TIBIRIK 42 - Hakcipta - Biatah Bidayuh

Bara Jurud Joseph di ka Egypt di miris Gandom

¹ Kan Jacob dingah gandom bagŭ di Egypt, ayŭh nang di bara anak dari-i, “Mani angān dŭh adŭ ndai ani ani?

² Aku dingah gandom agi di Egypt; di kamanŭ di miris gandom isa ata dŭh kabŭs sikirau.”

³ Jadi jurud tiri Joseph adi simŭng madis di ka Egypt di miris gandom,

⁴ pak Jacob dŭh bada Benjamin adi jurud pasid Joseph sua ngga ngara, amai taru ayŭh dog stika.

⁵ Bara anak Jacob ngga bara adi bŭkŭn mandŭg di miris gandom, sabab apag agi di ndi tarun tana Canaan.

⁶ Joseph adi jadi gabenor di tarun tana Egypt jua gandom ka barang bangsa adi mandŭg so ndi ong ong. Jadi bara jurud Joseph mandŭg ka mutu ubak ngara ka ayŭh.

⁷ Kan Joseph kiris bara jurud-i, ayŭh rasu natŭng ngara, pak ayŭh bada adŭp-i mun adi dŭh natŭng ngara. Ayŭh siken ngara ngga kasar, “So ki angān mandŭg?” “Kieh mandŭg so Canaan an miris pinguman,” ngara nam.

⁸ Sunggu Joseph natŭng bara jurud-i, ngara dŭh natŭng ayŭh.

⁹ Ayŭh ingat pŭmŭh pŭmŭh-i pasar ngara ka nang, “Angān ati pinyiong; angān mandŭg kamati batur an puan pinyiramah rais ami.”

¹⁰ “Dŭh, tuan,” ngara nam. “Kieh mandŭg keya ka urun mai, di miris pinguman.

¹¹ Kieh ati bijurud. Kieh dŭh pinyiong, tuan, kieh ati daya kana.”

¹² Joseph nang di ngara, “Dŭh! Angān ati mandŭg an puan pinyiramah rais ami.”

¹³ Ngara nam, “Tuan, kieh ati simŭng duwŭh madis bijurud so ndi sama di tarun tana Canaan. Ndi naan mbŭh kabŭs, ka sibusu ami agi ngga sama ami madin.”

¹⁴ Joseph nam, “Sawŭ sak adi nang ku. Angān ati pinyiong.

¹⁵ Aku re suba angān. Aku bipayu ngga dŭn raja angān dŭh bisa bu so ti, adŭ-i kambŭi sude sibusu ngan mandŭg kamati.

¹⁶ Ndi so angān dŭh siŭn dŭh di tambit ayŭh. Angān adi bŭkŭn re dog bitan ka dog nguan ndŭg ka pinganang ngan mbŭh dog puan nang batur ngga dŭh. Kambŭi dŭh, aku bipayu ngga dŭn raja angān ati taŭn pinyiong.”

¹⁷ Ko-i nang sakanŭ, ayŭh na ngara di ramin jer yŭn tipuh taruh andu.

¹⁸ Ngga andu adi taruh Joseph nang di ngara, “Aku ati daya adi taru di Tapa, aku bisa dŭh siŭ angān adŭ-i so ndi masam atur.

¹⁹ Ngga kiren adŭp ngan sawŭ daya adi kana, ndi naan so angān re rŭŭ di ramin jer adi yŭn angān ko dog kurung, ka angān adi bŭkŭn bisa pari taban gandom adi angān ko miris ka rawang ngan adi sikirau.

²⁰ Jadi angān dŭh siŭn dŭh taban ka yŭn ku sude sibusu ngan. Simŭnŭ angān kiren pinganang ngan agi sawŭ ka aku dŭh re siŭ angān.” Ngara situju

²¹ ka nang dupan adŭp ngara, “Tingga, madin ata ja mbŭh susah da kraja pingandai adŭp ta di tunduh sude ta; ata kiris munki masam sangsara-i ayŭh andu-i mite masi so ata, pak ata dŭh mbit piduri. Anŭ sabab ata dog pinyusah ati madin.”

