pagkilalaen mi nga talagang asan nat imyu i pudir it Ampuꞌan tami nga si Jesu-Cristo. Baw subuk iba mi naga aku gasiꞌ in kat nakem. Bawnga kat keseg it guna it Ampuꞌan nga si Jesu-Cristo,

⁵ iyan taw ngayan nga magbuwat it maraꞌway, awaꞌen mi na kat gurupu mi nga iꞌuliꞌ na duꞌut pamegbeg ni Satanas, isaꞌun sana singuliꞌan ya i pagsumbayaꞌ ya it kaꞌiꞌirgan ya nga maraꞌway. Ka in atkayan maribri naga kat aldaw ngayan nga ipangukuman it Ampuꞌan.

⁶ Ega magayen i adat mi ngayang magpasubraꞌ-subraꞌ. Unuy ikapatuꞌgud mi it may maraꞌway ngayang pagbuwaten asan? Magayen, awaꞌen mi na, in daꞌga barang lemkep asat imyu. Ka unu, ega magkaꞌrutan mi i sambatan ngayan nga magꞌaat, “Magkapaꞌalsa it dekeyeꞌ lamang nga papaꞌalsa i sang iꞌilutuꞌan nga tinapay”?

⁷ Eeꞌ baꞌ, awaꞌen mi na i muꞌsang adat mi nga kuntraꞌ kat kaꞌirgan it Ampuꞌang Diyus isaꞌun mabaꞌgu nay pangaꞌgenan mi. Ka daꞌga baꞌ, pabetang it Ampuꞌang Diyus it imyu, mga taw na nga ega nay kakasalaꞌan? Atkaytu i pabetang yat aten sabap it pamayaꞌ tat ki Cristo, kanya nga ipiyasbung it tupa nga isiyalisi isaꞌun taꞌliban tat panriga it Ampuꞌang Diyus sabap it mga kasalaꞌan tami. Ituꞌun ngaytu, pagtuman it pagpapuntuꞌan ngayan it Pistaꞌ namen nga mga Judio it tagnaꞌ nga pagpangaranan it Tiyaꞌliban.

⁸ Aypaꞌ ka paꞌuyut tami gasiꞌ i aten kat pagtuman it Pistaꞌ ngaytu. Binwat it mga Judio it tagnaꞌ, inawaꞌ nira kat balay nira i muꞌsang ipagpaꞌalsa it tinapay, nga yay bilang ladawan it kasalaꞌan kat pangaꞌgenan nira. Ta atkayan naga, awaꞌen ta na kat pangaꞌgenan tami i muꞌsang karaꞌe-raꞌetan baw maraꞌway nga pagbuwaten. Baw yanay magayen nga adaten tami, tingleden i nakem kat pagsunud tat kamatuudan nga garing duꞌut Ampuꞌang Diyus.

⁹ Kat uꞌnang surat nga ipiyataban ku asat imyu talagang ibintang ku i sugi-sugid nga, kaꞌilangan, ega na pakiꞌiba-ibaan mi i mga taw nga magpamakun duꞌun it ega asawa nira.

¹⁰ Ega pagpaꞌiguꞌan ku kaytu, mga taw nga ega magkilala it Ampuꞌang Diyus nga magpamakun duꞌun it ega asawa nira, u mga maꞌirak it kusas nga magkapisiꞌ situt banwa, mga mapiyanreges-reges, baw mga mamagsirbi it pagbete-beteꞌen nga diyus. Ka in beteꞌ mga ega magkilala it Ampuꞌang Diyus i pagpaꞌiguꞌan, simpri kaꞌilangan nga limꞌid kamu situt banwa ngaytu isaꞌun lamang mapaꞌalaidan mi sira.

¹¹ Iyan talagay pagpaꞌiguꞌan ku kaytu nga ega pakiꞌiba-ibaan mi, iyan mga taw nga maat sulsug mi kat pamayaꞌ, arit mapiyamakun paꞌ duꞌun it ega asawa ya, maꞌirak pat mga kusas nga magkapisiꞌ situt banwa, magsirbi paꞌ it pagbete-beteꞌen nga diyus, mapiyandiyampaꞌ paꞌ, mapiyalangu, baw mapiyanreges-reges. In atkayan pay adat nira, maski kaꞌen ayaw kamut pakikaꞌen duꞌut kanira.

^12-13 Sabap egay pudir ku nga betanganan kut ukuman i mga taw nga ega magsarig baw magpamayaꞌ it ki Cristo. Ampuꞌang Diyus nay baalaꞌ mukuman it kanira. Iyan kasubung ta lamang nga magpamayaꞌ i maꞌukumanan tami. Aypaꞌ awaꞌen mi na kat gurupu mi i magbuwat it maraꞌway ngayan, uyun nagat inaat duꞌun it kasuratan.