ZECHARIAH 9 - Hakcipta - Biatah Bidayuh

Ukum di Tunduh Bangsa Bangsa adi Bisindŭk ngga Israel

¹ Ati inŭh pinganang TUHAN: Ayŭh mbŭh miratak ukum yŭn rais Hadrach ka yŭn kupo Damascus. Dŭh-i tibaran tibaran-asar Israel adŭ, pak sindŭ kupo Syria gŭh tung TUHAN.

² Hamath, adi bibaat ngga Hadrach, tung TUHAN gŭh, ka simŭnŭ gŭh kupo Tyre ngga kupo Sidon, ngga sopŭrŭg pimandai-i.

³ Tyre mbŭh pijog kuta kuta yŭn adŭp-i ka mbŭh nugung raru bagŭ pirak ngga mas ngga bada-i jadi kayuh saja mun sapok di aran!

⁴ Pak TUHAN re taban ngga bu sopŭrŭg kayuh adi-i biyŭn. Ayŭh re taran pinyikaya-i ka darŭm rawŭt, ka kupo anŭ re dog sigot ndŭg ka rŭpŭg.

⁵ Kupo Ashkelon re kiris kayuh anŭ ka re taru. Kupo Gaza re kiris-i ka re kinyam sangsara bās. Simŭnŭ gŭh re Ekron, ka pingarap-i re asur. Raja di Gaza re dog siŭ, ka Ashkelon re dog tagan.

⁶ Daya bangsa adi bigaur re rŭŭ di Ashdod. TUHAN nang, “Aku re pirapat sopŭrŭg daya Philistine anŭ adi sambuh.

⁷ Ngara re dŭh tia man dagin bigaur ngga deya, bait pinguman adi bŭkŭn adi dog nagah. Sopŭrŭg daya adi siramat re sua jadi daya Ku ka jadi keya ka manak tibaran-asar Judah. Ekron re sua jadi daya Ku, mun daya Jebus gŭh.

⁸ Aku re jaga tana Ku ka dŭh re bada tibaran bara soldadu mutas-i. Aku dŭh re tia tandah pimritah adi dŭh biyŭn masi kinanyuh daya Ku. Aku mbŭh kiris munki daya Ku sangsara.”

Raja adi Re

⁹ Gaŭn, gaŭn, daya Zion! Nyirais amai gaŭn, angān daya Jerusalem! Tingga, raja ngan mandŭg! Ayŭh mandŭg ngga bragah ka pimanang, pak pirapat adŭp-i nunggang kaldi ngga anak kaldi.

¹⁰ TUHAN nang, “Aku re kadi krita krita kuda so Israel ka kadi kuda kuda so Jerusalem; bawŭh adi dog pakai di tika perang re dog pirusak. Raja ngan re ndai damai di dupan bangsa bangsa; bayah pritah-i so rawŭt ndi ndŭg rawŭt andi, so Yang Euphrates ndŭg bŭngŭn ong.”

Pinyipari Daya Tapa

¹¹ TUHAN nang, “Sabab simanya Ku ngga kuu adi dog natu ngga deya sadis, Aku re pirupas daya mu adi sangsara di rais adi yŭn ngara dog taran keya ka daya dog kurung darŭm rubang prigi adi badŭh.

¹² Mari, angān daya adi dog taran ka rais tami, angān adi madin biyŭn pingarap; mari ka tarun yŭn ngan adi siramat. Aku kidaan di angān madin, Aku re maras angān duwŭh rupet ngga berkat yŭn sopŭrŭg sangsara ngan.

¹³ Aku re pakai Judah keya ka bawŭh soldadu ka Israel keya ka reja-panah. Aku re pakai daya Zion keya ka pedang, ngga rawan daya Greece.”

¹⁴ TUHAN re pinandŭng adŭp-I di daya-I; Ayŭh re nimbak reja panah-I keya ka kijat. TUHAN Raja re mambak trompet; Ayŭh masang darŭm sabak ribut so siratan.

¹⁵ TUHAN Bisa-pŭrŭg re grindung daya-I, ka ngara re pirabur pinganyu ngara. Ngara re nyirais darŭm perang mun daya mabuk ka re piruah deya pinganyu ngara; deya anŭ re aman mun deya sadis dog ren di tunduh mija-sambah so makuk.

¹⁶ Kan andu anŭ mbŭh mandŭg, TUHAN re nyiramat daya-I, nimun pingingat-biri nyiramat kaban biri-i so nasip adi arap. Ngara re nyirinyak di rais TUHAN mun batuh brega di makota.

¹⁷ Munki masam kana ka ramus rais anŭ re! Ngara adi mara re bitambah bake bada gandom ngga wain-i.