1 Corinto 14 - Tagbanwa

Panulduꞌ pasar it kakayaan nga magkaꞌampang it belag-belag nga ampang nga ega naꞌadalan

¹ Impurtantiꞌ talaga nga paꞌresan mi nga pirmi i kararas ngaytu, takaꞌ inawaren mi naga gasiꞌ i mga kakayaan nga ipagꞌildaw it Espiritu Santo, subraꞌ na i pagpanakman it ipagpaꞌrut it Ampuꞌang Diyus duꞌut kadakel.

² Ituꞌun ngaytu, subraꞌ pay pakinabang yat kakayaan ngayang magkaꞌampang it belag-belag nga ampang nga ega naꞌadalan. Ka iyan magkaꞌampang it mga ampang nga ega naꞌadalan, Ampuꞌang Diyus tu i pagpakisugi-sugidan ya, egaytu masigkataw ya. Aypaꞌ ega nagaytu masepsepan nira sabap, kat panakem it Espiritu Santo, pagꞌampangen ya ngaytu i ega magkasepsepan it taw.

³ Temed kakayaan ngayan nga pagpanakman it ipagpaꞌrut it Ampuꞌang Diyus, simpri mga taw i pagpakisugi-sugidan ya, bilang kat ikseg it pamayaꞌ nira, baw kat ikseg baw ikasagya it nakem nira.

⁴ Iyan magkaꞌampang ngaytu it belag-belag nga ampang, sadili yang pamayaꞌ i pagpaksegen ya, temed iyan pagpanakman ngaytu it ipagpaꞌrut it Ampuꞌang Diyus duꞌut kadakel, pagpaksegen ya i muꞌsang kaꞌibaan ya nga magpamayaꞌ.

⁵ Sana ireg ku, magkaꞌampang kamu nga muꞌsa it belag-belag nga ampang nga ega naꞌadalan, takaꞌ iyan i subrang ireg ku, pagpanakman kamu it ipagpaꞌrut it Ampuꞌang Diyus duꞌut kadakel. Sabap subrang magkapakinabangan i magkasugid ngaytu it ampang nga ipagpaꞌrut it Ampuꞌang Diyus, subraꞌ paꞌ it magꞌampang ngaytu it belag-belag nga ampang nga ega magkasepsepan it maski siyu, magpuyra in begayan kanya it magkapaꞌyag ya i pagꞌampangen ya ngaytu isaꞌun makatabang nga ikseg it pamayaꞌ it muꞌsang kaꞌibaan ya nga natingped.

⁶ Mga sulsug ku kat pamayaꞌ, pikiren mi tut magayen. In beteꞌ paꞌasan aku it imyu baw mampang aku it belag nga ampang nga ega naꞌadalan ku, ta unuy mapulus mi kayan it aken? Talagang ega. Simpri iyan i may mapulus mi in yay ipaliꞌwan ku, panulduꞌ u pabetang-betang it Ampuꞌang Diyus nga ipiyanakem yat aken, esang magkasepsepan ku pasar it kanya, u esa gasing ipagkapanulduꞌ ku kat ikseg it pamayaꞌ.

⁷ Ka subung it, alimbawa, mga turugtugun. In ega ipagpatlaꞌ it paliꞌeg, ega maꞌrutan it maski siyu i pagtugtugan.

⁸ Atkayan naga, in ega ipagpabunawar nga banar i pamaꞌrut nga eyep it taburi, ta siyuy magrigen-rigen nga pakibunuꞌ?

⁹ Ta, atkayan naga yan, magꞌuꞌunu maꞌrutan it maski siyu i ireg mi nga sugiden in magꞌampang kamu it belag-belag nga ampang nga ega magkasepsepan nira? Subung kamu na lamang it magpakisugi-sugid it lawang.

¹⁰ Siguru dakel nga dakel i belag-belag nga ampang situt sinirungat langit, baw kada esa, simpri may pagꞌaaten.

¹¹ Temed in daꞌku magkaꞌrut it ampang it kasugi-sugid ku, baw kanya, ega gasiꞌ magkaꞌrut it ampang ku, magꞌuꞌunu kami magsigsepsep?

¹² Aypaꞌ, it pagꞌiꞌinawaren mi nga banar i mga kakayaan nga ipagꞌildaw it Espiritu Santo, ta paꞌresan mi nga magbastanti kamu it kakayaan ngaytu nga magkapakseg it pamayaꞌ it mga kaꞌibaan mi.

