ZEPHANIAH 2 - Hakcipta - Biatah Bidayuh

Pimite Bada Marik Pimudip Pari ka Tapa

¹ Ngubah adŭp ngan, angān bangsa adi dŭh mangŭh,

² diŭ so angān dog poh mun aping dog poh sabak, diŭ so bisā baji TUHAN mandŭg ka angān, diŭ so angān dog nyatŭk baji-I adi keya ka apui adi bijagu.

³ Pari ka TUHAN, sopŭrŭg ngan adi di rais ati adi pirapat adŭp ngan, adi tunda pesan-I. Ndai kayuh adi batur, ka pirapat adŭp ngan di sirung jawin TUHAN. Kadŭ angān dapŭd pirupas adŭp ngan so ukum di andu anŭ adi ngga TUHAN kiren baji-I.

Pinyusah Nyatŭk Bangsa Bangsa adi Rŭŭ maning Israel

⁴ Mating daya re dŭm di kupo Gaza. Ashkelon re dog tagan. Daya Ashdod re dog pibu darŭm sitangah andu, ka daya Ekron re dog pibu so kupo ngara.

⁵ Mbŭh payah inŭh angān daya Philistine, angān daya adi rŭŭ di bŭngŭn rawŭt. TUHAN mbŭh miratak ukum di tunduh ngan. Ayŭh re pirabur angān, ka ndi naan mating gŭh angān re dŭm.

⁶ Tarun tana ngan di bŭngŭn rawŭt re jadi tarun tana kupai; bari ngga kandang biri re dog ndai diginŭ.

⁷ Daya Judah adi babŭ udip re ngisi tarun tana ngan. Ngara re bada kaban biri ngara man kupai diginŭ ka bŭŭs di ramin Ashkelon. TUHAN adi Tapa ngara re agi ngga ngara ka bada ngara pari udip mujur.

⁸ TUHAN Bisa-pŭrŭg nang, “Aku mbŭh dingah daya Moab ngga daya Ammon ngamun ka kinuas daya Ku ka ngangŭn adŭp-i re sirapas tana ngara.

⁹ Ngga adŭn Ku TUHAN adi udip, adi Tapa Israel, Aku bipayu Moab ngga Ammon re dog pirabur mun Sodom ngga Gomorrah. Rais rais anŭ re jadi tarun yŭn prigi garo ka adu adu jadi tibawang, adi mbŭh birasu ngga uduh. Bara daya Ku adi babŭ udip re pirinda ngara ka sirapas tana ngara.”

¹⁰ Simŭnŭ inŭh daya Moab ngga daya Ammon re dog ukum amai uap-sambuh ngara ka amai ngara ngamun daya TUHAN Bisa-pŭrŭg.

¹¹ TUHAN re pitaru ngara. Ayŭh re pirandŭk tapa tapa di ong, ka komŭnŭ barang naan daya re nyambah Ayŭh, masin masin di rais adŭp-i.

¹² TUHAN re bada gŭh daya Ethiopia dog siŭ.

¹³ TUHAN re pakai kuasa-I ngga pirabur Assyria. Ayŭh re bada kupo Nineveh jadi tibawang, tarun tana-pajam adi dŭh biyŭn piin.

¹⁴ Anŭ re jadi tarun yŭn kaban kaban biri, sapi, ngga barang masam dāng guring. Manuk bo re rŭŭ di tibawang anŭ ka re prikuwŭk minyu di pinjan ramin tibawang anŭ. Manuk manuk kak re prikāk adŭp ngara di pinutug pinutug tiban. Kayuh sedar ramin-i re abo dog kadi.

¹⁵ Anŭ inŭh kayuh adi re jadi di kupo adi ngangŭn kuasa-i ka pikir adŭp-i siramat. Daya darŭm kupo anŭ pikir kupo anŭ kupo adi siabo bās di ong. Munki masam pajam tarun anŭ re, tarun adi re yŭn dāng dāng tarun rŭŭ! Barang naan daya adi murah anŭ re bu tikŭnŭd.