TIBIRIK 15 - Hakcipta - Biatah Bidayuh

Simanya Tapa ngga Abram

¹ Ripas anŭ, Abram kiris kayuh keya ka darŭm pŭmŭh ka dingah TUHAN nang di adŭp-i, “Dŭhnyah taru, Abram, Aku re grindung kuu so pinyusah ka re nggen di kuu upah bās.”

² Pak Abram nam, “TUHAN Raja, ani kana-i re upah Mai di aku, amai aku dŭh biyŭn anak? Daya adi re jadi pimunān ku kaŭs-i Eliezer so Damascus.

³ Kaam dŭh nggen anak di aku, ka ndi naan so urun ku re dapu buat-rata ku.”

⁴ Komŭnŭ ayŭh dingah TUHAN minyu ngga adŭp-i dinge: “Eliezer, urun mu anŭ dŭh re dapu buat-rata mu; anak dari adŭp mu re jadi pimunān mu.”

⁵ TUHAN taban ayŭh ngga ruah ka sapa ka nang, “Tingga rangit ka suba mirang dudu bitang; kuu re biyŭn bagŭ sesang mun anŭ gŭh.”

⁶ Abram na pinyabah-i di TUHAN, ka sabab anŭ meh TUHAN mbŭh raru munos asŭng-I di ayŭh ka ngitong ayŭh tŭnggŭn.

⁷ Komŭnŭ TUHAN nang di ayŭh, “Aku ati TUHAN, adi mbŭh taban kuu ngga ruah so Ur di Babylonia, ka re nggen di kuu tarun tana ati bada jadi tung jamu.”

⁸ Pak Abram siken, “TUHAN Raja, simuki aku re puan nang tana ati re jadi tung jaku?”

⁹ TUHAN nam, “Taban ka yŭn Ku ndi dayung sapi, ndi kambing, ka ndi dari biri, barang pŭrŭng ngara adi taruh sawa umbur-i, samŭn ndi manuk tikukur ngga ndi manuk asang.”

¹⁰ Abram taban dāng dāng anŭ ka Tapa, mire nyinuwŭh pŭrŭng dāng anŭ ka tipan pire pire anŭ da situra ngga pire pire adŭp-i, biratan duwŭh baris; pak ayŭh dŭh mire manuk manuk anŭ.

¹¹ Dudu manuk volcha mandŭg mūn ka mbap di tunduh dagin dagin dāng anŭ, pak Abram krutak kasig ngara da bu.

¹² Kan batŭh andu mbŭh simŭdŭp, Abram guring rasu bŭŭs rŭrŭ, ka yang adi taru ngga tikŭnŭd kirurung ayŭh.

¹³ TUHAN nang di ayŭh, “Bara sesang mu re jadi bara daya saruh di tarun tana daya; ngara re jadi urun diginŭ ka re dog pijera sitadŭn pat ratus sawa.

¹⁴ Pak Aku re ngukum bangsa anŭ adi piurun ngara, ka kan ngara bu so tarun tana daya anŭ, ngara re taban bagŭ buat-rata.

¹⁵ Adŭp mu re udip ndŭg ka minyamba, re kabŭs ngga sanang, ka re dog kubur.

¹⁶ Ripas pat turap udip di tarun tana daya, nŭ ka sesang mu re pari mari kamati, amai Aku dŭh re pibu daya Amor ndŭg ka ngara mbŭh jadi ruai arap adi ngga ngara dŭh siŭn dŭh dog ukum.”

¹⁷ Kan batŭh andu mbŭh simŭdŭp ka andu mbŭh karŭm, ndi priok apui adi birasuh ka ndi siru' adi bijireb gŭgŭh nandŭng mutas so asah pire pire pŭrŭng dāng anŭ.

¹⁸ Komŭnŭ TUHAN ndai simanya-I diginŭ ngga Abram. Ayŭh nang, “Aku bijanji an nggen di bara sesang mu sopŭrŭg tarun tana ati so siri baat Egypt ndŭg Yang Euphrates,

¹⁹ samŭn tarun tana daya Ken, daya Keniz, daya Kadmon,

²⁰ daya Hitti, daya Periz, daya Rephaim,

²¹ daya Amor, daya Canaan, daya Girgash, ka daya Jebus.”