¹³ Aypaꞌ ka iyan i magayen, iyan binggayan ngaytut kakayaan nga magkaꞌrut kanya mampang it belag-belag nga ampang nga ega naꞌadalan, kaꞌilangan manalangin nga begayan gasiꞌ kanya it kakayaan nga makapaꞌyag yay pagꞌaaten ya kat ampang ngaytu.

¹⁴ Ka in magpanalangin aku kat itu nga ampang, magꞌuyun i nakem ku temed in kat pikir ku, egay kapulusan, ka ega magkasepsepan ku.

¹⁵ Ta it atkayan na, unuy magayen nga buwaten ku? Buwaten kuy duwa ngaytu, nga manalangin aku kat panakem ngaytu it Espiritu Santo, baw manalangin aku gasiꞌ kat ampang ngaytu nga sadili nga magkasepsepan it kadakel. Atkayan naga in magkantaꞌ it pagbantug kut Ampuꞌang Diyus.

¹⁶ Ka in ega atkayan, in beteꞌ magpasalamat ka duꞌun it Ampuꞌang Diyus kat belag nga ampang nga panakem it Espiritu Santo, magꞌuꞌunu paꞌuyunan i pasalamat mu ngayan it mga kaꞌibaan mu it ega naga magkasepsepan nira i pagꞌampangen mu?

¹⁷ Maski maat magayen i pasalamat mu ngaytu, temed ega nagaytu makatabang it beken nga ikseg it pamayaꞌ nira.

¹⁸ Salamat nga dakulaꞌ duꞌun it Ampuꞌang Diyus nga magkaꞌampang akuy aken it belag-belag nga ampang nga ega naꞌadalan ku. Talagang ega masbungan mi aku kat kakayaan ngaytu.

¹⁹ Temed in kat katingpedan it mga magpamayaꞌ, talagang iyan i magayen ku, maski limang tagaꞌ i maꞌampang ku basta magkasepsepan baw ikseg it pamayaꞌ it beken, ega gat rinibu-ribu nga ampang nga ega magkasepsepan it maski siyu.

²⁰ Mga sulsug ku kat pamayaꞌ, sana gantiyan mi nay pikir mi pasar it mga itu ngaytu. Ka pikir mi kayti, subung lamang it pikir it waꞌwaꞌ. Sabagay in pasar it kubwat it karaꞌe-raꞌetan, sana yay subung kamu it madaragen nga ega pay kat nakem nira nga itu ngaytu. Temed in pasar it kasepsep it kaꞌirgan it Ampuꞌang Diyus, kaꞌilangan ustuꞌ nay pikir mi.

²¹ Dedemdemen mi i isiyurat nga ampang it Ampuꞌang Diyus nga magꞌaat, “Mabut i aldaw nga, kat ampang it beken nga bangsa it taw, ipaꞌrut kut mga taawan ku ngaytu i kusugiden kut kanira. Temed maski atkayan, talagang daꞌsira pagneg it aken.”

²² Garing sikayan matantuwan ta nga, ampang nga ega magkasepsepan i gamiten it Ampuꞌang Diyus nga bagay it mga magbaliwalaꞌ it mga inaat ya, nga tandaꞌanan it daꞌsira magpamayaꞌ. Temed iyan mga taw nga magpamayaꞌ it magayen, ampang nga magkasepsepan nira i ipaꞌrut it Ampuꞌang Diyus it kanira it kusugiden ya, nga ituy tandaꞌanan it magayen naga i pamayaꞌ nira.

²³ Ta kayti in beteꞌ mamagtingped i kadakel mi nga magpamayaꞌ baw, kapuꞌsaan mi, magꞌampang it belag-belag nga ampang nga ega magkasepsepan it maski siyu, bawnga sakaliꞌ may mabut nga mga taw nga ega magpamayaꞌ u mga elam kat itung mga bagay, daꞌga aaten nira nga mamagpulpug kamu na!

²⁴ Temed imbis nga magꞌampang it belag-belag nga ampang nga ega magkasepsepan, magtuturan kamu it ipagpaꞌrut it Ampuꞌang Diyus kat ampang nga magkasepsepan it muꞌsa, daꞌga matanudan it mga miyabut ngayti nga may turubagen nira duꞌut Ampuꞌang Diyus ka makasalaꞌan sira?

²⁵ Ta daꞌga kat pagneg nira makalbaw na i mga tagu-taguꞌ nga kasalaꞌan kat nakem nira? Bawnga limingkuꞌud na sira ka bantugun nay Ampuꞌang Diyus, langkuy aaten nira nga talagang situ nang matuud it imyu i Ampuꞌang Diyus ngaytu.

