1 Corinto 11 - Tagbanwa

¹ Eeꞌ baꞌ, guruun mi i aken nga adat ka, aku, pagguruun kuy adat ni Cristo.

Panulduꞌ pasar it in unuy bagay it mga babay kat pagsamba nirat Ampuꞌang Diyus

² Ta kayti, magayen i buwat mi nga, kat muꞌsang mga bagay, pagtulusun mi i ipiyagtulduꞌ kut imyu, baw pagsunudun mi.

³ Takaꞌ, itu pay ireg ku nga masepsepan mi nga, piyakaꞌulu it kada lalaki, si Cristo. Piyakaꞌulu gasiꞌ it babay i lalaki, baw Ampuꞌang Diyus, kanyay piyakaꞌulu ni Cristo.

⁴ Aypaꞌ iyan lalaki nga magpanalangin kat sarungaan it kadakel, u magpaꞌrut it mga ampang nga ipiyanakem it Ampuꞌang Diyus it kanya, in beteꞌ buwaten ya it may yumyum it rupa, talagang pagtibabaꞌen ya i piyakaꞌulu ya nga si Cristo.

⁵ Temed in beteꞌ may esang babay nga magpanalangin u magpaꞌrut gasiꞌ it mga ipiyanakem it Ampuꞌang Diyus it kanya, in buwaten ya it egay yumyum it rupa ya, intuntis nga pagtibabaꞌen ya i lalaki nga piyakaꞌulu ya. Egay piyagbelagan it egay yumyum ya baw tiyales i buꞌlug, subung nagat mga babay nga ega magayen i adat.

⁶ Eeꞌ baꞌ, in beteꞌ ega magꞌireg payumyum i esang babay, patales na lamang kanya. Ta, it kaꞌeyaꞌ-eyaꞌ it mga babay i patales u pabuꞌlug it pagpakiyasan na, dapat nga may yumyum it rupa nira in magtingped kamu.

⁷ Ka simpri ega mapakay nga may yumyum it rupa it lalaki in magtingped kamu sabap, kanya, ladawan it Ampuꞌang Diyus baw duꞌut lalaki matanyag i kabantugan it Ampuꞌang Diyus ngaytu. Temed iyan babay, dapat nga may yumyum it rupa sabap, duꞌut babay, kaꞌilangan matanyag i kabantugan it lalaki.

⁸ Ka daꞌga baꞌ, iyan giyuna it Ampuꞌang Diyus i uꞌna ngayting lalaki baw babay, ega garing kat babay i lalaki in daꞌga iyan babay i gimnaring kat lalaki.

⁹ Baw ega gasiꞌ kat ikagayen baw ikasagya it babay giyuna it Ampuꞌang Diyus i lalaki, in daꞌga kat ikagayen baw ikasagya it lalaki giyuna ya i babay.

¹⁰ Aypaꞌ in magtingped kamu kaꞌilangan may yumyum it rupa it babay, katandaꞌ it pagkilalaen nga piyakaꞌulu ya i lalaki, baw kat ikasagya gasiꞌ it mga anghil.

¹¹ Takaꞌ kat pabetang-betang it Ampuꞌan, kaꞌilangan it babay i lalaki, baw kaꞌilangan gasiꞌ it lalaki i babay.

¹² Eeꞌ baꞌ, nga garing nga matuud i uꞌnang babay kat lalaki temed, garing it iting timpu, egay lalaki nga daꞌga ipiyanganak it babay. Temed Ampuꞌang Diyus talaga i garing it muꞌsa.

¹³ Aypaꞌ kamu na i mukuman in tamaꞌ nga pagbuwaten u ega in magpanalangin duꞌut Ampuꞌang Diyus i esang babay kat sarungaan it kadakel it egay yumyum it rupa ya.

¹⁴ Daꞌga baꞌ singkadan tang lagi nga kaꞌeyaꞌ-eyaꞌ it lalaki i magpaꞌabwatay it buꞌuk,

¹⁵ temed in kat babay, kat ikabantug ya? Kasasagyaan it Ampuꞌang Diyus kat mga babay i buꞌuk nga abwatay, ka yay ipiyagbegay yat kanira nga bilang magꞌuꞌunay nga yumyum. Subraꞌ na in magtingped kamu kat adapan ya, kasasagyaan ya i may yumyum it rupa it mga babay.

¹⁶ Ta, in beteꞌ may magꞌireg paꞌ pakidaꞌeg, nga baliwalaꞌen i pagyuyumyuman i rupa it babay in magtingped, itu lamang i masugid ku nga, adat ngayang atkayan, belag talaga it ipagpanulduꞌ namen baw belag it pagꞌadaten it muꞌsang mga magpamayaꞌ nga beken, maski ari.

Panulduꞌ pasar it tamaꞌ nga pagbuwat it pagdemdem it kamataynen ni Jesus

¹⁷ Iyan siꞌ i sangpiten ku kayti. Ega maat mapakay nga tuꞌgudun ku kamu kat ituꞌun ngaytu, ka iyan pagtingped mi nga magsamba, ega maat kat ikagayen in daꞌga kat ikaraꞌe-raꞌet.

¹⁸ Ka uꞌna-uꞌna ya, nabaritaꞌan ku nga in magtingped kamu nga magsamba, ega magꞌurunyun kamu ka, buwat it beken, pagbidaꞌen nira i maꞌiba nira. Subuk pagpakimatuudun kuytu nga barang may kamatuudan.

