TIBIRIK 37 - Hakcipta - Biatah Bidayuh

Joseph ngga bara Jurud-I

¹ Jacob gibabŭ rŭŭ di tarun tana Canaan, adi yŭn sama-i ko rŭŭ dawŭ-i,

² ka ati inŭh dundan rawang Jacob. Joseph, bujang dari adi simŭng ju sawa, sua kingat biri ka kambing ayō bara jurud-i adi bara anak dari Bilhah ngga Zilpah, dayung nyikŭn sama-i. Ayŭh agi ngadu di sama-i tadŭ tadŭ pingandai arap adi bara jurud-i ndai.

³ Jacob rindu Joseph rabis dŭ so bara anak dari-i adi bŭkŭn, sabab ayŭh dog biranak yŭn-i kan ayŭh mbŭh minyamba. Ayŭh ndai jipo-ambu adi ambu tangan-i yŭn Joseph.

⁴ Kan bara jurud-i kiris sama ngara rindu Joseph rabis dŭ so ayŭh rindu ngara, ngara tiru kiris sude ngara ndŭg ka ngara dŭh raan kana minyu kirakar ngga ayŭh.

⁵ Ndi sidah Joseph nyipŭmŭh, ka kan ayŭh kidaan pasar pŭmŭh-i di bara jurud-i, ngara jadi rabis dinge tiru di ayŭh.

⁶ Ayŭh nang, “Dingah pŭmŭh ku ati.

⁷ Sopŭrŭg ta mbŭh samah agi di ŭmŭh mŭtŭs tŭngŭn gandom, nganŭ bŭtŭs tung jaku makat ka mijog tŭnggŭn. Sinadan bŭtŭs tung jangān kirurung maning ka mutu nura tung jaku.”

⁸ Bara jurud-i siken ayŭh, “Kuu natis adŭp mu re jadi raja ka mritah kieh kah?” Jadi ngara mbŭh jadi rabis dinge tiru di ayŭh sabab pŭmŭh-i ka sabab kayuh adi-i nang pasar ngara.

⁹ Komŭnŭ Joseph biyŭn dinge pŭmŭh adi bŭkŭn ka ayŭh kidaan di bara jurud-i, “Aku agi pŭmŭh adi bŭkŭn. Aku pŭmŭh adŭp ku kiris batŭh andu, buran, ka simŭng ndi bitang mutu nura aku.”

¹⁰ Ayŭh agi gŭh kidaan pŭmŭh anŭ di sama-i, ka sama-i pirangi ayŭh: “Pŭmŭh ani anŭ adi sakanŭ? Kuu natis sindŭ mu, jurud mu, ka aku re nundok di kuu?”

¹¹ Bara jurud Joseph mbŭh samah sina di ayŭh, pak sama-i gibabŭ bipikir pasar pŭmŭh anŭ.

Joseph dog Jua ka dog Taban ka Egypt

¹² Ndi andu kan bara jurud Joseph mbŭh matak ka Shechem di kingat kaban dāng sama ngara,

¹³ Jacob nang di Joseph, “Aku raan bada kuu di ka Shechem, adi yŭn bara jurud mu agi kingat kaban dāng ta.” Joseph nam, “Aku ja sidia garang nŭh.”

¹⁴ Sama-i nang di ayŭh, “Panu di tingga bara jurud mu sanang kah dŭh ngara, ka munki gŭh ngga kaban dāng; komŭnŭ kuu pari ka kidaan di aku.” Jadi sama-i bada ayŭh matak so Rubān Hebron. Joseph ndŭg Shechem

¹⁵ ka mbŭh bigandon barang barang ka-i di rais anŭ kan ndi naan daya kiris ayŭh ka siken ayŭh, “Ani jiroh mu?”

¹⁶ “Aku jiroh bara jurud ku, adi kingat kaban dāng ngara,” ayŭh nam. “Bisa kah turung kidaan di aku diki ngara?”

