ZECHARIAH 13 - Hakcipta - Biatah Bidayuh

¹ “Kan tika anŭ mbŭh mandŭg,” nang TUHAN Bisa-pŭrŭg, “ndi sumbur piin re dog kuka ngga pibisig sesang sesang David ka daya Jerusalem so dosa ngara ngga pimudip ngara adi nyambah tibudo.

² Di tika anŭ Aku re kadi dŭn dŭn tibudo so rais ati, ka mating daya re ingat-i tia. Aku re kinating daya adi nang adŭp-i nabi ka re kinating pinyiraan daya nyambah tibudo.

³ Ka kambŭi agi daya ngandŭ minyu-binabi, sama ngga sindŭ adŭp-i re kidaan di ayŭh nang ayŭh dŭh siŭn dŭh dog nggen ukum kabŭs, sabab ayŭh nang adŭp-i minyu pinganang so TUHAN, pak ngga-i kadong. Kan ayŭh minyu-binabi, sindŭ sama adŭp-i re tabŭk ayŭh ndŭg ka kabŭs.

⁴ Kan tika anŭ mbŭh mandŭg, mating nabi re ngangŭn kayuh adi-i kiris keya ka darŭm pŭmŭh, bait ndai adŭp-i bada mun nabi, puan kah nēn piraka nabi adi piburuh ngga-i nipu daya.

⁵ Ayŭh re nang, ‘Aku dŭh nabi. Aku tukang teya. Sitŭkŭd umbur ku, aku taŭn biteya.’

⁶ Ka kambŭi daya siken ayŭh, ‘Ani tawan anŭ di sudo mu?’ Ayŭh re nam, ‘Tawan ati aku dapŭd di ramin jerā ku.’ ”

Pesan Bada Siŭ Pingingat-biri Tapa

⁷ TUHAN Bisa-pŭrŭg nang, “Burah meh, pedang, ka nyerang pingingat-biri adi nyiraja yŭn Ku! Siŭ ayŭh, ka kaban biri-i re mingare. Aku re nyerang daya Ku

⁸ ka di ndi tarun tana rais ati duwŭh-utung so taruh daya re kabŭs.

⁹ Ka Aku re suba utung adi taruh adi siramat ka re pibisig ngara mun pirak dog pibisig ngga apui. Aku re suba ngara mun suba mas. Ka ngara re bidua ka Aku, ka Aku re nam ngara. Aku re kidaan di ngara nang ngara inŭh daya Ku, ka ngara re ngaku Aku ati Tapa ngara.”