ROME 11 - Hakcipta - Biatah Bidayuh

Tapa Masi di Daya Israel

¹ Aku siken meh garang: Agi kah Tapa tirawan daya adŭp-I? Manŭn dŭh! Adŭp ku ati daya Israel, sesang Abraham, so tibaran-asar Benjamin.

² Tapa dŭh tirawan daya-I, adi-I mien so sibungas-i. Angān puan sakaki pinganang Surat-kudus di dundan pasar Elijah adi ngadu daya Israel ka Tapa:

³ “Tuhan, ngara mbŭh siŭ bara nabi Mai ka nyirubuh mija mija-sambah Mai; aku ati adŭ adi dŭm, ka madin ngara mbŭh suba an siŭ aku.”

⁴ Ani pinyinam Tapa di ayŭh? “Aku mbŭh nguruk yŭn adŭp ku 7000 naan daya adi dŭh nyambah tapa-kadong, Baal.”

⁵ Kayuh babŭ mun anŭ gŭh madin: agi dŭm tibaran adi siit adi Tapa mbŭh mien sabab pinyirasi mandis-I.

⁶ Ayŭh mien ngara sabab pinyirasi mandis-I, dŭh sabab kayuh adi ngara ko ndai. Amai kambŭi-i bisangan di kayuh adi daya ndai, pinyirasi mandis-I dŭh sawŭ pinyirasi-mandis.

⁷ Ani meh? Daya Israel mating dapŭd kayuh adi ngara jiroh. Adŭ-i tibaran adi siit adi Tapa mbŭh mien adi dapŭd kayuh anŭ; adi bŭkŭn mbŭh bangam di pinyibagan Tapa.

⁸ Sak adi nang Surat-kudus, “Tapa mbŭh bada pikir ngga atin ngara padŭd; ndŭg andu ati ngara dŭh kiris bait dingah.”

⁹ Ka David nang, “Isa-i ngara dog nakap ka dog mirakap di tika gawai; isa-i ngara rabu, isa-i ngara dog ukum!

¹⁰ Isa-i batŭh ngara karak ka dŭh tungang kiris; ka bada ngara adu adu sangsara da pinyusah.”

¹¹ Aku siken, garang: Kan daya Jahudi sikak, agi kah ngara rabu ndŭg ka dŭh tungang makat? Dŭh! Sabab daya Jahudi mbŭh bidosa, pinyiramat mbŭh mandŭg ka daya adi dŭh bangsa Jahudi, isa-i daya Jahudi sina di ngara.

¹² Dosa daya Jahudi mbŭh taban bagŭ berkat ka ong, ka pimudip sirata daya Jahudi darŭm roh mbŭh taban bagŭ berkat ka daya adi dŭh bangsa Jahudi. Ngapŭi meh, jung rabis bās berkat anŭ re kambŭi sopŭrŭg daya Jahudi dog nyiramat!

Pinyiramat yŭn Daya adi Dŭh bangsa Jahudi

¹³ Aku ati madin minyu ngga angān adi dŭh bangsa Jahudi: Siragi aku ati pinyuruh yŭn daya adi dŭh bangsa Jahudi, aku re mingangŭn di kraja ku.

¹⁴ Jaka ku aku tungang piripong daya so bangsa adŭp ku, ka ngga simŭnŭ dapŭd nyiramat kada ngara.

¹⁵ Amai kan ngara dog tirawan, daya bangsa bŭkŭn birubah jadi dingan Tapa ka dŭh tia jadi pinganyu-I. Munki meh-i re garang, kan ngara mbŭh dog trima? Anŭ re keya ka pakat daya kabŭs da pari udip!

¹⁶ Kambŭi sibungas kiping ruti dog nggen di Tapa, ndi baru anŭ mbŭh tung jangi gŭh; ka kambŭi uat tŭngŭn kayuh dog jugan ka Tapa, dudu daan-i mbŭh jangi gŭh.

¹⁷ Kada daan tŭngŭn kanā adi taŭn daya purun dog kadi, ka ndi daan so tŭngŭn kanā tuān dog tubu dieh. Angān daya adi dŭh bangsa Jahudi agi keya ka tŭngŭn kanā tuān, ka madin mbŭh samah dapu pimudip roh adi tagap anŭ adi tung daya Jahudi.

