1 Corinto 4 - Tagbanwa

Iyan kataldengan pasar it pagsirbi ni Pablo baw beken nga mga apustul

¹ Ta, subung nat inaat ku, kaꞌilangan ipabetang mi kami nga mga manigsirbi ni Cristo, nga piyaskelan it Ampuꞌang Diyus it mga subuk tagu-taguꞌ nga pangadal ya nga ipagpaꞌrut ya na kayti it mga taw.

² Aypaꞌ pagsarungaen namen it magayen i katengdanan namen ngaytu, ka yay kaꞌilangan kat mga piyaskelan it buwaten it agalen nira.

³ Aypaꞌ ega ipagdawaꞌ ku kat ulu ku i pagꞌaaten mi u pagꞌaaten it maski siyu pasar it pagsirbi ku ngaytu, in magayen u ega. Maski aku na mismu, ega ipabetang ku nga magayen u ega i buwat ku.

⁴ Ka maski egay pagtatanudun ku nga kamaliꞌ kat pagsarunga ku ngaytut katengdanan ku, barang may maꞌiway nagat Ampuꞌan. Kanya simpri i magꞌukuman it aken.

⁵ Aypaꞌ ega betanganan mit ukuman i maski siyu in magayen u ega i pagsirbi nira. Elaten mi i timpu nga ipangukuman kat pamaꞌuliꞌ it Ampuꞌan. Siguradu yan nga ipalbaw ya i mga bagay nga kayti magtataguꞌ paꞌ kat kadleman. Baw ipalbaw ya gasiꞌ i maski pagꞌantapen it nakem it kada esa. Bawnga tumanggap na i kada esa it kabantugan nga gumaring duꞌun it Ampuꞌang Diyus nga bagay it kanya-kanyang binwatan.

⁶ Mga sulsug ku kat pamayaꞌ, kat ikagayen mi piyaꞌalimbawaan ku kami ni Apolos, isaꞌun masepsepan mi kat amen nga pagsunud nga kaꞌilangan ega pasubraꞌan i magsusurat nga ampang it Ampuꞌang Diyus. Sana ega na ipalandi-landi it maski siyu it imyu i in siyu nga manigtulduꞌ baw tibabaꞌen ya na i beken.

⁷ Ka unuytu, subraꞌ kamu nga makaꞌrut, subraꞌ pat beken nga taw? Unu nay kakayaan mi nga ega ipiyagꞌildaw it imyu it Ampuꞌang Diyus? Ta, it atkayan, unuka ipagpatuꞌgud mi paꞌ, adimaat ega ipiyagꞌildaw it imyu?

⁸ Ka palan kat pikir mi manggaden kamu na, nga pagustuꞌ na it muꞌsang ipagꞌildaw it Ampuꞌang Diyus. Siguru tanud mi, nalandawan mi na kami ka naꞌbut mi nay magꞌadiꞌ kamu na kat kaꞌadiꞌan it Ampuꞌang Diyus. In maat matuud, magayen, ka in atkayan magꞌadiꞌ kami naga nga kaꞌibaan mi, baw ega nay kakuriꞌan namen.

⁹ Sabap kat pikir ku lamang, kami nga mga apustul, subuk binwat kami it Ampuꞌang Diyus nga piyakatimawaꞌ kat muꞌsang taw. Kabilangan namen, atnat mga taw nga biyetanganan it ukuman nga imatayen it pagleltegan it kadakel. Yay matuud, kabetangan namen ngaytu, subuk pagleltegan naytu it muꞌsang banwa, mga katataawan, pati mga anghil gasiꞌ.

¹⁰ Kat panleteg it banwa mga engel-engel kami kat panindeg namen it ki Cristo. Temed kamu, ipagpaliꞌwan mi nga makaꞌrut kamung banar in pasar it ki Cristo. Kami kunuꞌ, egay kakapulusan, temed kamu, iyan kunuꞌ i mabantug. Pagtibabaꞌen kami temed, kamu, iyan i pagdaya-dayawun.

¹¹ Talagang seked it kayti nga timpu, paggetmanan kami baw pagbaꞌnekan. Atnat lebas kami, maglabay it pasakit, baw egay tandaꞌ nga pagꞌistaran.

¹² Ipagpaturuꞌ namen i liꞌnget namen isaꞌun lamang may ibtang it tinaꞌi. Pagdiyampaꞌen kami temed, iyan mga magdiyampaꞌ it amen, ipagpanalangin namen nga sana ildawan sirat Ampuꞌang Diyus. In pagpakuriꞌan kami, pagpataꞌnan namen lamang.

¹³ Malulway nga mga sugi-sugid i ipagbeles namen it iyan mga magpanranggaꞌ it amen. Talagang seked kayti, kabetangan namen, subung it basura nga ipagbuntal nga pagsigniꞌan na it katataawan.

¹⁴ Egaytu maat ipagsurat kuy itung mga sugi-sugid nga pagpaꞌeyaꞌan ku kamu. Eget naytut panaldeng kut imyu, kamu nga subung nat ipiyagrasyaꞌ ku nga pagmaꞌalen ku nga banar.

¹⁵ Sabap maski sang puluꞌ pang ribu i mga magpadisir it imyu in magꞌuꞌunuy magayeng pagsunud it ki Cristo, temed esa-esa lamang i bilang amaꞌ mi kat pamayaꞌ. Ka subuk ipiyanganak ku kamu kat pakilagpit mi it ki Cristo Jesus, sabap piyamayaꞌ mi i Magayeng Baritaꞌ pasar it kanya nga ipiyangadal kut imyu.

¹⁶ Aypaꞌ, asi-asi paꞌ sana it imyu, it bilang amaꞌ mi na aku, ega pasyangan mi i namuyaan mi nga adat ku.

¹⁷ Ta, sabap it kaꞌirgan ku ngaytu nga maguru mi i adat ku, piyapaꞌasan kut imyu si Timoteo, kanya nga talagang pagmaꞌalen ku nga ipagpabetang ku nga subung nat anak ku gasiꞌ kat pamayaꞌ. Magkasarigan kanya kat pagsunud ya it Ampuꞌan baw kanya i pademdem it imyu it mga pagꞌadaten ku kat aken nga pagsunud it Ampuꞌan. Atkaytung pagsunud i ipagpangadal ku gasiꞌ duꞌun it mga magpamayaꞌ kat paꞌari-aring banwa nga pagpaꞌaduꞌunan ku.

¹⁸ Magkaꞌrutan ku nga may beken na nga magpasubraꞌ-subraꞌ asat imyu, ka ipagpaliꞌwan nira nga daꞌku na kunuꞌ kaꞌurum paꞌasan.

¹⁹ Temed yay matuud, in kaꞌirgan it Ampuꞌan, paꞌasan aku yan it imyu kat madaliꞌ nga timpu. Sikayan maꞌrutan ku in may guna talaga it Espiritu Santo kat pangaꞌgenan it mga magpasubraꞌ-subraꞌ ngayan, u in ampang lamang nga egay kamatuudan i ipagpaliꞌwan nira.

²⁰ Sabap, yay matuud, iyang taw nga may kaꞌuyutan nga matuud it kaꞌadiꞌan it Ampuꞌang Diyus, mamuyaan tu kat keseg it guna it Espiritu Santo duꞌut pangaꞌgenan ya, ega lamang kat ampang.

²¹ Aypaꞌ unuy ireg mi? Unu, paꞌasan aku nga subuk titiꞌkul i ampang kut imyu? Sana indiꞌan mi nay kamaliꞌ nga pamagbuwaten mi isaꞌun kapaꞌasan aku it may dakulang kararas baw kapalulusan.