RUTH 4 - Hakcipta - Biatah Bidayuh

Boaz Sawŭn Ruth

¹ Boaz di ka tarun adi yŭn daya tikuruk di tiban-bās kupo ka guru diginŭ. Komŭnŭ madis Elimelech adi rabis sindŭk, daya adi Boaz muko nyabŭt, agi murah, ka Boaz bagan ayŭh, “Mandŭg kamati, jerā ku, ka sua guru.” Ka ayŭh mandŭg ka sua guru.

² Boaz bagan simŭng naan pinguru kupo ka bada ngara sua guru. Kan ngara mbŭh guru,

³ Boaz minyu, nang di madis-i anŭ, “Amai madin Naomi mbŭh pari so Moab, ayŭh raan jua tana adi dog dapu madis ta Elimelech.

⁴ Ka aku pikir kuu patut puan pasar kayuh ati. Jadi madin, kambŭi kuu raan-i, kuu miris-i di sirung jawin ngara ati adi agi guru digiti. Pak kambŭi kuu abah miris-i, kidaan nang abah, sabab daya adi biyŭn hak diŭ miris-i inŭh kuu; komŭnŭ, ka-i aku.” Daya anŭ nam, “Aku raan miris-i.”

⁵ Boaz nang, “Kana, kambŭi kuu miris tana anŭ so Naomi, kuu an miris Ruth gŭh, adi dayung uban so Moab, isa tana anŭ tungang babŭ di rawang dari anŭ adi mbŭh kabŭs.”

⁶ Dari anŭ nam, “Kambŭi sakanŭ, dŭh garang aku jadi miris tana anŭ, amai gŭt-i bara anak adŭp ku dŭh re sua dapu-i. Kuu adŭ miris-i; abah aku.”

⁷ Di jaman anŭ, kan daya an nyirase har bijua, puan kah har pasar nyambi buat-rata, taŭn-i adat yŭn daya adi jua pirudos kasut-i so kaja-i ka nggen-i di daya adi miris. Simŭnŭ bara daya Israel natu nang kayuh anŭ mbŭh tirase.

⁸ Jadi kan ayŭh nang di Boaz, “Kuu adŭ miris-i,” ayŭh pirudos kasut-i so kaja-i ka nggen-i di Boaz.

⁹ Komŭnŭ, Boaz nang di bara pinguru samŭn daya adi bŭkŭn adi agi diginŭ, “Angān jadi saksi andu ati nang aku mbŭh miris so Naomi barang masam kayuh adi dog dapu Elimelech ngga anak dari-i Chilion ngga Mahlon.

¹⁰ Ngga nambah anŭ, Ruth adi daya Moab, dayung uban Mahlon, jadi sawŭn ku. Ati re bada buat-rata anŭ gibabŭ darŭm rawang dari anŭ adi mbŭh kabŭs, ka taris asar rawang-i re babŭ di dupan bara daya-i ngga di darŭm kupo adŭp-i. Angān jadi saksi di kayuh ati andu ati.”

¹¹ Bara pinguru ngga adi bŭkŭn nang, “Sawŭ, kieh inŭh jadi saksi. Isa-i TUHAN bada sawŭn mu jadi mun Rachel ngga Leah adi biranak bagŭ anak yŭn Jacob. Isa-i kuu jadi kaya darŭm manak Ephrath ka jadi timagah di Bethlehem.

¹² Isa-i bara anak adi TUHAN re nggen di kuu so dayung adi mara ati bada rawang mu mun rawang Perez, adi anak Judah ngga Tamar.”

Boaz ngga Bara Sesang-I

¹³ Jadi Boaz taban Ruth ngga maad jadi sawŭn-i. TUHAN nyiberkat ayŭh, ka ayŭh bite ka biyŭn ndi anak dari.

¹⁴ Bara dayung nang di Naomi, “Puji ka TUHAN! Ayŭh mbŭh nggen di kuu ndi sukuh dari andu ati adi re kingat jaga kuu. Isa-i anak dari ati jadi timagah di Israel.

¹⁵ Iban dayung mu rindu kuu, ka mbŭh kana ngga kuu rabis so ju naan anak dari. Madin ayŭh mbŭh nggen di kuu ndi sukuh dari adi re taban pimudip bauh yŭn mu ka re kingat jaga kuu kan kuu mbŭh minyamba.”

¹⁶ Naomi tambit anak anŭ, dakŭp-i, ka nakit kingat jaga ayŭh.

¹⁷ Bara dayung adi rasū ngara kadŭn anak anŭ Obed. Ngara kidaan di barang naan daya, “Naomi mbŭh biyŭn ndi anak dari!” Obed jadi sama Jesse, ka Jesse jadi sama David.

^18-22 Anŭ inŭh taris rawang so Perez ndŭg David: Perez, Hezron, Ram, Amminadab, Nahshon, Salmon, Boaz, Obed, Jesse, David.