TIBIRIK 35 - Hakcipta - Biatah Bidayuh

Tapa Nyiberkat Jacob di Bethel

¹ Tapa nang di Jacob, “Di rikas ka Bethel ka rŭŭ diginŭ. Ndai ndi mija-sambah diginŭ yŭn Ku, Tapa adi ko nandŭng di kuu kan kuu bu mangān kaka mu Esau.”

² Jadi Jacob nang di rawang-i ka di sopŭrŭg adi agi ngga ayŭh, “Taran sopŭrŭg tibudo tapa saruh adi angān nyikŭn; pibisig adŭp ngan ka nēn piraka bisig.

³ Ata re bu so tarun ati di ka Bethel, di yŭn aku re pijog ndi mija-sambah yŭn Tapa adi ko turung aku di tipuh aku dog pinyusah ka adi agi ngga aku di tadŭ yŭn aku ko di.”

⁴ Jadi ngara nggen di Jacob sopŭrŭg tibudo tapa saruh adi ngara biyŭn samŭn dudu sigating adi ngara pakai. Ayŭh kubur sopŭrŭg-i di ribo tŭngŭn oak sindŭk Shechem.

⁵ Kan Jacob ngga bara anak-i mbŭh sidia re panu, sopŭrŭg daya adi rŭŭ di kupo kupo maning anŭ mbŭh raru taru, ka ngara dŭh tadak ngara.

⁶ Jacob ngga sopŭrŭg daya-i mandŭg di Luz, adi madin dog kadŭn Bethel, di tarun tana Canaan.

⁷ Diginŭ Jacob pijog ndi mija-sambah ka kadŭn tarun anŭ Tapa Bethel, sabab diginŭ Tapa mbŭh pinandŭng adŭp-I di ayŭh di andu-i bu mangān kaka-i.

⁸ Tukang pinguses Rebecca adi dŭn Deborah kabŭs diginŭ ka dog kubur di ribo tŭngŭn oak di tura ka siratan Bethel. Anŭ sabab-i dog kadŭn “Tŭngŭn Oak Pimuās.”

⁹ Di tika Jacob pari so Mesopotamia, Tapa nandŭng di ayŭh dinge ka nyiberkat ayŭh.

¹⁰ Tapa nang di ayŭh, “Dŭn mu inŭh Jacob, pak so madin kuu dog kadŭn Israel.” Jadi Tapa kadŭn ayŭh Israel.

¹¹ Ka Tapa nang di ayŭh, “Aku ati Tapa Bisa-pŭrŭg. Biyŭn bagŭ anak meh. Bangsa bangsa re mandŭg so kuu, ka kuu re jadi babuk bara raja.

¹² Aku re nggen di kuu tarun tana adi muko Aku nggen di Abraham ngga Isaac, ka Aku re nggen-i gŭh di sesang mu.”

¹³ Komŭnŭ Tapa bu tingge ayŭh.

¹⁴ Diginŭ di yŭn Tapa ko minyu ngga ayŭh, Jacob pijog batuh pinatŭng ka ren wain ngga inyo kanā di tunduh-i ngga nyikudus-i.

¹⁵ Ayŭh kadŭn tarun anŭ Bethel.

Pinyikabŭs Rachel

¹⁶ Jacob ngga rawang-i bu so Bethel, ka kan ngara gibabŭ mua juan-i so Ephrath, tipuh mbŭh mandŭg yŭn Rachel re biranak, pak anak-i raru mbar ruah,

¹⁷ Di jam sarang andam biranak bisikŭh, dayung pinading-i nang di ayŭh, “Dŭhnyah taru, Rachel; dari anak mu.”

¹⁸ Pak Rachel taŭn mbŭh kirarah, ka darŭm mbŭh re patŭd asŭng-i, ayŭh kadŭn anak-i Benoni, pak sama-i kadŭn ayŭh Benjamin.

¹⁹ Kan Rachel mbŭh kabŭs, tadang-i dog kubur di pang aran nuju Ephrath, adi madin mbŭh dog kadŭn Bethlehem.

²⁰ Jacob pijog batuh pinatŭng diginŭ, ka-i babŭ nandā kubur Rachel ndŭg andu ati.

²¹ Jacob pijuu pimanu-i ka bibari di parad mandi sirangga Eder.

²² Sitadŭn Jacob rŭŭ di tarun tana anŭ, Reuben raban ngga Bilhah, ndi so dayung nyikŭn sama-i; Jacob raru baji kan-i dingah kayuh anŭ. Jacob biyŭn simŭng-duwŭh madis anak dari.

Bara Anak Dari Jacob

²³ Anak dari Leah inŭh Reuben (anak pinuai Jacob), Simeon, Levi, Judah, Issachar, ka Zebulun.

²⁴ Anak dari Rachel inŭh Joseph ngga Benjamin.

²⁵ Anak dari Bilhah urun Rachel, inŭh Dan ngga Naphtali.

²⁶ Anak dari Zilpah urun Leah, inŭh Gad ngga Asher. Ngara dog biranak di Mesopotamia.

Pinyikabŭs Isaac

²⁷ Jacob di ka yŭn Sama-i Isaac di Mamre, sindŭk Hebron, tarun tana adi yŭn Abraham ngga Isaac ko rŭŭ.

²⁸ Isaac udip ndŭg 180 sawa

²⁹ ka kabŭs darŭm-i mbŭh sukup minyamba; ka anak dari-i Esau ngga Jacob kubur ayŭh.