1 Corinto 3 - Tagbanwa

Kurang paꞌ talaga i kasepsep it mga taga Corinto pasar it Magayeng Baritaꞌ

¹ Mga sulsug ku kat pamayaꞌ, iyan asan aku pat imyu, kat pangadal ku ega mapakay nga ipabetang ku kamu nga mga taw nga magsunud it padisir it Espiritu Santo, in daꞌga mga taw nga magsumbayaꞌ lamang it sadili nga kaꞌirgan it bilug. Maski maat maglalagpit kamu na it ki Cristo, temed adat mi, subuk adat paꞌ it waꞌwaꞌ lamang, ega adat it mga ustuꞌ nay pamayaꞌ.

² Maat mi, iyan ipiyangadal kut imyu it tagnaꞌ, subuk gatas lamang, ega maat madsen nga pangaꞌen. Sabap ega tiyaꞌseb i pikiran mi it in unuy pagpapuntuꞌan. Baw seked kayti, atkayan naga nga kurang i kasepsep mi it ituꞌun ngaytu

³ Sabap magdadaꞌeg paꞌ kat nakem mi i maraꞌe-raꞌet nga kaꞌirgan it bilug, ka asan pat imyu i inggi-inggiten baw pakidaꞌeg it esa may esa. Iyang mga adat mi, magpamatuud nga pagsumbayaꞌen mi paꞌ i sadili mi nga kaꞌirgan it bilug, subung nagat mga taw nga ega paꞌ namayaꞌ it ki Cristo.

⁴ Ka ungayan, maat it sang kataawan, “Aken, panulduꞌ ni Pablo i magayen ku.” Maat siꞌ it sang kataawan, “Aken ega, ki Apolos.” Daꞌga baꞌ, atkaytung pagbuwaten, uyun lamang kat buwat it mga ega paꞌ namayaꞌ?

⁵ Ta, abir kunuꞌ, siyuytu si Apolos baw si Pablo ngaytu? Daꞌga baꞌ mga manigsirbi kami lamang it Ampuꞌan nga giyamit ya isaꞌun mamayaꞌ kamu it kanya? Pagbuwaten namen lamang i buwaten nga ipiyakarguꞌ yat amen.

⁶ Ka, kaꞌalimbawaan ya, aku i liminwak, si Apolos i manigbuꞌbuꞌ it danum. Temed Ampuꞌang Diyus i nagpatubuꞌ baw nagpakseg.

⁷ Talagang, kat buwat ngaytung magpangadal it Magayeng Baritaꞌ, ega iyan manigluwak baw manigbuꞌbuꞌ i impurtantiꞌ, in daꞌga iyan Ampuꞌang Diyus nga kanya i magpatubuꞌ baw magpakseg.

⁸ Ka iyan manigluwak baw iyan manigbuꞌbuꞌ, urunyun sira kat pagbuwaten nira, nga esa-esay pagpaꞌresan. Baw mabut i aldaw nga, kada esat kanira, tumanggap it tumbas sigun kat kanya-kanyang piyaꞌresan.

⁹ Kami ngaytung manigpangadal, nagsubung nga mga manigbuwat lamang it Ampuꞌang Diyus. Kamu nga pagtulduꞌan namen, kamu i subuk parangumaen ya. Esa gasing alimbawa, kamu i subuk balay ya nga ipagpabwat yat amen. Talagang kat Ampuꞌang Diyus tami nga muꞌsa.

¹⁰ Kat keseg it kakayaan nga ipiyagꞌildaw it Ampuꞌang Diyus it aken, aku i subuk makaꞌrut nga manigpatindeg it balay. Ta, aku i nagbetang it ipagpapaꞌgen it balay, beken mana i lumawaꞌ-lawaꞌ baw meman. Temed, kada manigbuwat ngaytu, kaꞌilangan nga maꞌintur sira kat pamatindeg.

