TIBIRIK 5 - Hakcipta - Biatah Bidayuh

Bara Sesang Adam

¹ Ati inŭh susud sesang Adam. (Di andu Tapa napa manusia, Ayŭh napa ngara nunda gayŭn adŭp-I.

² Ayŭh napa ngara dari ngga dayung, nyiberkat ngara, ka kadŭn ngara “Manusia.”)

³ Kan umbur Adam mbŭh 130 sawa, ayŭh biyŭn ndi anak dari mun adŭp-i, adi-i kadŭn Seth.

⁴ Ripas anŭ, umbur Adam bitambah 800 sawa dinge. Ayŭh biyŭn dinge anak anak adi bŭkŭn

⁵ ka kabŭs kan umbur-i mbŭh 930.

⁶ Kan umbur Seth mbŭh 105 sawa, ayŭh biyŭn ndi anak dari dŭn Enosh,

⁷ ka udip sitian 807 sawa dinge. Ayŭh biyŭn anak anak adi bŭkŭn dinge

⁸ ka kabŭs kan umbur-i mbŭh 912 sawa.

⁹ Kan umbur Enosh mbŭh 90 sawa, ayŭh biyŭn ndi anak dari adi-i kadŭn Kenan,

¹⁰ ka udip sitian 815 sawa dinge. Ayŭh biyŭn dinge anak anak adi bŭkŭn,

¹¹ ka kabŭs kan umbur-i mbŭh 905 sawa.

¹² Kan umbur Kenan mbŭh 70 sawa, ayŭh biyŭn ndi anak dari dŭn Mahalalel,

¹³ ka udip sitian 840 sawa dinge. Ayŭh biyŭn anak anak adi bŭkŭn dinge,

¹⁴ ka kabŭs kan umbur-i mbŭh 910 sawa.

¹⁵ Kan umbur Mahalalel mbŭh 65 sawa, ayŭh biyŭn ndi anak dari dŭn Jared,

¹⁶ ka udip sitian 830 sawa dinge. Ayŭh biyŭn anak anak adi bŭkŭn dinge,

¹⁷ ka kabŭs kan umbur-i mbŭh 895 sawa.

¹⁸ Kan umbur-i mbŭh 162 sawa, Jared biyŭn ndi anak dari dŭn Enoch,

¹⁹ ka udip sitian 800 sawa dinge. Ayŭh biyŭn anak anak adi bŭkŭn dinge

²⁰ ka kabŭs kan umbur-i mbŭh 962 sawa.

²¹ Kan umbur Enoch mbŭh 65 sawa, ayŭh biyŭn ndi anak dari dŭn Methuselah.

²² Ripas anŭ, Enoch udip nanyam ka pinyiraan Tapa 300 sawa, ka biyŭn anak anak adi bŭkŭn dinge.

²³ Ayŭh udip ndŭg umbur-i 365 sawa.

²⁴ Sitŭkŭd umbur-i ayŭh udip nanyam ka pinyiraan Tapa, ka komŭnŭ ayŭh miyap dog tambit Tapa.

²⁵ Kan umbur Methuselah mbŭh 187 sawa, ayŭh biyŭn ndi anak dari dŭn Lamech,

²⁶ ka udip sitian 782 sawa dinge. Ayŭh biyŭn anak anak adi bŭkŭn

²⁷ ka kabŭs kan umbur-i mbŭh 969 sawa.

²⁸ Kan umbur Lamech mbŭh 182 sawa, ayŭh biyŭn ndi anak dari

²⁹ ka nang, “So adŭp tana adi Tapa mbŭh mangu, anak ati re taban saduh yŭn ta so sopŭrŭg kraja jera ta.” Ngapŭi meh ayŭh kadŭn anak anŭ Noah.

³⁰ Lamech pijuu udip 595 dinge. Ayŭh biyŭn anak anak adi bŭkŭn

³¹ ka kabŭs kan umbur-i mbŭh 777 sawa.

³² Ripas umbur Noah mbŭh 500 sawa, ayŭh biyŭn taruh madis anak dari, Shem, Ham, ka Japheth.