TIBIRIK 8 - Hakcipta - Biatah Bidayuh

Pinŭbŭn Uba Bās

¹ Tapa dŭh kambŭt Noah ngga sopŭrŭg dāng adi agi ngga ayŭh di darŭm batra; ayŭh bada sabak poh, ka piin mupok simŭp.

² Rubang rubang piin di ribo tana, ka tiban tiban uba di rangit mbŭh bitŭŭp. Ujen ko.

³ Piin mupok simŭp darŭm 150 andu.

⁴ Ngga andu adi simŭng ju darŭm buran adi ju batra anŭ nyasang di darŭd di apan Ararat.

⁵ Piin tanŭ ka simŭp, ka ngga sibungas andu darŭm buran simŭng tibung tibung darŭd mbŭh tatŭng.

⁶ Ripas pat puru andu Noah kuka pinjan.

⁷ Ka piruah ndi manuk kak. Manuk anŭ dŭh pari, pak adu adu mikabur ndŭg ka piin mbŭh badŭh bandar.

⁸ Di tipuh anŭ gŭh, Noah piruah ndi manuk asang amai an puan sawŭ mbŭh simŭp kah bayuh piin,

⁹ pak amai piin gibabŭ agi di tunduh tana, manuk anŭ dŭh dapŭd tarun adi re-i yŭn mbap. Ayŭh mikabur pari ka batra, ka Noah nyapai tambit-i.

¹⁰ Noah kajŭn ju andu dinge ka piruah manuk asang anŭ dinge.

¹¹ Manuk anŭ pari ka yŭn-i ngga singumi andu taban dawŭn kayuh kanā di tukuk-i. So nŭ meh Noah puan nang piin mbŭh sawŭ simŭp.

¹² Ayŭh kajŭn ju andu dinge adi ngga-i piruah dinge manuk asang anŭ; kari ati manuk anŭ dŭh pari.

¹³ Kan Noah mbŭh 601 sawa umbur-i, di sibungas andu darŭm sibungas buran, piin uba mbŭh badŭh. Noah kadi tanja batra, ka tingga abong tarun, ka kiris tana mbŭh re an badŭh.

¹⁴ Ngga andu adi duwŭh puru-ju darŭm buran duwŭh, tarun tana sawŭ mbŭh badŭh bandar.

¹⁵ Tapa nang di Noah,

¹⁶ “Ruah meh so batra anŭ ngga sawŭn mu samŭn anak anak dari mu ngga bara sawŭn ngara.

¹⁷ Taban sopŭrŭg manuk ngga dāng ruah, isa ngara bisa papah ka ngisi ndi tarun tana.”

¹⁸ Jadi Noah ruah so batra taban sawŭn-i, samŭn anak anak dari-i ka bara sawŭn ngara.

¹⁹ Sopŭrŭg dāng ka manuk ruah so batra nanyam ka tibaran masam adŭp-i.

Noah Jugan Sadis

²⁰ Noah ndai ndi mija-sambah yŭn TUHAN; ayŭh tambit ndi pŭrŭng dāng ngga manuk adi bisig so barang masam-i, ka badang pŭrŭng pŭrŭng-i di tunduh mija-sambah anŭ ndu sadis.

²¹ Tapa mbŭh raru munos asŭng-I kan-I kadŭk dagŭn sadis anŭ, ka-i nang di adŭp-I, “Dŭh Aku re tia mangu ong sitagar kraja pingandai manusia; Aku puan so andu ngara gi-sŭ mara pikir-kira ngara taŭn mbŭh arap. Aku dŭh re tia pirusak tadŭ tadŭ kayuh adi udip, mun ati.

²² Sitŭkŭd ong agi, taŭn re agi tipuh nyipurun ngga tipuh ngatŭm. Ka re ari agi tipuh madud ngga tipuh paras, tipuh raga ngga tipuh birujen, sandu ngga singarŭm.”