1 Corinto 10 - Tagbanwa

Bawal talaga i pakiragiꞌ it pagkaraꞌnen nga belag it Ampuꞌang Diyus i pagsambaen

¹ Ka ireg ku, mga sulsug ku kat pamayaꞌ, nga masepsepan mi i kaꞌulugan it nagꞌabut kat mga kasubung tami nga taawan it Ampuꞌang Diyus kat timpu ni Moises. Sira nga muꞌsa, pagꞌulngan it kunum nga ipiyagꞌildaw it Ampuꞌang Diyus it kanira. Sira gasiꞌ nga muꞌsa, kat keseg it guna ya nakadipag it dagat nga pagpangaranan it Dagat nga Madarag.

² Kabilangan ya, subuk nabawtisan sirang muꞌsa duꞌut kunum ngayti baw duꞌun it dagat, tandaꞌ it mga manigsunud sira ni Moises nga magpanguꞌna it kanira.

³ Kat keseg it guna it Ampuꞌang Diyus binggayan sirang muꞌsa it makaꞌen nira, iyan duꞌun sirat rugar nga kapupuyangtan.

⁴ Atkayan naga i maꞌinum nira. Subung nagat kaꞌsa ngayti nga piyabugasꞌas i danum duꞌun it batu nga duꞌut Horeb. Batu ngayti, ladawan ni Cristo ngaytu nga bilang keseg nira nga magꞌiba-iba baw magtatarima nga pirmi it kanira.

⁵ Takaꞌ maski dakulay nalabayan nira ngaytung ildaw it Ampuꞌang Diyus, kadaklan nira, ega siyagyaan ya. Aypaꞌ ka natariwanak nay mga tuꞌlang nira duꞌut rugar nga kapupuyangtan.

⁶ Iyan mga nagꞌabut ngaytu nga atkaytu, paꞌimbandaytu it aten isaꞌun ega ipadaꞌeg kat nakem tami i pagsumbayaꞌ it mga bagay nga maraꞌe-raꞌet, subung it siyari nirat buwat.

⁷ Kamu gasiꞌ, paꞌalaidan mi i pagsamba it mga pagbete-beteꞌen nga diyus, nga yay kasalaꞌan it beken nga mga taawan ngaytit Ampuꞌang Diyus it tagnaꞌ. Ka magbebtang duꞌun it kasuratan nga, kat pagsamba nirat pagbete-beteꞌen nga diyus nira, “Nagkaraꞌnen-karaꞌnen i mga taw baw namagꞌinum-inum, langkuy it nagkasagyaan sirat maraꞌway nga pagkasagyaan.”

⁸ Baw gasiꞌ ayaw ta nat pamakun duꞌun it ega asawa ta, nga subung it binwat it beken nga mga taw ngayti it tagnaꞌ. Sabap it buwat nira ngayti duwang puluꞌ may tulung ribu i natay it sang aldaw lamang, panriga it Ampuꞌang Diyus it kanira.

⁹ Kaꞌilangan gasiꞌ, ega sukda-sukdanan tami i Ampuꞌan, nga subung gasit binwat it beken nga mga kaꞌibaan it mga taw ngayti, nga yay napuꞌnan it simnari sirat patay sabap siyari sirat tundaꞌ it mga dalitan nga dukul.

¹⁰ Ega gasiꞌ mamasul kamu, nga subung it binwat gasiꞌ it beken nga mga kaꞌibaan nira, nga egay beken nga liꞌwan ya, piyuuꞌ sira it anghil nga mamumuuꞌ.

¹¹ Nagꞌabut tu it kanira nga bilang paꞌimbanda it kadakel, baw isiyurat isaꞌun paꞌimbandaan tami gasiꞌ, kita nga mga inabut na it sauryan nga timpu.

¹² Aypaꞌ ka magtitiyakap i maski siyu nga, kat nakem ya, pagsisiguruun nga nakatindeg na kanya kat pamayaꞌ nga magꞌuꞌunay, ka mabwa-mabway barang kanya gasiꞌ i daꞌgen ni Satanas baw maꞌulug kat kasalaꞌan nga dakulaꞌ.

¹³ Temed ega pay sukdan nga miyabut it imyu nga daꞌga paglabayen gasiꞌ it masigkataw mi. Temed magkasiguru mi i tabang it Ampuꞌang Diyus nga ega ipaꞌintulut ya nga sukdanan kamu it subraꞌ na it kaya mi. In daꞌga, pagꞌabut it sukdanan kamu, begayan ya kamu it keseg nga ipagkaꞌindaꞌeg it sukdan ngaytu.

In ega Ampuꞌang Diyus i pagsambaen, egay belag, mga maraꞌe-raꞌet

¹⁴ Aypaꞌ ka, mga pagmaꞌalen ku, paꞌalaidan mi na i pagsamba it mga pagbete-beteꞌen nga diyus.

¹⁵ Mapipikir kamung mga taw. Aypaꞌ pikiren mit magayen in tamaꞌ u ega i pagꞌaaten ku ngaytu.

¹⁶ Ka daꞌga baꞌ in magpasalamat tami duꞌun it Ampuꞌang Diyus it pagꞌimnun in magꞌapunan tami, pagpaꞌiguꞌan ya, sang kanake-nakeman tami nga magpakiꞌiba-iba it ki Cristo ka may kaꞌuyutan it kagayenan nga maꞌaten sabap it duguꞌ ya nga ipiyaturuꞌ? Baw in magkaꞌen tami gasiꞌ it tinapay nga pagbagiꞌ-bagiꞌen, subung naga, sang kanake-nakeman tami nga magpakiꞌiba-iba it ki Cristo ka may kaꞌuyutan it kagayenan nga maꞌaten sabap it bilug ya nga ipiyagsalisi.