²² Reuben nang, “Aku ko kidaan di angān nang dŭhnyah ida ida ngga ayŭh, pak angān dŭh dingah kayuh nang ku. Jadi madin ata mbŭh trima baras pinyikabŭs-i.”

²³ Joseph mirati kayuh nang ngara, pak ngara dŭh puan amai ngara minyu ngga ayŭh so baba daya adi tukang kidaan rati piminyu ngara.

²⁴ Joseph bu so yŭn ngara ka rasu sien. Kan ayŭh mbŭh tungang minyu dinge, ayŭh pari, tambit Simeon, ka bada ayŭh dog mŭŭng di sirung jawin ngara.

Bara Jurud Joseph Pari ka Canaan

²⁵ Joseph nggen ukum bada sopŭrŭg guni jurud-i dog ngisi ngga gandom, ka na pari duit barang naan ngara ka darŭm guni ngara, ka nggen inged ngara. Ripas anŭ ko dog ndai,

²⁶ bara jurud-i na guni gandom adi ngara ko miris di tunduh kaldi ngara, ka komŭnŭ ngara bu.

²⁷ Di tarun yŭn ngara nyirŭmŭn, ndi naan so ngara kuka guni-i amai an paan kaldi-i, pak gŭt-i dapŭd duit adŭp-i di darŭm pak tura ka baba guni.

²⁸ “Duit ku mbŭh dog pari ka adŭp ku,” ayŭh nang di bara jurud-i. “Ta di darŭm guni ku!” Ngara rasu kimŭtŭr taru buang nang dupan adŭp-i, “Ani meh ati adi Tapa mbŭh ndai di ata?”

²⁹ Kan ngara mandŭg ka yŭn sama ngara di Canaan, ngara kidaan sopŭrŭg kayuh adi mbŭh jadi di ngara:

³⁰ “Gabenor Egypt paŭh kasar minyu ngga kieh, buang napŭ kieh pinyiong mŭrŭt rais-i.

³¹ ‘Kieh dŭh pinyiong,’ kieh nam, ‘kieh ati daya kana.

³² Kieh agi simŭng duwŭh madis bijurud so ndi sama. Ndi naan mbŭh kabŭs, ka sibusu dari ami agi babŭ di Canaan di yŭn sama ami.’

³³ Daya anŭ nam, ‘Simuti inŭh aku re puan nang angān sawŭ ngga dŭh daya adi kana: Ndi so angān re rŭŭ digiti ngga aku; angān adi bŭkŭn bisa mari taban gandom ka rawang ngan adi mbŭh sikirau.

³⁴ Taban sude sibusu ngan ka yŭn ku. Simŭnŭ inŭh aku bisa puan angān ati sawŭ dŭh pinyiong, pak daya kana; aku re nggen pari sude ngan ka angān, ka angān bisa rŭŭ digiti bidagang.’ ”

³⁵ Kan ngara mbŭh kangan guni guni ngara, barang naan ngara dapŭd kambut duit ngara; ka kan ngara kiris duit anŭ, ngara ngga sama ngara Jacob mbŭh taru.

³⁶ Sama ngara nang di ngara, “Angān re bada sopŭrŭg anak ku miyap kah? Joseph mbŭh mating; Simeon mbŭh mating gŭh; ka madin angān an taban Benjamin ngga bu. Aku ati adi kinyam susah!”

³⁷ Reuben nang di Sama-i, “Kambŭi aku dŭh taban Benjamin ngga pari ka yŭn mai, kaam bisa siŭ anak dari ku adi duwŭh madis. Tandah ayŭh darŭm tangan ku; aku re taban ayŭh ngga pari ka kaam.”

³⁸ Pak Jacob nang, “Anak ku dŭh dapŭd di ngga angān; kaka-i mbŭh kabŭs, ka ayŭh sadi adŭ adi dŭm. Darŭm angān panu te agi stika dog ayŭh rai-i. Aku mbŭh minyamba, ka pinyusah adi angān re taban ka aku re bada aku kabŭs.”