¹¹ Sabap ega na talagay beken paꞌ nga ipagpapaꞌgen nga mapakay nga gamiten in daꞌga itu na, nakabtang na ngaytu nga lagi nga si Jesu-Cristo.

¹² Temed ega surubung i mga buwat-buwat nga paggamiten it mga manigpatindeg. May magayen nga banar nga subuk bulawan, pirak, baw marerga nga mga batu. May ega magayen gasiꞌ, nga subuk lampung, dikut u dagami lamang.

¹³ Temed in asan nat aldaw na ngayan nga ipangukuman, talagang matantuwan tu it apuy i kalasi it buwat it kada esa, in uyun i pangadal nira u ega uyun kat ipagpapaꞌgen it balay nga si Cristo. Sabap, kat iyan nga aldaw, sukdanan it apuy i buwat it muꞌsa.

¹⁴ Ta, in ega maꞌunu-unu it apuy ngaytu i ipiyagꞌeman nira kat ega basta-bastang ipagpapaꞌgen it balay, simpri siguradu nga tumanggap sira it tumbas.

¹⁵ Takaꞌ in maꞌanteng, daꞌga dakulaꞌ nga kapirdiyan ya? Sabagay maribri naga kanya, temed kabilangan ya, subung kanya it nanlapas duꞌun it deleg it apuy nga nangibit-kibit manay ginawa ya.

¹⁶ Unuytu, ega magkaꞌrutan mi nga, kamu, bilang ega basta-bastang balay nga pagtataꞌidan it Ampuꞌang Diyus, ka magsasarum na asat imyu i Espiritu Santo ya?

¹⁷ Egay pagduwa-duwa nga rigaen it Ampuꞌang Diyus i rumanggaꞌ it balay ya ngaytu. Sabap ega basta-basta i balay ngaytu ka balay talaga it Ampuꞌang Diyus, nga egay belag in daꞌga kamu nga mga taawan ya na i paꞌaaten kaytu.

¹⁸ Magayen, ega ambutan it maski siyu i sadili ya, ka in beteꞌ pagpikiren ya nga makaꞌrut kanya kayti kat pabetang it banwa ngaytu, magayen ibuntal ya na baw ipabetang i sadili ya nga subuk egay uru-urut kat pabetang it banwa, isaꞌun kumaꞌrut kanya kat kamatuudan nga kasepsep nga garing duꞌun it Ampuꞌang Diyus.

¹⁹ Sabap, iyan ipagpabetang it banwa nga magayeng kasepsep, nga ega Ampuꞌang Diyus i pagkilalaen, egay kuwintaꞌ kat panleteg ya. Ka maat i duꞌun it kasuratan it tagnaꞌ paꞌ, “Iyan mga pangtasan na kat adat nga mapiyandaya-dayaꞌ, ipapanaw it Ampuꞌang Diyus nga pandaya-dayaꞌ nira ngayti i ikasigapul yat kanira.”

²⁰ Atkayan naga, “Talagang magkaꞌrutan it Ampuꞌang Diyus i iyan pamagpikiren it mga maat makakaꞌrut, nga egay mga kakapulusan.”

²¹ Aypaꞌ ayaw kamu it pataꞌas it taw baw kampiꞌ it kanira. Ka, muꞌsang bagay, ipiyagbegay it imyu kat ikagayen mi nga muꞌsa.

²² Alimbawa mga manigpangadal, nga subuk aku, si Apolos, baw si Pedro, ipiyagbegay it Ampuꞌang Diyus it imyu kat ikagayen mi nga muꞌsa. Atnaga i muꞌsang bagay. Iyan banwa ngaytu, iyan kaꞌgenan, kamataynen, mga bagay kayti baw iyan kat pagdadarapaꞌen, kat ikagayen mi talagay muꞌsa.

²³ Ka daꞌga baꞌ, ki Cristo kamu na? Baw si Cristo ngaytu, kat Ampuꞌang Diyus.