TIBIRIK 7 - Hakcipta - Biatah Bidayuh

Uba Bās

¹ Tapa nang di Noah, “Mŭrŭt meh ka darŭm Batra ngga sopŭrŭg rawang mu; Aku puan kaŭs-i kuu sadi adŭ di ndi ong ong ati adi nundok di Aku.

² Tambit ngga adŭp mu ju pasang so barang masam dāng adi bisig ka ndi pasang adŭ so barang masam dāng adi kais.

³ Tambit gŭh ju pasang so barang masam manuk. Ndai simŭnŭ isa barang masam dāng ngga manuk bisa udip, ka papah dinge di ong.

⁴ Dŭm ju andu so madin Aku re bada andu ujen pat puru andu ngga pat puru ngarŭm, ngga pirusak sopŭrŭg kayuh adi udip adi Aku ko napa.”

⁵ Noah ndai sopŭrŭg kayuh nanyam pinyibada TUHAN.

⁶ Noah mbŭh nŭm ratus sawa umbur-i, di andu uba bās ngapuh ong.

⁷ Ayŭh ngga sawŭn-i, bara anak dari-i adi taruh madis ngga sawŭn ngara, samah mŭrŭt ka darŭm batra nyiramat adŭp ngara so uba bās.

⁸ Ndi dari ndi dayung so barang masam dāng ngga manuk, bisig bait kais,

⁹ samah mŭrŭt ngga Noah ka darŭm Batra nanyam pinyibada Tapa.

¹⁰ Ju andu ripas anŭ uba mandŭg.

¹¹ Kan Noah mbŭh nŭm ratus sawa umbur-i dog ngga simŭng ju andu buran duwŭh, sopŭrŭg rubang piin di darŭm tana bubus, ka sopŭrŭg tiban piin di rangit tikuka,

¹² ka ujen rabu nyatŭk tana pat puru andu pat puru ngarŭm.

¹³ Di andu anŭ gŭh Noah ngga sawŭn-i mŭrŭt ka darŭm Batra ayō taruh madis anak dari-i, Shem, Ham, ka Japheth ngga sawŭn ngara.

¹⁴ Sua mŭrŭt ngga ngara inŭh barang masam dāng: dāng kudip ngga dāng tarun; adi sŭ ngga adi baga; ngga barang masam manuk.

¹⁵ Ndi dari ndi dayung so barang masam dāng samah mŭrŭt ka darŭm batra ngga Noah,

¹⁶ nanyam ka pinyibada Tapa. Kan sopŭrŭg mbŭh mŭrŭt, TUHAN tŭŭp tiban batra.

¹⁷ Uba pijuu maad ndŭg pat puru andu, ka piin jadi sadang tŭrŭp-i yŭn batra anŭ tipuang.

¹⁸ Piin jadi dŭ dŭ tŭrŭp, ka Batra biranyut di tunduh-i.

¹⁹ Piin mbŭh jadi raru tŭrŭp ndŭg ka-i mbŭh ngapuh darŭd darŭd adi siabo bigatung;

²⁰ Gibabŭ gŭh uba tipaad, ndŭg ka-i ju mita rabis bigatung so tibung tibung darŭd.

²¹ Sopŭrŭg adi udip di ong, manuk, dāng ka manusia abo kabŭs.

²² Sopŭrŭg adi ngasŭng di ong abo kabŭs.

²³ Tapa pirusak sopŭrŭg adi udip di ong, manusia, dāng, ka manuk. Kaŭs-i adi dŭm inŭh Noah ngga sinadan adi agi ngga ayŭh darŭm batra.

²⁴ Uba nŭnŭng ndŭg siratus rimŭh puru andu.