1 Corinto 13 - Tagbanwa

Piyakaꞌimpurtantiꞌ kat mga magpamayaꞌ i kamatuudan nga kararas

¹ Maski na maat magkaꞌampang aku nat belag-belag nga ampang it taw situt sinirungat langit, it maski ega naꞌadalan ku, u maski ampang na it mga anghil, in talagang ega pay raras ku it masigkataw ku, iyan nga mga ampang ku, egay kapulusan. Subung na lamang it tingeg it mga sarabagen nga pagsabagen it sardak nga sabag.

² Subung naga, maski beteꞌ binggayan aku nat kakayaan nga pagpanakman it ipagpaꞌrut it Ampuꞌang Diyus duꞌut kadakel, baw pagtangkeden ku nay muꞌsang ipiyagtagu-taguꞌ yat tagnaꞌ nga kayti ipiyaꞌrut ya na, maski gasiꞌ magkaꞌrutan ku nay kumpur magkaꞌrutan it taw pasar it Ampuꞌang Diyus, baw subray basta i pamayaꞌ ku nga maski bukid, magkapaꞌugad ku na, temed ega nagay raras kut masigkataw ku, talagang taw aku nga egay kapulusan.

³ U in beteꞌ ipamgay ku na i muꞌsang kusas ku nga pakaꞌnen ku i mga makukuriꞌ, baw ibgay ku beteꞌ i bilug ku kat mga kalaban ku nga antengen nira sabap it pamayaꞌ ku, in talagang egay kararas ku ngaytu, ega nagay mapulus ku nga kagayenan.

⁴ Ka talagang iyan kararas ngaytu nga paꞌaaten, mapiyalulus baw maꞌildaw. Ega na maꞌinggit, ega na malandi-landi u mapiyasubraꞌ-subraꞌ.

⁵ Ega na buwal, ega na sadiling kaꞌirgan lamang i pagpikiren, ega na makuꞌiseg, baw madaliꞌ nga pasinsiyaen i karaꞌe-raꞌetan nga pagbuwaten it beken kuntraꞌ it kanya.

⁶ Baw ega na magkasagyaan i buwat nga maraꞌe-raꞌet in daꞌga yanay magkasagyaan, buwat nga magayen nga uyun kat kamatuudan.

⁷ Ka in talagang pagrarasan tay maꞌiba ta, ega na abigwaren tay binwat nirang kamaliꞌ, masagyang pakimatuudun i magayen pasar it kanira, baw maseked-seked i pagꞌinawar nga subrang manggayen i adat nira kat pagdadarapaꞌen. Talagang in maratuudan i kararas ta, temeꞌteꞌ seked kaꞌnu-kaꞌnu maski unu nga pagmalasakitan it nakem i mabut.

⁸ Talagang egay kaꞌawaꞌan it kararas ngaytu. Ega subuk mga kakayaan ngaytu nga ipagꞌildaw it Espiritu Santo. Ka mabut i aldaw nga maꞌawaꞌ i kakayaan nga pagpanakman it ipagpaꞌrut it Ampuꞌang Diyus duꞌut kadakel. Subung naga i magkaꞌampang it belag-belag nga ampang nga ega naꞌadalan. Maski kakayaan ngayan nga kiyaꞌrutan nga ipagbegay it Ampuꞌang Diyus pasar it mga pabetang-betang ya kat timpu ta ngaytu, mabut i aldaw nga ega na kaꞌilangan.

⁹ Sabap mga magkaꞌrutan ta ngaytu, kurang paꞌ. Baw maski pagpanakman ta it ipagpaꞌrut it Ampuꞌang Diyus duꞌut kadakel, ega paꞌ ipiyaꞌrut yay muꞌsa.

¹⁰ Temed yay matuud, pagꞌabut it kakumplituwan it muꞌsa ngaytu, maꞌawaꞌ naytu i subuk ega paꞌ ngaytu kumplitu.

¹¹ Subung tu it pandakulaꞌ it taw. Ka iyan waꞌwaꞌ tami paꞌ, ampang pat waꞌwaꞌ i ampang ta. Subung naga i pikir ta baw pangataldengan ta. Temed iyan gurang tami na, naꞌawaꞌ nay adat paꞌ it waꞌwaꞌ.

¹² Kayti subung it waꞌwaꞌ tami paꞌ nga ega paꞌ ustuꞌ i magkasepsepan pasar it mga bagay it Ampuꞌang Diyus. Kabilangan ya, subuk magpanalamin ta duꞌun it ega na maꞌyag nga salamin. Temed talagang mabut i aldaw nga meyag tu nga muꞌsa ka maꞌawaꞌ i muꞌsang ipagkalukug it kasepsep. Kat iting timpu maꞌaten i kaꞌustuꞌang kasepsep, subung nagat kasepsep it Ampuꞌang Diyus it aten.

¹³ Aypaꞌ kayti, may tulung bagay nga magpaneꞌteꞌ kat mga taawan it Ampuꞌang Diyus. Uꞌna, pamayaꞌ baw pagsarig tat kanya nga iribri ya kita nga matuud. Ikadwa, magꞌuꞌunay nga paniguru tat egay kaskedan nga kagayenan nga maꞌaten duꞌun it langit. Baw ikatlu, kamatuudan nga raras it esa may esa. Temed iyan talagay piyakamataꞌas kat tulu ngaytu, kararas na ngaytu, ka manupusan talagaytu.