TIBIRIK 39 - Hakcipta - Biatah Bidayuh

Joseph ngga Sawŭn Potiphar

¹ Jadi daya Ishmael mbŭh taban Joseph ka Egypt ka jua ayŭh ka Potiphar, ndi so bara pinurung raja, adi pingubak ngara adi tukang jaga Istana.

² Joseph mujur darŭm sopŭrŭg kayuh amai TUHAN agi ngga ayŭh. Ayŭh rŭŭ darŭm ramin tuan-i adi daya Egypt,

³ adi kiris TUHAN agi ngga Joseph ka mbŭh bada ayŭh mujur darŭm sopŭrŭg kayuh adi ndai-i.

⁴ Potiphar mbŭh raru munos asŭng-i di Joseph ka bada ayŭh jadi daya-gaji yŭn adŭp-i sadi; jadi ayŭh bada Joseph tukang kingat jaga ramin ngga sopŭrŭg kayuh adi-i dapu.

⁵ So nganŭ, sitagar Joseph, TUHAN nyiberkat abin ramin Potiphar, samŭn sopŭrŭg kayuh adi-i dapu bait di ramin puan kah di teya.

⁶ Potiphar mbas pasan sopŭrŭg kayuh ka darŭm tangan Joseph, ka dŭh-i mbit piduri di tadŭ kayuh adŭ-i pinguman-i. Pŭrŭng ganan Joseph tagap bake buang piayong,

⁷ ka mua tian-i ripas anŭ, sawŭn tuan-i piguru ripong di ayŭh ka mite ayŭh nyibŭŭs ngga adŭp-i.

⁸ Joseph abah ka nang di ayŭh, “Tingga, tuan ku dŭh mbit piduri di tadŭ tadŭ kayuh di ramin arŭn, sabab aku agi digiti. Ayŭh mbŭh bada aku nguasa sopŭrŭg kayuh adi-i dapu.

⁹ Aku biyŭn kuasa di ramin ati nimun ayŭh, ka ayŭh dŭh bidagis ngga tadŭ tadŭ kayuh adŭ-i kuu. Simuki aku re ndai kayuh adi raru sarah mun anŭ ka bidosa rawan Tapa?”

¹⁰ Sunggu-i barang andu mite Joseph nyibŭŭs ngga adŭp-i Joseph dŭh nurut pimite-i.

¹¹ Pak ndi andu kan Joseph mŭrŭt ka darŭm ramin re ndai kraja-i, daya-gaji adi bŭkŭn mating diginŭ.

¹² Sawŭn Potiphar nakap ayŭh di jipo ambu-i ka nang, “Ja guring ngga aku.” Pak Joseph pirupas adŭp-i ka bikaduh ruah ka sapa, tingge jipo ambu-i di tangan sawŭn Potiphar.

¹³ Kan sawŭn Potiphar kiris Joseph tingge jipo ambu-i buang mbŭh bu so ramin,

¹⁴ ayŭh bagan bara daya gaji-i ka nang, “Tingga ati! Daya Hebrew anŭ adi banŭh ku taban ka ramin ati mbŭh nggen mangŭh di ata. Ayŭh mŭrŭt birit ku ka suba an miragag aku, pak aku nyirais ngga situngang tungang ku.

¹⁵ Kan ayŭh dingah aku nyirais, ayŭh bikaduh ruah ka sapa, tingge jipo ambu-i di yŭn ku.”

¹⁶ Ayŭh nyikŭn jipo-ambu Joseph ndŭg ka tuan Joseph mbŭh mari.

¹⁷ Jadi kan banŭh-i mbŭh di arŭn, ayŭh kidaan sakanŭ gŭh: “Daya Hebrew anŭ, urun adi kuu taban kamati, mŭrŭt ka birit ku ka nggen mangŭh di aku.

¹⁸ Pak kan aku nyirais, ayŭh ruah ka sapa tingge jipo ambu-i di yŭn ku.”

¹⁹ Tuan Joseph mbŭh raru baji

²⁰ ka bada Joseph dog nakap ka dog na darŭm ramin jer di yŭn raja kurung bara daya takap-i, ka diginŭ meh ayŭh rŭŭ.

²¹ Pak TUHAN agi ngga Joseph ka nyiberkat ayŭh, ka bada daya adi tukang jaga ramin jer kana ngga ayŭh.

²² Ayŭh bada Joseph nguasa sopŭrŭg daya-takap adi bŭkŭn ka bada ayŭh dapu tanggong di sopŭrŭg kayuh adi dog ndai di ramin jer.

²³ Daya adi tukang jaga ramin jer dŭhsah ngatur tadŭ tadŭ kayuh adi darŭm pingatur Joseph, sabab TUHAN agi ngga Joseph ka bada ayŭh mujur di sopŭrŭg kayuh adi ndai-i.