ROME 13 - Hakcipta - Biatah Bidayuh

Munki Ata patut di ribo Bara adi Mritah

¹ Barang naan ata dŭh siŭn dŭh an nundok di bara adi mritah, sabab ngara dŭh bisa mritah kambŭi dŭh so pinyibada Tapa, ka ngara adi mbŭh agi mritah taŭn-i mbŭh so ka pingatur adŭp Tapa.

² Asi asi adi matah ngara adi mritah mbŭh matah kayuh adi Tapa ko bada; ka daya adi ndai simŭnŭ re taban ukum di tunduh adŭp-i.

³ Amai bara adi mritah dŭh dog taru ngara adi ndai kana, pak dog taru ngara adi ndai arap. Angān dŭh an biyŭn atin taru di ngara adi mritah? Ndai garang kayuh kana, ka ngara re muji angān,

⁴ sabab ngara urun Tapa adi nyiraja yŭn kana adŭp ngan. Pak kambŭi angān ndai kayuh arap, taru meh ngara, sabab kuasa ngara ngga ngukum taŭn-i yŭh. Ngara inŭh bara urun Tapa adi taban ukum Tapa di tunduh daya adi ndai sarah.

⁵ Sabab anŭ angān dŭh siŭn dŭh an nundok di ngara adi mritah; kayuh anŭ simŭnŭ dŭh-i sabab nŭŭh taru ukum Tapa adŭ, pak sabab nŭŭh puan taŭn-i patut nŭŭh ndai simŭnŭ.

⁶ Ngapŭi angān bayar gŭh suke, sabab ngara adi mritah taŭn ndai kraja yŭn Tapa darŭm ngara nyiraja.

⁷ Bayar meh kayuh adi angān patut bayar ka ngara; bayar ka ngara suke barang ngga suke rata ngan, buang biradat ka stabi di sopŭrŭg ngara.

Simuki angān Patut ngga Dingan Ngan

⁸ Dŭhnyah birutang di tadŭ daya. Kaŭs-i angān patut birutang darŭm pinyirindu yŭn dingan ngan. Asi asi adi ndai simŭnŭ mbŭh sita Ukum-adat.

⁹ Pinyipesan nang, “Dŭhnyah tanggah; dŭhnyah siŭ daya; dŭhnyah naku; dŭhnyah ripong di kayuh adi daya dapu.” Sopŭrŭg ati, samŭn adi bŭkŭn mbŭh pungus darŭm ndi pinyipesan, “Rindu dingan ngan nimun angān rindu adŭp ngan.”

¹⁰ Kambŭi angān rindu daya, angān dŭh re ndai sarah di ngara; rindu daya inŭh pungus pinganang Ukum-adat.

¹¹ Angān dŭh siŭn dŭh an ndai simŭnŭ, sabab angān puan tika-i mbŭh mandŭg adi ngga angān patut burah so bŭŭs. Amai tika adi ngga ata dog nyiramat madin mbŭh sindŭk. Dawŭ-i jo, darŭm tipuh adi ngga ata sibungas sabah.

¹² Ngarŭm mbŭh re ripuan, andu mbŭh re nusak. Ja meh ata taran pingandai karŭm, ka sidia yŭn pimudip darŭm jawa.

¹³ Ja ata nakit ngatur pimudip ta, nimun daya adi udip darŭm jawa. Dŭh tia ndai rubi kais, pimabuk, pimudip adi dŭh tatu, pingandai kais, bikaii ka sina.

¹⁴ Pak bada Tuhan Jesus Kristus jadi pinyigrindung ngan, ka dŭh tia nurut pinyiripong tibiat pŭrŭng ngan adi bidosa ngga pimunos adŭp ngan.