¹⁷ Paribasay sangba-sangbatu i tinapay, lamang dakel tami, kabilangan ta, sang kabilu-bilugan lamang sabap magpakikaꞌen tami it sangba-sangbatu ngaytu nga tinapay.

¹⁸ Demdemen mi gasiꞌ i mga Israelita it tagnaꞌ, iyan mga Israelita kat duguꞌ, ega kat pamayaꞌ. Daꞌga baꞌ iyan mamagkaꞌen sira it mga ipagsalisi nga ipagpasalamat duꞌun it papangantengan, magpaꞌuyun sira it pagsamba it Ampuꞌang Diyus nga pagpasalamatan?

¹⁹ Ta, barang pagpikiren mi na nga yay pagpapuntuꞌan it pagꞌaaten ku ngaytu, kamatuudan naga i mga pagbete-beteꞌen nga diyus baw ega basta-basta i pangaꞌen nga ipagsamba it mga taw duꞌut kanira.

²⁰ Temed ega. Ipagpaꞌyag ku ngaytut imyu nga, iyan mga ipagsamba nira, nga kat pananu-tanud nira, mga diyus i pagsambaen, egay belag, mga mararaꞌe-raꞌet, nga mga taraꞌgen ni Satanas. Talagang ega ireg ku nga magpaꞌuyun kamu it pagsamba it mga taraꞌgen ni Satanas.

²¹ Ka talagang ega mapakay nga paꞌuyut kamu it pagꞌimnun baw pagkaꞌnen nga pagdemdem it ega basta-bastang kamataynen it Ampuꞌan, baw pakiragiꞌ gasiꞌ it pagkaraꞌnen nga ipagsamba nirat mga taraꞌgen ni Satanas.

²² Ta, it maꞌimun i Ampuꞌang Diyus, unu, ireg tami nga angutun i iseg ya? Unu, subray aten nga kakayaan it kanya?

Maski mga bagay nga ega biyawal it Ampuꞌang Diyus, magayen ega buwaten ta in yay ipagkasalaꞌan it maꞌiba ta

²³ Magꞌaat yan i beken, “Mapakay ta nga buwaten i maski unu, basta ega biyawal it Ampuꞌang Diyus.” Sabagay na, temed ega muꞌsa ngaytu, ipagkagayen u ipagkapakseg it pamayaꞌ.

²⁴ Sana ega sadiling ikagayen i tulusun ta, in daꞌga in unuy kat ikagayen it maꞌiba ta.

²⁵ Aypaꞌ, kaꞌnen mi i maski unu nga magkaꞌalang mi duꞌut tindaꞌan it karniꞌ. Ega sasawun mi i nakem mi u mingkut in giyamit kat pagsamba it pagbete-beteꞌen nga diyus u ega.

²⁶ Sabap inaat duꞌun it ampang it Ampuꞌang Diyus nga isiyurat, “Iyan banwa baw muꞌsang mga betang ya, Ampuꞌang Diyus i garing.”

²⁷ In beteꞌ imbitaren kamu nga pakikaꞌen duꞌun it balay it esang taw nga ega magpamayaꞌ, baw ireg mi gasiꞌ nga paragiꞌ, kaꞌnen mi i maski unu nga itarakan it imyu. Ega sasawun mi i nakem mi u mingkut in giyamit kat pagsamba it pagbete-beteꞌen nga diyus u ega.

²⁸ Temed in may maat it imyu, “Ipiyagsalisi baytu nga ipiyagsamba it pagbete-beteꞌen nga diyus,” ta, ayaw kamut kaꞌen kayan, kat sanguꞌ mi it nagꞌaat ngayan it imyu, isaꞌun egay malibegan it pikir ya.

²⁹ Eeꞌ baꞌ, pikiren mit magayen i nakem it beken, ega lamang sadili mi. Ka maski ega malibeg i pikir mi in kaꞌnen mi, unuy kapulusan in malibeg i pikir it maꞌiba mi ngayti?

³⁰ Temed barang may magꞌaat, “In talagang pagpasalamatan ku duꞌut Ampuꞌang Diyus i pagkaꞌnen ku, unuka basulun aku paꞌ sabap it iyan piyasalamatan ku na duꞌun it Ampuꞌang Diyus?”

³¹ Ega maat magꞌaꞌatkayan. Sana, kat muꞌsang pagbuwaten mi, in magkaꞌen, magꞌinum, u maski unu, magꞌintur nga kat ikabantug nga muꞌsa it Ampuꞌang Diyus.

³² Inturun mi nga egay buwaten mi nga bilang ipagkaꞌarbeng it taw kat pamayaꞌ it ki Cristo, Judio u daꞌga, baw egay buwaten mi nga ipagkaranggaꞌ it pamayaꞌ it mga kasubung mi nga namayaꞌ na.

³³ Guruun mi i adat ku, ka aken, iyan i pagpaꞌresan ku, mabgayan it ikasagyat nakem i muꞌsang mga taw kat muꞌsang pagbuwaten ku. Ega maat pagtulusun ku i sadili ku nga ikagayen in daꞌga iyan ikagayen it kadaklan, isaꞌun sana maribri sira kat panriga it Ampuꞌang Diyus sabap it mga kasalaꞌan nira.