TITUS 3 - Hakcipta - Biatah Bidayuh

Urah Rakah Daya Kristen

¹ Kidaan di daya mu da dŭh kambŭt nundok di bara adi mritah ngga adi bikuasa, da nurut pinganang ngara, ka da sidia an ndai kana darŭm sopŭrŭg kayuh.

² Kidaan di ngara da dŭh kinarap ngamun tadŭ daya, pak udip darŭm damai buang pinyijerā, ka siraru duduh ngga sopŭrŭg daya.

³ Amai adŭp ta ko gŭh budo, dŭh an dingah pinganang, buang sarah. Ata ko jadi urun bagŭ masam pinyiripong ka bagŭ masam pinyiraan. Pimudip ta ko puno ngga dendam ka sina; daya tiru di ata ka ata tiru di daya.

⁴ Pak kan mandis ngga pinyirindu Tapa adi Pinyikudip ta dog pinandŭng,

⁵ Ayŭh nyiramat ata. Dŭh-i sitagar pingandai kana adi ata ko ndai, pak sitagar pinyirasi adŭp-I Ayŭh mbŭh nyiramat ata, ngga kuasa Roh Kudus, adi nggen di ata pinyibranak bauh ngga pimudip bauh darŭm-I ngu ata.

⁶ Tapa mbŭh ren Roh Kudus di ata ngga sibagŭ bagŭ-i so ka Jesus Kristus Pinyikudip ta,

⁷ isa ngga pinyirasi mandis-I ata bisa bamai ngga Tapa ka trima udip adi sawŭ adi tan adu adu adi ata harap.

⁸ Pinganang anŭ sawŭ. Aku raan kuu mbit bat di kayuh anŭ, isa sinadan adi sabah di Tapa bisa ngga siabo asŭng ngara pakai masā ngara ngga ndai pingandai kana buang adi biguna yŭn sopŭrŭg daya.

⁹ Pijo adŭp mu so karit adi budo, susud taris tayung-babuk adi ambu, kaii, ka birawan pasar ukum-adat. Kayuh anŭ dŭh biguna ka dŭh biyŭn rati.

¹⁰ Sikurang kurang-i an bakan piduwŭh kari daya adi nyibarai daya eklisia, ka dŭh tia bigaur ngga ngara.

¹¹ Kuu puan daya adi mun anŭ arap, ka dosa-i mbŭh kiren ayŭh sawŭ sarah.

Sikasŭn Pinyitayan

¹² Kan aku pait Artemas puan kah Tychicus ka kuu, suba ngga sibisa bisa mu mandŭg ka aku di Nicopolis, sabab aku mbŭh tatu re rŭŭ diginŭ di tipuh madud.

¹³ Ngga sibisa bisa mu turung Zenas, daya adi digŭng ukum-adat, ayŭh duwŭh Apollos di pimanu ngara. Bada ngara biyŭn sopŭrŭg kayuh adi ngara biguna.

¹⁴ Daya ta dŭh siŭn dŭh an birajar pakai masā ngara ndai kayuh kana, siŭn dapŭd turung daya adi sutok; pimudip ngara dŭh-i patut pimudip adi dŭh biguna.

¹⁵ Sopŭrŭg adi agi ngga aku pait tabi ka kuu. Nggen tabi ami di bara dingan ta adi sabah. Pinyirasi-mandis Tapa agi ngga sopŭrŭg ngan.