TITUS 2 - Hakcipta - Biatah Bidayuh

Ajar adi Batur

¹ Kuu dŭh siŭn dŭh ngajar kayuh adi birasŭk ngga ajar adi batur.

² Ngajar bara dari adi tuuh da tuuh tuuh darŭm aran pimudip ngara, mirati, ka pandai jaga adŭp ngara so pinyiripong adi sarah. Ngara an adu adu sabah di Kristus, rindu dingan, ka an biyŭn pinyitŭtŭd atin.

³ Simŭnŭ gŭh ngajar bara dayung adi tuuh isa urah ngara birasŭk ngga urah dayung adi bituan di Tapa. Ngara dŭh siŭn jadi pinapŭ puan kah pimabuk. Ngara dŭh siŭn dŭh ngajar kayuh adi kana,

⁴ siŭn ngara bisa nyiruton bara dayung adi mara da rindu banŭh ngga anak ngara,

⁵ pandai jaga adŭp ngara so pinyiripong adi sarah, ka udip bisig, ka jadi sawŭn adi kana adi nundok di banŭh ngara. Simŭnŭ, daya dŭh re bisa kinarap ajar so Tapa.

⁶ Simŭnŭ gŭh ngasu bara dari adi mara da pandai jaga adŭp ngara so pinyiripong adi sarah.

⁷ Darŭm sopŭrŭg kayuh, adŭp mu dŭh siŭn dŭh an jadi suto danding yŭn urah-rakah adi kana. Kuu dŭh siŭn dŭh an mbit bat di ajar mu, buang ngajar-i ngga atin tŭnggŭn.

⁸ Pakai pinganang adi dŭh daya ngamun, isa bara pinganyu mu mangŭh darŭm ngara dŭh biyŭn kayuh ngga kinarap ata.

⁹ Kidaan di bara urun da nundok di tuan ngara ka pimunos asŭng tuan ngara darŭm sopŭrŭg kayuh. Ngara dŭh siŭn rawan pinganang tuan ngara,

¹⁰ puan kah naku kayuh ngara. Pak kiren adŭp ngara siraru kana darŭm urah-rakah buang tŭtŭd, isa-i daya bisa muji ajar pasar Tapa adi Pinyikudip ta darŭm sopŭrŭg kayuh adi ngara ndai.

¹¹ Amai Tapa mbŭh pinandŭng pinyirasi mandis-I yŭn pinyiramat sopŭrŭg manusia.

¹² Pinyirasi mandis-I anŭ ngajar ata da pasan pimudip adi dŭh nanyam ka pinyiraan Tapa, ka da ata dŭh nurut pinyiripong ong. Di ong ati ata patut pandai jaga adŭp ta so pinyiripong adi sarah, an jujur, ka udip nanyam ka pinyiraan Tapa,

¹³ darŭm ata kajŭn andu adi biberkat anŭ adi ata harap, adi ngga bragah Tapa bās ta ngga Pinyikudip ta, Jesus Kristus, re tatŭng.

¹⁴ Ayŭh jugan adŭp-I yŭn ta, an nyiramat ata so sopŭrŭg arap ka ndai ata da jadi daya-I adi bisig adi-I sadi dapu ka adi graŭh an ndai kayuh kana.

¹⁵ Ngajar sopŭrŭg kayuh anŭ ka ngga sipuno kuasa mu ngatat ka nyibatur bara adi dingah kuu. Dŭhnyah bada daya dŭh bisaya di kuu.