TIBIRIK 29 - Hakcipta - Biatah Bidayuh

Jacob Ndŭg Ramin Laban

¹ Jacob pijuu pimanu-i ka di ka tarun tana tura ka Timor.

² Gŭgŭh ka ayŭh dapŭd ndi prigi di tarun ka agi taruh kaban biri guring maning prigi anŭ. Dāng dāng anŭ dog nggen nok so prigi anŭ adi agi tibande tŭtŭp batuh dieh.

³ Kan sopŭrŭg kaban dāng kudip mbŭh tikuruk diginŭ, bara pingingat-biri sigen batuh anŭ ka nggen nok di dāng dāng anŭ. Komŭnŭ ngara sigen batuh anŭ pari ka yŭn-i.

⁴ Jacob siken bara pingingat-biri anŭ, “Dingan, so ki angān?” Ngara nam, “So Haran.”

⁵ Ayŭh siken, “Puan ngan kah Laban sukuh Nahor?” “Puan.”

⁶ Ayŭh siken, “Sanang kah ayŭh?” Ngara nam, “Sanang ayŭh.” “Tingga, no anak dayung-i Rachel taban dāng dāng-i.”

⁷ Jacob nang, “San andu gibabŭ jawa, ka gibayuh gŭh jam adi ngga kaban dāng kudip dog pibŭrŭt, mani angān dŭh nggen nok di dāng anŭ, ka taban ngara pari ka tarun tana kupai?”

⁸ Ngara nam, “Kieh dŭh bisa ndai simŭnŭ ndŭg ka sopŭrŭg dāng mbŭh tikuruk digiti ka batuh anŭ muko dog sigen so baba prigi; ripas anŭ nŭ kieh bisa nggen nok di kaban dāng.”

⁹ Atan Jacob gibabŭ minyu ngga ngara, Rachel mandŭg gŭh taban kaban dāng-i.

¹⁰ Kan Jacob kiris Rachel ngga kaban dāng sama-i Laban, ayŭh di ka prigi anŭ, sigen batuh so baba prigi ka nggen nok di biri biri.

¹¹ Komŭnŭ ayŭh sium Rachel buang sien amai gaŭn.

¹² Jacob kidaan di Rachel, “Aku ati madis sama mu, anak Rebecca.” Rachel bikaduh di kidaan di sama-i;

¹³ ka kan ayŭh dingah pasar Jacob adi anak jurud-i, ayŭh bikaduh di tudu ayŭh, dakŭp ka sium ayŭh, ka taban ayŭh ka ramin-i. Kan Jacob muko kidaan di Laban sopŭrŭg kayuh adi mbŭh jadi,

¹⁴ Laban nang, “Sawŭ inŭh kuu isin ngga deya adŭp ku.” Jacob rŭŭ diginŭ ripuan buran.

Jacob Nyiraja tagŭ Laban yŭn Rachel ngga Leah

¹⁵ Laban nang di Jacob, “Kuu dŭh patut nyiraja braŭn yŭn ku sitagar kuu madis ku. Kiang-ki gaji raan mu?”

¹⁶ Laban biyŭn duwŭh madis anak dayung; adi tuuh dŭn Leah, ka adi mara Rachel.

¹⁷ Leah ramus batŭh-i, pak Rachel piayong buang ramus.

¹⁸ Jacob awang Rachel, ngapŭi ayŭh nang, “Singadu aku nyiraja yŭn mai ju sawa kambŭi kaam raan bada aku sawŭn Rachel.”

¹⁹ Laban nam, “Raan dŭ aku nggen ayŭh di kuu so aku nggen di daya bŭkŭn; rŭŭ digiti ngga aku.”

²⁰ Jacob nyiraja ju sawa ramŭn gŭh raan dapŭd Rachel, pak tipuh anŭ di ayŭh nyam adi kudu kudu andu adŭ, amai ayŭh awang Rachel.

²¹ Komŭnŭ Jacob nang di Laban, “Tipuh-i mbŭh mandŭg; bada meh aku sawŭn anak mai.”

²² Jadi Laban ndai gawai sawan ka bagan barang naan daya.

²³ Pak ngarŭm anŭ Laban ton Leah ka yŭn Jacob, dŭh Rachel, ka Jacob nyibŭŭs ngga Leah. (

²⁴ Laban nggen ndi urun dayung adi dŭn Zilpah di Leah da jadi pinguses-i.)

²⁵ Kan andu mbŭh jawa, Jacob rada nang anŭ Leah. Ayŭh di ka yŭn Laban ka nang, “Mani kaam simuti ngga aku? Aku mbŭh nyiraja amai raan dapu Rachel. Mani kaam nipu aku?”

²⁶ Laban nam, “Nanyam adat digiti dŭh nŭŭh bisa bada anak dayung adi sude diŭ banan so kaka-i.

²⁷ Kajŭn ndŭg tipuh gawai sawan ati adi ndi minggu mbŭh ripuan nŭ ka aku nggen Rachel di kuu, kambŭi kuu raan nyiraja yŭn ku dŭm ju sawa dinge.”

²⁸ Jacob situju, ka kan gawai sawan anŭ mbŭh ripuan Laban nggen Rachel di Jacob da jadi sawŭn-i. (

²⁹ Laban nggen ndi urun dayung-i dŭn Bilhah di Rachel da jadi pinguses-i.)

³⁰ Jacob nyibŭŭs gŭh ngga Rachel, ka ayŭh rindu Rachel rabis dŭ so Leah. Ka ayŭh nyiraja yŭn Laban ju sawa dinge.

Bara Anak Jacob

³¹ Kan TUHAN kiris pinyirindu di Leah kurang dŭ so di Rachel, Ayŭh bada Leah mira biranak, pak Rachel gibabŭ dŭh.

³² Leah bite ka biranak ndi anak dari. Ayŭh nang, “TUHAN mbŭh kiris pinyusah ku, jadi madin banŭh ku re rindu aku.” Ka-i kadŭn anak anŭ Reuben.

³³ Ayŭh bite dinge ka biranak ndi anak dari dinge. Ayŭh nang, “TUHAN mbŭh nggen anak ati di aku gŭh, amai Ayŭh mbŭh dingah aku dŭh dog rindu”; ka-i kadŭn anak anŭ Simeon.

³⁴ Ka ayŭh bite dinge ka biranak ndi anak dari dinge. Ayŭh nang, “Madin banŭh ku re rabis rakat di aku amai aku mbŭh biranak yŭn-i taruh madis anak dari.” Ka-i kadŭn anak anŭ Levi.

³⁵ Komŭnŭ ayŭh bite dinge ka biranak ndi anak dari dinge. Ka-i nang, “Kari ati aku re muji TUHAN;” Ka-i kadŭn anak dari-i anŭ Judah. Ripas anŭ ayŭh dŭh tia biranak.