¹⁷ Daya anŭ nang, “Ngara mbŭh bu so ti. Aku agi dingah ngara nang adŭp ngara re di ka Dothan.” Jadi Joseph matak di nudug bara jurud-i ka dapŭd ngara di Dothan.

¹⁸ Ngara kiris ayŭh so jo, ka sibayuh ayŭh ndŭg ngara, ngara mbŭh bipekat an siŭ ayŭh.

¹⁹ Ngara nang dupan adŭp ngara, “Sipŭmŭh mandŭg.

²⁰ Ja ata siŭ ayŭh ka taran tadang-i ka darŭm ndi so dudu rubang prigi adi badŭh. Ata bisa nang dāng tarun siŭ ayŭh. Komŭnŭ ata tingga ani re jadi so pŭmŭh-i.”

²¹ Kan Reuben dingah ngara nang sakanŭ, ayŭh suba an nyiramat Joseph so tangan ngara. “Dŭhnyah ata siŭ ayŭh,” ayŭh nang.

²² “Taran ayŭh ka darŭm prigi di tarun tana-pajam ati; pak dŭhnyah bada ayŭh kinaman.” Reuben nang sakanŭ amai an nyiramat ayŭh so ngara ka bada ayŭh pari ka sama-i.

²³ Kan Joseph mbŭh ndŭg ngara, ngara nyirugut jipo ambu-i adi ambu tangan-i.

²⁴ Komŭnŭ ngara muak ayŭh ka taran ayŭh ka darŭm prigi adi badŭh.

²⁵ Darŭm ngara guru man, gŭgŭh agi ndi tibaran daya Ishmael mandŭg so Gilead re di ka Egypt. Onta onta ngara kabis rapah ngga dambar.

²⁶ Judah nang di bara jurud-i, “Ani re ata dapŭd kambŭi ata siŭ jurud ta ka nutu pingandai sarah ta anŭ?

²⁷ Ja ata jua ayŭh ka daya daya Ishmael anŭ, ka dŭhsah na tangan di ayŭh; mŭnŭ jurud ta garang ayŭh nŭh, ka isin ngga deya adŭp ta gŭh.” Ngara samah situju.

²⁸ Jadi kan bara daya Midian adi bidagang mandŭg murah, ngara adi bijurud anŭ tarik Joseph so rubang prigi ka jua ayŭh, yŭn duwŭh puru kiping duit pirak, di daya Ishmael adi taban ayŭh ka Egypt.

²⁹ Kan Reuben pari di ka rubang prigi ka kiris Joseph mbŭh mating diginŭ, ayŭh nyiratak jipo-i darŭm susah.

³⁰ Ayŭh di pari ka yŭn bara jurud-i ka nang, “Anak anŭ mating diginŭ! Simuki meh kayuh ati te?”

³¹ Jadi ngara siŭ ndi kambing ka gurai jipo-ambu Joseph di deya-i.

³² Ngara taban jipo-ambu anŭ ka yŭn sama ngara ka nang, “Kieh dapŭd ati. Anak mai kah dapu jipo-ambu ati?”

³³ Jacob natŭng jipo-ambu anŭ ka nang, “Yŭh, jipo-i inŭh anŭ! Dāng tarun mbŭh siŭ ayŭh. Anak ku Joseph mbŭh dog man dāng tarun!”

³⁴ Jacob darŭm susah nyiratak jipo-i, ka kasŭk banang guni ka ngurid anak-i Joseph mua tian-i.

³⁵ Sopŭrŭg anak dari ngga anak dayung-i mandŭg di nyaduh ayŭh, pak ayŭh abah dog nyaduh. Ayŭh nang, “Aku re ngurid anak ku ndŭg ka aku mūn ka sibayan.” Jadi ayŭh babŭ ngurid anak-i Joseph.

³⁶ Di tika anŭ, di Egypt, daya Midian mbŭh jua Joseph di Potiphar, ndi naan so bara pinurung Raja diginŭ, adi pingubak bara adi tukang jaga Istana.