¹⁸ Ngapŭi meh, angān dŭh siŭn ngamun ngara adi ko dog kadi keya ka daan. Simuki angān re mingangŭn? Angān batur-i daan; angān dŭh digŭng uat; uat inŭh adi digŭng angān.

¹⁹ Pak angān re nang, “Sawŭ, pak daan daan anŭ dog kadi isa agi yŭn ku.”

²⁰ Anŭ sawŭ. Daan daan anŭ dog kadi sabab ngara dŭh sabah, ka angān babŭ yŭn yŭn ngan sabab angān sabah. Pak dŭhnyah angān mingangŭn; taru kidŭ-i angān patut.

²¹ Tapa kadi daya Jahudi, adi keya ka daan daan asar; angān pikir Ayŭh re dŭh ndai simŭnŭ di angān?

²² Digiti meh ata kiris munki masam mandis-i ka munki masam mangah-i Tapa. Ayŭh mangah ngga ngara adi mbŭh rabu, pak mandis ngga angān, anŭ inŭh kambŭi angān bijijŭ darŭm mandis-I. Pak kambŭi angān dŭh, angān gŭh re dog kadi.

²³ Ka kambŭi daya Jahudi taran atin ngara adi dŭh sabah, ngara re dog na pari ka yŭn adŭp ngara; amai anŭ Tapa tungang ndai.

²⁴ Angān daya adi dŭh bangsa Jahudi agi keya ka daan so tŭngŭn kanā tuān adi dog kadi so tŭngŭn-i, ka dŭh nanyam ka asar-i, dog tubu di tŭngŭn kanā adi taŭn daya purun. Daya Jahudi agi keya ka tŭngŭn adi taŭn daya purun; ka-i re rabis udah Tapa tubu daan daan-i pari di tŭngŭn-i.

Tapa Masi di Sopŭrŭg Manusia

²⁵ Agi kayuh adi sawŭ adi dog sukan, bara dingan ku, adi aku raan angān puan, amai-i re bada angān dŭh pikir adŭp ngan bijak. Anŭ inŭh pinyibaking daya Israel dŭh-i re tan adu adu, pak kaŭs-i re tan ndŭg andu adi ngga sukup kiang daya adi dŭh bangsa Jahudi mandŭg ka Tapa.

²⁶ Ka simuti inŭh sopŭrŭg daya Israel re dog nyiramat. Sak adi nang Surat-kudus, “Pinyikudip re mandŭg so Zion ka kadi sopŭrŭg kayuh arap so bara sesang Jacob.

²⁷ Aku re ndai simanya ati ngga ngara kan aku taran dosa ngara.”

²⁸ Sabab daya Jahudi tirawan Agah Kana, ngara mbŭh jadi pinganyu Tapa yŭn kana ngan daya adi dŭh bangsa Jahudi. Pak sabab-i mbŭh pimien Tapa, ngara mbŭh dingan-I sitagar tayung-babuk ngara.

²⁹ Amai Tapa dŭh inŭh nukar pikir-I pasar asi adi-I mien ka asi adi-I nyiberkat.

³⁰ Mun angān adi dŭh bangsa Jahudi, angān ko nyibireu pinganang Tapa dawŭ-i; pak madin angān mbŭh kambat masi Tapa sabab daya Jahudi dŭh an dingah pinganang Tapa.

³¹ Simŭnŭ gŭh, sabab masi adi angān mbŭh kambat, daya Jahudi madin mbŭh nyibireu pinganang Tapa, siŭn ngara gŭh madin kambat masi Tapa.

³² Amai Tapa mbŭh bada sopŭrŭg daya jadi keya ka daya-takap yŭn atin ngara adi dŭh an dingah pinganang-I, isa Ayŭh bisa kiren masi di sopŭrŭg ngara.

Puji ka Tapa

³³ Munki masam bās-i kaya Tapa! Munki masam tŭrŭp-i pinyibijak-I ngga pinyipuan-I! Asi tungang kidaan rati pinyiraan-I? Asi tungang mirati pingandai-I?

³⁴ Sak adi nang Surat-kudus, “Asi puan pikir Tuhan? Asi tungang pitayan Ayŭh?

³⁵ Asi mbŭh nggen kayuh di Ayŭh da-I gati?”

³⁶ Amai sopŭrŭg kayuh mbŭh-I napa, ka sopŭrŭg kayuh adi agi jadi so ka Ayŭh ka yŭn Ayŭh. Bragah ka Tapa ndŭg situi tui! Amen.