TIBIRIK 43 - Hakcipta - Biatah Bidayuh

Bara Jurud Joseph Pari ka Egypt ngga Benjamin

¹ Apag di Canaan mbŭh makin bisā,

² jadi kan gandom adi rawang Jacob mbŭh ko taban so Egypt mbŭh abo dog man, Jacob nang di bara anak dari-i, “Angān di pari ka Egypt di miris pinguman yŭn ta.”

³ Judah nang di ayŭh, “Daya anŭ agi bandar bakan kieh nang kieh dŭh re dog trima da bidapŭd ngga adŭp-i adŭ kambŭi kieh agi taban sude ami ngga kieh.

⁴ Kambŭi kaam raan bada sude ami sua di ngga kieh, kieh bisa matak di miris pinguman yŭn mai.

⁵ Kambŭi kaam abah, kieh dŭh re di, sabab daya anŭ mbŭh kidaan nang adŭp-i dŭh re trima kieh bidapŭd ngga adŭp-i kambŭi sude ami dŭh sua ngga kieh.”

⁶ Jacob nang, “Mani angān bana nyusah aku, sah kidaan di daya anŭ nang angān biyŭn sude adi bŭkŭn?”

⁷ Ngara nam, “Daya anŭ darah siken pasar kieh ngga rawang ami, ‘Sama ngan gibabŭ udip kah? Agi kah sude ngan adi bŭkŭn?’ Mating aran kieh re dŭh nam pinyiken-i. Mating kieh puan nang ayŭh re bada kieh taban sude ami?”

⁸ Judah nang di sama-i, “Bada adŭ anak mai anŭ tunda aku, ka kieh bisa rasu di madin. Simŭnŭ adŭ isa ata dŭh kabŭs sikirau.

⁹ Aku bipayu ngga asŭng adŭp ku raan dapu tanggong di ani ani adi jadi di ayŭh. Kambŭi aku dŭh taban ayŭh pari ka kaam ngga siramat, isa-i aku dapu tanggong.

¹⁰ Kambŭi ata dŭh tui nyikite, tatu-i madin mbŭh piduwŭh saba ata matak mari so nŭ.”

¹¹ Sama ngara nang di ngara, “Kambŭi sakanŭ, taban garang kayuh kayuh adi siabo kana so rais ta. Misŭn-i ndu pinganggen ka gabenor: dambar, ju banyis, rapah rapah, kasang pistasio, ka buwa buwa almond.

¹² Taban gŭh duwŭh rupet duit, amai angān dŭh siŭn dŭh pari duit anŭ adi dog pari darŭm guni ngan. Kadŭ-i kayuh adi mun anŭ pingandai saru.

¹³ Taban sude ngan ka rikas mari.

¹⁴ Isa-i Tapa Bisa-pŭrŭg bada daya anŭ biyŭn atin masi di angān, ka bada Benjamin ngga jurud ngan anŭ ndi pari ka angān. Ka aku ati, kambŭi anak ku dŭh siŭn dŭh dog tambit so aku, isa-i dog tambit adŭ.”

¹⁵ Jadi ngara adi bimadis taban pinganggen ngara ngga duwŭh rupet kiang duit, ka matak panu di ka Egypt taban Benjamin. Diginŭ ngara bidapŭd ngga Joseph.

¹⁶ Kan Joseph kiris Benjamin ayō ngara, ayŭh nang di daya-gaji adi tukang nguasa kayuh di ramin-i, “Taban ngara anŭ ka ramin ku. Ngara re man ayō aku ngga kumbeng. Siŭ ndi dāng ka tanŭk-i.”

¹⁷ Daya-gaji anŭ ndai nimun adi ko dog pesan ka taban ngara ngga di ka ramin Joseph.

¹⁸ Darŭm ngara dog taban ka ramin Joseph, ngara mbŭh samah taru ka nang, “Ata dog taban di kamati sabab duit anŭ adi mbŭh dog pari ka darŭm guni ta sibungas ata mandŭg kamati prajah. Ngara re nyirŭgŭh nyerang ata, tambit kaldi kaldi ta, ka bada ata jadi urun-i.”

¹⁹ Jadi di baŭm tiban ramin Joseph, ngara nang di daya-gaji,

²⁰ “Tuan, kieh di kamati ndi sidah dawŭ-i, di miris pinguman.

²¹ Kan kieh rŭŭ ka bibari di atang aran darŭm pimari ami, kieh kuka guni guni ami, ka barang naan kieh agi dapŭd duit ami di darŭm pak tura ka baba guni ami. Kieh madin agi taban-i pari ka kaam.

²² Kieh agi gŭh taban duit adi re ami ngga miris pinguman. Kieh dŭh puan asi misŭn duit anŭ ka darŭm guni ami.”

²³ Daya-gaji anŭ nang, “Dŭhnyah gapang. Dŭhnyah taru. Tapa ngan, adi Tapa sama ngan, kani adi misŭn duit anŭ darŭm guni guni ngan. Aku agi trima pinyibayar ngan.” Komŭnŭ ayŭh taban Simeon ka yŭn ngara.

²⁴ Daya-gaji anŭ taban ngara ka darŭm arŭn. Ayŭh nggen piin ngga ngara ngu kaja ngara, ka-i paan bara kaldi ngara.

²⁵ Ngara sidia pinganggen adi re ngara nggen di Joseph kan ayŭh maad ngga kumbeng, sabab ngara mbŭh dog kidaan nang ngara re bisamah ngga ayŭh.

²⁶ Kan Joseph mbŭh ndŭg arŭn, ngara taban pinganggen ngara ka darŭm arŭn ka yŭn-i buang mutu ubak ngara ka ayŭh.

²⁷ Ayŭh siken ngara bua sanang kah dŭh ka komŭnŭ nang, “Angān agi kidaan di aku pasar sama ngan adi mbŭh minyamba; munki ayŭh madin? Babŭ kah ayŭh udip buang bua sanang?”

²⁸ Ngara nam, “Sama ami babŭ udip buang bua sanang.” Ka ngara sidikang samah mutu ubak ngara ka ayŭh.

²⁹ Kan Joseph kiris sude-i Benjamin, ayŭh nang, “Jadi siati meh sude sibusu ngan, adi angān ko kidaan di aku. Tapa nyiberkat kuu, nak.”

³⁰ Komŭnŭ Joseph rikas bu, amai atin-i mbŭh raru puno ngga masi di sude-i. Ayŭh mbŭh dŭm tadŭ re sien, jadi ayŭh mŭrŭt birit-i ka sien.

³¹ Ripas ayŭh ko kuas jawin-i, ayŭh ruah ka sapa, buang nyijŭn adŭp-i ayŭh bada pinguman dog ngidang.

³² Joseph dog ngidang di ndi mija ka bara jurud-i di mija adi bŭkŭn. Bara daya Egypt adi sua man diginŭ dog ngidang dŭh bigaur ngga ngara, amai ngara nyirundeng re nggen mangŭh di adŭp-i kambŭi man samah ngga daya Hebrew.

³³ Ngara adi bijurud samah guru man di mija situra jawin ngga Joseph. Pinyiguru ngara nanyam ka susud umbur ngara so pinuai ndŭg sibusu. Kan ngara kiris susud pinyiguru ngara, ngara samah kimat dingan-i buang nginga.

³⁴ Pinguman dog ngidang di ngara so mija Joseph, ka Benjamin dog ngidang pirimŭh rupet bagŭ dŭ so tung ngara adi bŭkŭn. Jadi ngara man nok ngga Joseph, buang gaŭn pawŭn.