TIBIRIK 50 - Hakcipta - Biatah Bidayuh

¹ Joseph rasu mutu di tunduh jawin sama-i, sien ka sium ayŭh.

² Komŭnŭ Joseph nggen ukum bada tadang sama-i dog namu.

³ Pat puru andu ngara namu tadang-i, tipuh adi nanyam kanyet daya namu tadang. Daya Egypt ngurid ayŭh ju puru andu.

⁴ Kan tipuh ngurid mbŭh ripuan, Joseph nang di pinurung pinurung raja, “Turung taban pinganang ati ka raja:

⁵ ‘Di tika sama ku mbŭh sindŭk re kabŭs, ayŭh bada aku bijanji ngga adŭp-i aku re kubur ayŭh di kubur adi-i muko sidia di tarun tana Canaan. Turung bada aku di kubur sama ku; komŭnŭ aku re pari.’ ”

⁶ Raja nam, “Di nŭh kubur sama mu, nimun adi ko kuu janji.”

⁷ Jadi Joseph matak di kubur sama-i. Sopŭrŭg pinurung raja, bara nyamba di istana, ka sopŭrŭg daya adi bās di Egypt sua matak ngga Joseph.

⁸ Rawang adŭp-i, bara jurud-i, ka rawang sama-i adi bŭkŭn sua di ngga ayŭh. Adŭ-i bara anak-sŭ ngga biri, kambing, ka sapi, babŭ di tarun tana Goshen.

⁹ Bara adi pimanu krita kuda ngga bara adi nunggang kuda agi gŭh sua; anŭ mbŭh dudu bara bara manusia.

¹⁰ Kan ngara mbŭh ndŭg tarun adi yŭn daya ngiik di Atad tura ka timor Jordan, ngara muās mua tian-i, ka Joseph nguru bara daya ngurid sitian ju andu.

¹¹ Kan bara daya Canaan kiris bara daya ngurid di Atad, ngara nang, “Ruai nang grua-i adat ngurid daya Egypt!” Anŭ meh sabab tarun anŭ dog kadŭn Abel Mizraim.

¹² Simŭnŭ inŭh bara anak dari Jacob ndai nanyam adi ko-i pesan di ngara;

¹³ ngara taban tadang-i ka Canaan ka kubur-i di tang di Machpelah di tura ka timor Mamre di tana adi Abraham ko miris so Ephron adi daya Hitti ndu tana kubur.

¹⁴ Ripas Joseph ko kubur sama-i, ayŭh pari ka Egypt ngga bara jurud-i ka sopŭrŭg daya adi agi sua ngga ayŭh di nyikubur.

Joseph Bijanji ngga Bara Jurud Dari-I

¹⁵ Ripas sama-i mbŭh kabŭs, bara jurud Joseph nang, “Munki kambŭi Joseph babŭ tiru di ata ka bisatur re maras ata amai sopŭrŭg sarah adi ata ko ndai di tunduh ayŭh?”

¹⁶ Jadi ngara pait pinganang ka Joseph: “Diŭ so sama ta kabŭs,

¹⁷ ayŭh kidaan di kuu, ‘Turung apun sarah adi bara jurud mu ko ndai di tunduh mu.’ Jadi turung apun sarah ami adi bara urun Tapa sama mu ko ndai di tunduh mu.” Joseph sien kan ayŭh trima pinganang anŭ.

¹⁸ Komŭnŭ adŭp bara adi bijurud anŭ mandŭg ka mutu ubak ngara di sirung jawin-i. “Ta kieh di sirung jawin mai nimun urun mai,” ngara nang.

¹⁹ Pak Joseph nang di ngara, “Dŭhnyah taru; aku dŭh bisa bada adŭp ku keya ka Tapa.

²⁰ Angān ko bipekat ndai arap di tunduh aku, pak Tapa mbŭh marik-i da jadi kayuh kana, isa bagŭ daya dapŭd dog nyiramat nimun adi mbŭh jadi madin.

²¹ Mating kayuh re ngan taru. Aku re kingat angān ngga bara anak ngan.” Jadi ayŭh bijanji ngga ngara pakai pinganang adi nyaduh ngara.

Pinyikabŭs Joseph

²² Joseph babŭ rŭŭ di Egypt ngga rawang sama-i; ayŭh mbŭh siratus simŭng sawa umbur-i kan ayŭh kabŭs.

²³ Ayŭh tui udip ka kiris bara anak ngga anak sukuh Ephraim. Ayŭh sipŭt gŭh kambat bara anak Machir adi anak Manasseh ka darŭm rawang anŭ.

²⁴ Ayŭh nang di bara jurud-i, “Aku mbŭh re kabŭs, pak Tapa taŭn tatu re kingat angān ka taban angān ngga ruah so tarun tana ati di ka tarun tana adi ko-I bijanji an nggen di Abraham, Isaac, ka Jacob.”

²⁵ Komŭnŭ Joseph mite bara daya-i bipayu. “Bijanji ngga aku,” ayŭh nang, “di andu Tapa taban angān ka tarun tana anŭ, angān re taban tadang ku.”

²⁶ Jadi Joseph kabŭs di Egypt kan umbur-i mbŭh siratus simŭng sawa. Ngara namu tadang-i ka na-i darŭm arung.