¹⁹ Sabagay ega matuduꞌ it kitang taw i atkaytung pagbuwaten. Temed, maski atkayan, may pakinabang ya naga ka matanyag in siyu talaga i may kamatuudan nga pamayaꞌ nga pagsagyaan it Ampuꞌang Diyus.

²⁰ Ta, in magtingped kamu nga pagbuwaten mi i pagsamba ngaytung pagdemdem it kamataynen it Ampuꞌan, alaid kat nakem mi i pagpapuntuꞌan ya. Ega kamataynen it Ampuꞌan i kat nakem mi,

²¹ in daꞌga sadili mi lamang nga kaꞌirgan i pagpikiren. Sabap iyan beken, magꞌuꞌna-uꞌna nat kumaꞌen baw inum nga daꞌna magdenga-denganen, kaꞌen baw inum nga daꞌna pagpatngen. Aypaꞌ mamaglangu nay beken, iyan beken pamaggetmanan.

²² Unu baꞌ, egay sadili mi nga balay nga duꞌun i kaꞌnan mi baw imnan? Unuytu, pagraꞌwayen mi i mga taawan it Ampuꞌang Diyus? Ka ungayan, pagꞌeyaꞌen mi i mga kaꞌibaan mi nga makukuriꞌ asan nga ega taribunus i magkataban nirang pangaꞌen. Ta, unu yan i buwaten ku kayti, tuꞌgudun ku kamu? Talagang ega. Ega maat tuꞌgudun ku kamu.

²³ Saꞌupun ku siꞌ i panulduꞌ garing duꞌun it Ampuꞌan, nga ipiyangadal it aken baw ipiyangadal kut imyu it tagnaꞌ pasar it pagbuwaten nga pagdemdem it kamataynen ya. Iyan delem nga idiyagang na duꞌun it mga kuꞌimatay it kanya i Ampuꞌan nga si Jesus, iyan mamagkaꞌen na sira, kimnuꞌmit kanya it tinapay.

²⁴ Pagkakuꞌmit piyasalamatan ya duꞌut Ampuꞌang Diyus, bawnga biyagiꞌ ya. Pagkabagiꞌ maat ya, “Itu ngaytu, bilug kuytu nga buwaten nga salisi kat ikaribri mi. Buwaten mi tu nga pirmi nga pagdemdem mi it kamataynen ku.”

²⁵ Pagkatupus it kaꞌen nira singkel ya i iꞌimnan. Maat ya, “Rugud it iꞌimnan ngaytu, keseg it baꞌgung pakiꞌupakat it Ampuꞌang Diyus kat katataawan nga egay beken nga keseg ngaytu in daꞌga sadili ku nga duguꞌ nga ipaturuꞌ ku. Kada imnun mi tu, buwaten mi nga pirmi nga atkaytu nga pagdemdem mi gasit aken.”

²⁶ Sabap kada kumaꞌen kamu it tinapay baw minum kamu it atkaytung pamwat, talagang ipagtanyag mi i kamataynen it Ampuꞌan seked it saꞌup siꞌ nga paꞌasitu ya.

²⁷ Aypaꞌ ka in siyu-siyu nga gumuru it ega magayeng adat it beken asan in magkaꞌen baw magꞌinum it pagdemdem ngaytu, talagang ega bagay it ega basta-bastang pagpapuntuꞌan kaytu. In atkayan i buwat nira, talagang ukuman it kanira, subung nagat ukuman nga ibetangan it mga minimatay it Ampuꞌan.

²⁸ Aypaꞌ ka inturun mi in magꞌuꞌunu kumaꞌen it tinapay baw minum it pagꞌimnun nga pagdemdem it kamataynen it Ampuꞌan.

²⁹ Sabap in siyuy kumaꞌen baw minum it ega pagꞌintindiyen ya i mga kaꞌibaan ya nga sang kabilu-bilugan, ukuman nga panriga it Ampuꞌang Diyus i pagꞌangutun ya kayan.

³⁰ Baw subuk nagpapuꞌun na asat imyu i panriga ngaytu, nga dakel asat imyu i malulubay baw masasarut, baw may miyatay paꞌ nga beken.

³¹ Takaꞌ in maat pagꞌintindiyen tat magayen i maꞌiba ta, simpri ega mabetanganan tami it Ampuꞌan it ukuman.

³² Temed in sakaliꞌ nga pagbetanganan tami it Ampuꞌan it ukuman, pagtaldengen ya lamang yan kita, isaꞌun daꞌtami makaꞌuyut it beken nga mga taw nga rigaen asan it ipangukuman it banwa.

³³ Aypaꞌ ka, mga sulsug ku kat pamayaꞌ, in magtingped kamu nga pagbuwaten mi i pagdemdem it kamataynen it Ampuꞌan, kaꞌilangan paltegan mit magayeng adat i maꞌiba mi.

³⁴ Baw iyan mga pagkaraꞌnen nga dakulay pagkaꞌnen, magayen duꞌun lamang it sadili mi nga balay i buwatan, ega ipagdengan it pagbuwateng pagdemdem it kamataynen it Ampuꞌan, isaꞌun ega ukuman nga panriga i baraꞌan it pagtingped mi ngaytu. Ta, pasar gasiꞌ it beken nga mga bagay, ayusun ku mana pagꞌabut ku asan.