Kat mga pagtingped it mga magpamayaꞌ, kaꞌilangan buwaten i muꞌsa kat tamaꞌ baw maꞌayus nga pabetang-betang

²⁶ Ta it atkaytu na, mga kasulsugan, unuy magayen kat panleteg it Ampuꞌang Diyus? Daꞌga itu na, in magtingped kamu nga magsamba, alistu kamu nga muꞌsa kat kanya-kanyang kakayaan nga ipiyagꞌildaw it Espiritu Santo. Alimbawa barang may kumantaꞌ, may tumulduꞌ, may mampang it ipiyaꞌrut it Ampuꞌang Diyus it kanya. Iyan beken, barang mampang it belag nga ampang nga ega naꞌadalan, u paliꞌwan it paꞌyag it itu ngaytu kat panakem it Espiritu Santo. Temed muꞌsa ngaytu, kaꞌilangan buwaten kat ikseg it pamayaꞌ it muꞌsa.

²⁷ Kayti, in beteꞌ may mampang it belag-belag nga ampang nga ega naꞌadalan, tamaꞌ na i duwa u tulu, magsubli-subliyen sira, baw kaꞌilangan nga may paꞌyag it pamagsugiden nira.

²⁸ Temed in egay makapaꞌyag, ega na lamang rimiꞌe-riꞌeng. Mampang mana it iti ngayti in esa-esa ya na nga sadili ya i pagpakisugidan ya baw Ampuꞌang Diyus.

²⁹ Ta, atkayan naga in ipagtuturan duꞌut kadakel i ipagpaꞌrut it Ampuꞌang Diyus. Duwa u tulu gasiꞌ i mampang, baw timbang-timbangen it beken i kanira nga pagsugiden, in siyuy inildawan it kakayaan nga katimbang.

³⁰ Baw in beteꞌ may esa nga magꞌaꞌdung nga sakaling panakman gasiꞌ it Espiritu Santo it beken pang ipagpaꞌrut it Ampuꞌang Diyus duꞌut kadakel, kaꞌilangan medek na i uꞌna ngayting magꞌampang isaꞌun kaꞌampang siꞌ i baꞌgung piyanakman.

³¹ Ka in atkaytu makaꞌampang i kumpur pagpanakman it Espiritu Santo, temed kaꞌilangan magsubli-subliyen, isaꞌun matulduꞌan i kumpur natingped kat ikseg it nakem it muꞌsa.

³² Ega maat kaꞌilangan nga magdenga-denganen i magꞌampang i mga pagpanakman ngaytu it Espiritu Santo, ka magkapaaran nira nagay sadili nira. Ega subuk pagpapulpugun.

³³ Sabap Ampuꞌang Diyus, ega magpabetang-betang it kaguluwan, in daꞌga kaꞌimbengan baw kaꞌayusan.

³⁴ Ta, subung nat pagsunudun it muꞌsang mga taawan it Ampuꞌang Diyus, kaꞌilangan ega timingeg i mga babay ka ega pagpaꞌintulutan sira nga mampang in duꞌut katingpedan it kadakel nga magsamba. Ka subung na it inaat duꞌun it mga urdin, kat sakep sira it lalaki.

³⁵ In beteꞌ may ingkut nira, ingkutun mana duꞌut asawa nira in duꞌun na sirat balay, sabap in mampang kanya kat sarungaan it kadakel nga nagtingped, kaꞌeyaꞌ-eyaꞌ.

³⁶ Ayaw kamu nat panadili. Unuytu, kamu i puꞌun it ampang ngaytut Ampuꞌang Diyus? U in daꞌga, unu, kamu lamang i inabut it ampang ya ngaytu?

³⁷ In beteꞌ pagpikiren it maski siyu nga inildawan kanya it kakayaan nga pagpanakman it ipagpaꞌrut it Ampuꞌang Diyus duꞌut kadakel, u in pagpikiren ya nga taw kanya nga pagpadisiran it Espiritu Santo, kaꞌilangan nga kilalaen ya nga, ipiyagsurat ku ngaytu, ipagꞌurdin it Ampuꞌan.

³⁸ Iyan ega magkilala kaytu, ega gasiꞌ kilalaen kanya.

³⁹ Aypaꞌ, mga sulsug ku kat pamayaꞌ, paꞌresan mi nga panakman kamu it ipagpaꞌrut it Ampuꞌang Diyus duꞌut kadakel. Temed ega naga paaren mi i mampang it belag-belag nga ampang nga ega naꞌadalan.

⁴⁰ Temed gasiꞌ buwaten mi i muꞌsang bagay kat tamaꞌ baw maꞌayus nga pabetang-betang.