ZECHARIAH 5 - Hakcipta - Biatah Bidayuh

Kiris Keya Ka darŭm Pŭmŭh Surat-Barun adi Mikabur

¹ Aku kimat dinge, ka kari ati aku kiris ndi surat-barun mikabur di au-tarun.

² Malaikat anŭ siken ani adi kiris ku. Aku nam, “Ndi surat-barun mikabur di au-tarun; surat anŭ prii mita ambu-i ka pat mita sitangah ramba-i.”

³ Komŭnŭ ayŭh nang di aku, “Di surat-barun anŭ agi dog nuris pangu yŭn ndi tarun tana rais ati. Di ndi parad surat-barun anŭ agi dog nuris nang sopŭrŭg pinaku re dog kadi so rais ati; ka di parad anŭ ndi agi dog nuris nang sopŭrŭg daya adi bipayu ngga aran adi kadong re dog taban ngga bu gŭh.

⁴ TUHAN Bisa-pŭrŭg nang adŭp-I re pait pangu anŭ ka ramin ramin sopŭrŭg pinaku ngga ramin ramin daya adi bipayu ngga aran adi kadong. Pangu anŭ re rŭŭ di ramin ramin ngara ka pirubuh-i.”

Kiris Keya ka Darŭm Pŭmŭh Ndi Naan Dayung darŭm Bakur

⁵ Malaikat anŭ tatŭng dinge ka nang, “Tingga! Agi kayuh bŭkŭn mandŭg!”

⁶ “Ani anŭ?” Aku siken. Ayŭh nam, “Anŭ bakur, ka rati-i inŭh dosa ndi tarun tana rais ati.”

⁷ Bakur anŭ biyŭn tŭtŭp adi dog ndai so timah singŭt. Darŭm aku pirati-i, tŭtŭp anŭ tipakat, ka diginŭ di darŭm bakur agi ndi naan dayung guru!

⁸ Malaikat anŭ nang, “Rati dayung ati inŭh udip ginaka.” Komŭnŭ ayŭh turak dayung anŭ ka darŭm bakur anŭ ka nutu-i ngga tŭtŭp anŭ.

⁹ Aku nyigura ka kiris duwŭh naan dayung mikabur tudu aku ngga urad adi bake mun urad manuk bangau. Ngara tambit bakur anŭ ka taban-i ngga bu.

¹⁰ Aku siken malaikat anŭ, “Kamaki ngara taban-i?”

¹¹ Ayŭh nam, “Di ka Babylonia, di yŭn ngara re pijog bari-sambah yŭn-i. Kan bari-sambah anŭ kamas dog pijog, bakur anŭ re dog na diginŭ yŭn-i dog nyambah.”