TIBIRIK 49 - Hakcipta - Biatah Bidayuh

Sikasŭn Pinganang Jacob

¹ Jacob bagan bara anak dari-i ka nang, “Mandŭg tikuruk kamati, ka aku re kidaan kayuh adi re jadi di angān jŭ:

² “Mandŭg ka dingah meh, bara anak Jacob. Dingah sama ngan Israel.

³ “Reuben, kuu adi anak pinuai ku, kuu inŭh pinyibake ku ka sibungas anak ku darŭm tuuh ku, anak adi siabo traŭn ngga adi siabo bake di dupan bara anak dari ku.

⁴ Kuu inŭh adi keya ka uba adi daras, pak kuu dŭh re jadi adi siabo biguna, amai kuu nyibŭŭs ngga dayung nyikŭn ku ka dŭh stabi di ambok sama mu.

⁵ “Simeon ngga Levi agi bijurud. Ngara pakai sinyata ngga ndai pito.

⁶ Aku dŭh re sua di pinganang bisukan ngara, dŭh gŭh aku re sua di udung ngara, amai ngara siŭ daya ngga baji ka ngara bada bajang dari sapi ndu rubi.

⁷ Pangu nyatŭk baji ngara, sabab-i mbŭh raru mangah, ka di atin gaok ngara, sabab-i paŭh dŭh biyŭn masi. Aku re bada ngara papar sasah di ndi tarun tana Israel. Aku re mesak ngara dupan adŭp-i.

⁸ “Judah, bara jurud mu re nganju kuu. Kuu nakap pinganyu mu di tungo-i. Bara jurud dari mu re nundok di kuu.

⁹ Judah agi keya ka singah, Siŭ dangah-i ka pari ka sarin-i, Nyiriat buang rasu guring. Mating daya pagan ngaso ayŭh.

¹⁰ Judah re digŭng sikud-pinyipritah raja, ka bara sesang-i re ari mritah. Bara bangsa re jugan ka ayŭh takŭd buang mutu ubak ngara amai nundok di ayŭh.

¹¹ Ayŭh nyirunggo kaldi-i adi mara di tŭngŭn anggor, di tŭngŭn anggor adi siabo kana. Ayŭh ngu piraka-i darŭm wain adi bireh mun deya.

¹² Batŭh-i bireh amai ko nok wain, jipŭh-i buda amai ko nok sisuh.

¹³ “Zebulum re rŭŭ sindŭk rawŭt. Tabing-i re kapar yŭn birabuh. Abong tarun tana-i re ndŭg Sidon.

¹⁴ “Issachar mbŭh dŭh mbŭh so kaldi adi guring tŭnggŭn di asah kandi tapas-pinyiguru pinunggang kuda.

¹⁵ Pak ayŭh kiris tarun anŭ adi yŭn-i guring kana, ka tarun tana anŭ sangŭn. Jadi ayŭh mutu yŭn re kabis barang ka dog takan da nyiraja mun urun.

¹⁶ “Dan re mritah daya-i. Ngara re mun tibaran tibaran-asar Israel adi bŭkŭn.

¹⁷ Dan re jadi jippŭh di pang aran, jippŭh adi bisā di bŭngŭn aran, adi matuk tiga kuda, isa pinunggang-i sidakak.

¹⁸ “Aku kajŭn pinyirupas so Kaam, TUHAN.

¹⁹ “Gad re dog nyerang bara pirupak, pak ayŭh re bigiring ka tadak ngara.

²⁰ “Tana Asher re piruah pinguman adi kana. Ayŭh re piruah pinguman situgu yŭn raja.

²¹ “Naphtali inŭh peyu adi dŭh dog kurung, adi ruwan anak anak adi raru ramus.

²² “Joseph inŭh keya ka kaldi tarun di bŭngŭn rubang piin, anak kaldi tarun di sigŭn sandah.

²³ Pinganyu-i bandar bandar nyerang ayŭh, ka tadak ayŭh ngga bawŭh ka reja-panah.

²⁴ Pak jangi bawŭh babŭ kana, ka tangan-i tanŭ ka jadi bake ngga kuasa Tapa Jacob, adi Bikuasa, ngga Pingingat-biri adi jadi Pinyigrindung Israel.

²⁵ Tapa sama mu inŭh adi turung kuu, Tapa Bisa-pŭrŭg adi nyiberkat kuu ngga ujen so sambu, piin adi so rasan tana, ka kuu re biyŭn bagŭ sapi ka biyŭn bagŭ anak.

²⁶ Re biyŭn bagŭ gandom ngga bunga, angān re dŭh kurang dudu darŭd adi jah, kayuh kayuh sangŭn so sandah adi tan adu adu. Isa-i dudu berkat anŭ mbap di tunduh ubak Joseph, di arŭ-i adi ko dog mien so dupan bara jurud-i.

²⁷ “Benjamin inŭh keya ka kasong tarun adi ruai mangah. Isan ngga singumi andu ayŭh siŭ ka man.”

²⁸ Ngara inŭh simŭng duwŭh tibaran-asar Israel, ka anŭ inŭh piminyu pinganang adi nang sama ngara darŭm-i nang piminyu pinganang adi nugu ngga birakang, di barang naan anak dari-i.

Pinyikabŭs Jacob ngga Pinyikubur-I

²⁹ Komŭnŭ Jacob pesan bara anak dari-i, “Madin aku re kabŭs nimun bara daya ku, kubur aku di yŭn bara nyamba ku dog kubur, di tang anŭ di tana Ephron daya Hitti,

³⁰ di Machpelah, tura ka timor Mamre di tarun tana Canaan. Abraham miris tang ngga tana anŭ so Ephron ndu tana kubur.

³¹ Diginŭ inŭh yŭn ngara kubur Abraham ngga sawŭn-i Sarah; ka diginŭ gŭh ngara kubur Isaac ngga sawŭn-i Rebecca; ka diginŭ gŭh aku kubur Leah.

³² Tana ngga tang anŭ adi agi dieh dog miris so daya Hitti. Kubur aku diginŭ.”

³³ Kan Jacob muko piruah pinganang-i sakanŭ di bara anak dari-i, ayŭh guring ka rasu kabŭs.