TIBIRIK 10 - Hakcipta - Biatah Bidayuh

Sesang Bara Anak Dari Noah

¹ Ati inŭh sesang bara anak dari Noah; Shem, Ham, ngga Japheth. Ngara ati adi taruh madis biyŭn anak anak dari ripas uba anŭ.

² Bara anak dari Japheth inŭh Gomer, Magog, Madai, Javan, Tubal, Meshech, ngga Tiras. Ngara inŭh tayung-babuk bara daya adi tarik dŭn ngara.

³ Sesang Gomer inŭh daya Ashkenaz, Riphath, ngga Togarmah.

⁴ Sesang Javan inŭh daya Elishah, Spain, Cyprus, ka Rhodes;

⁵ ngara inŭh tayung-babuk daya adi rŭŭ di bŭngŭn rawŭt ka di anak anak purau. Ngara inŭh sesang Japheth, udip nanyam ka tibaran tibaran-asar ngara ngga rais ngara; barang tibaran minyu piminyu adŭp-i.

⁶ Bara anak Ham: Cush, Egypt, Libya, ngga Canaan. Ngara inŭh tayung-babuk bara daya adi tarik dŭn ngara.

⁷ Sesang Cush inŭh daya Seba, Havilah, Sabtah, Raamah, ngga Sabteca. Sesang Raamah inŭh daya Sheba ngga Dedan.

⁸ Cush biyŭn ndi anak dari dŭn Nimrod. Ayŭh inŭh sibungas pinyerang adi timagah di ong.

⁹ Ngga pinurung TUHAN ayŭh jadi pingasū adi timagah; anŭ meh sabab daya ari nang, “Isa-i TUHAN bada kuu jadi pingasū adi timagah mun Nimrod!”

¹⁰ Jadi sibungas rais adi dog mritah-i inŭh Babylon, Erech, ka Accad, so taruh-i di Babylonia.

¹¹ So tarun tana anŭ, ayŭh di ka Assyria, ka pijog kupo Nineveh, Rehoboth Ir, Calah,

¹² ngga Resen adi di asah Nineveh ngga kupo bās Calah.

¹³ Bara sesang Egypt inŭh daya Lydia, Anam, Lehab, Naphtuh,

¹⁴ Pathrus, Casluh, ngga daya Crete, adi tayung-babuk daya Philistine.

¹⁵ Anak anak dari Canaan inŭh Sidon adi pinuai, ngga Heth adi sude-i. Ngara inŭh tayung-babuk bara daya adi tarik dŭn ngara.

¹⁶ Canaan gŭh adi tayung-babuk daya Jebus, Amor ngga Girgash,

¹⁷ daya Hivi, Arki, ngga Sini,

¹⁸ daya Arvad, Zemar, ngga Hamath. Barang tibaran-asar daya Canaan papah

¹⁹ ndŭg baat rais ngara piguru so Sidon ka siratan nuju Gerar sindŭk Gaza, ka timor nuju Sodom, Gomorrah, Admah, ngga Zeboiim sindŭk Lasha.

²⁰ Ngara inŭh sesang Ham adi masin masin rŭŭ di rais adŭp ngara ka masin masin minyu piminyu adŭp-i.

²¹ Jadi Shem, adi kaka pinuai Japheth inŭh babuk daya Hebrew.

²² Bara anak dari Shem inŭh Elam, Asshur, Arpachshad, Lud, ngga Aram. Ngara inŭh tayung-babuk bara daya adi tarik dŭn ngara.

²³ Sesang Aram inŭh daya Uz, Hul, Gether, ngga Meshek.

²⁴ Arpachshad inŭh sama Shelah, adi sama Eber.

²⁵ Ka Eber biyŭn duwŭh anak dari: Ndi dŭn Peleg, amai di jaman-i pimudip manusia di ong taŭn-i birutung rutung; ka sianŭ ndi dŭn Joktan.

²⁶ Sesang Joktan inŭh daya Almodad, Sheleph, Hazarmaveth, Jerah,

²⁷ Hadoram, Uzal, Diklah,

²⁸ Obal, Abimael, Sheba,

²⁹ Ophir, Havilah ngga Jobab. Sopŭrŭg ngara inŭh sesang Joktan.

³⁰ Tarun tana adi yŭn ngara rŭŭ, bayah-i inŭh so Mesha ndŭg Sephar di rais tarun tana sandah tura ka timor.

³¹ Ngara inŭh sesang Shem adi udip ngga barang tibaran-asar ngara ngga rais ngara; barang tibaran-asar minyu piminyu adŭp-i.

³² Sopŭrŭg ngara inŭh sesang Noah, so bangsa ndi ndŭg bangsa andi, nanyam taris asar ngara. Sopŭrŭg bangsa di ong inŭh sesang bara anak dari Noah ripas uba bās anŭ.