ROME 1 - Hakcipta - Biatah Bidayuh

¹ So Paul, urun Kristus Jesus, pinyuruh adi mbŭh dog mien ka dog bagan Tapa da nyuse Agah Kana-I.

² Agah Kana anŭ mbŭh tui jah-i Tapa ko bijanji so baba bara nabi-I an nggen, nimun adi mbŭh dog nuris darŭm Surat-kudus.

³ Agah Kana anŭ inŭh pasar Anak-I, Tuhan ta Jesus Kristus, adi so ka tibiat manusia, taŭn-I mandŭg so sesang David;

⁴ pak so ka tibiat-I adi kudus, Ayŭh taŭn dog kiren ngga kuasa adi raru bās mbŭh Anak Tapa darŭm-I dog pakat so kabŭs.

⁵ So Ayŭh Tapa mbŭh nggen di aku utung da jadi pinyuruh yŭn adŭn Kristus, siŭn bisa taban daya so barang bangsa da sabah ka tunda pinganang-I.

⁶ Angān mbŭh ndi so bangsa anŭ, angān adi di Rome, adi Tapa mbŭh bagan da dog dapu Jesus Kristus.

⁷ Ngapŭi madin aku nuris ka angān adi di Rome, adi Tapa rindu ka mbŭh bagan da jadi daya-I: Isa-i Tapa Sama ta ngga Tuhan ta Jesus Kristus nggen di angān pinyirasi-mandis ngga damai.

Dua Trima Kaseh

⁸ Diŭ aku nggen trima kaseh di Tapa ngga adŭn Jesus Kristus yŭn sopŭrŭg ngan, sabab ndi ong ong mbŭh dingah pasar pinyabah ngan.

⁹ Tapa inŭh saksi kayuh adi aku nang agi sawŭ; darŭm aku nyuse Agah Kana pasar Anak-I aku bituan di Ayŭh adi Tapa ngga siabo atin ku. Tapa puan aku ingat angān

¹⁰ tiap kari aku simayang. Aku mite Tapa, pinŭbŭn-I re bada aku tungang munan angān di tipuh ati nanyam ka pinyiraan adŭp-I.

¹¹ Amai aku ruai aus an bidapŭd ngga angān, siŭn aku bisa samah ngga angān berkat roh ngga nagap angān.

¹² Rati kayuh adi nang ku, isa-i sopŭrŭg ta, angān ngga aku, bisa samah samah dapŭd pinurung; angān so pinyabah ku ka aku so pinyabah ngan.

¹³ Bara dingan ku, aku raan angān puan nang mbŭh piawet aku ngasa adŭp ku an di munan angān, pak ari dŭh tŭk amai kayuh agi matŭn aku. Aku raan ngajar daya di dupan ngan gŭh da ngaku Jesus, nimun di dupan daya adi dŭh bangsa Jahudi.

¹⁴ Amai aku biyŭn pinura adi dŭh siŭn dŭh aku ndai yŭn sopŭrŭg bangsa daya, di daya adi biradat ngga daya adi dŭh biradat, di daya adi pitar-pandai ngga daya adi dŭh pitar-pandai.

¹⁵ Jadi meh, aku graŭh an nyuse Agah Kana anŭ di angān adi rŭŭ di Rome.

Kuasa Agah Kana

¹⁶ Aku mingangŭn di Agah Kana anŭ; Agah kana anŭ inŭh kuasa Tapa ngga nyiramat sopŭrŭg adi sabah, daya Jahudi diŭ, komŭnŭ daya adi dŭh bangsa Jahudi.

¹⁷ Amai Agah Kana anŭ kiren munki Tapa bada daya bamai ngga adŭp-I: anŭ inŭh so ka pinyabah so sibungas-i ndŭg sikasŭn-i. Sak adi nang Surat-kudus, “Daya adi mbŭh bamai ngga Tapa so ka pinyabah re udip.”

Sarah Manusia

¹⁸ Baji Tapa dog pinandŭng so shorga rawan sopŭrŭg dosa ngga arap manusia, pingandai ginaka adi matŭn manusia puan ajar adi sawŭ pasar Tapa.

¹⁹ Tapa ngukum ngara, sabab kayuh adi dapŭd dog puan pasar Tapa taŭn mbŭh manŭn di ngara, amai adŭp Tapa inŭh adi bada-i manŭn.

²⁰ So sibungas Tapa napa ong, kayuh anŭ adi dŭh tungang dog kiris pasar Ayŭh, anŭ inŭh kuasa-I adi tan adu adu ngga tibiat adŭp-I adi Tapa, mbŭh granan tatŭng; sopŭrŭg-i mbŭh tungang dog kiris darŭm kayuh kayuh adi Tapa mbŭh napa. Jadi daya manŭn dŭh biyŭn aran re nang adŭp-i dŭh puan.

²¹ Ngara nang adŭp-i puan Tapa, pak ngara dŭh nggen stabi di Ayŭh; dŭh gŭh ngara nggen trima kaseh di Ayŭh. Pak gŭt-i pikir-kira ngara mbŭh jadi au-tarun, ka pikir ngara adi mapung mbŭh jadi karŭm pipet.

²² Ngara nang adŭp-i bijak, pak ngara budo;

²³ Ngara dŭh nyambah Tapa adi udip adu adu, pak nyambah gambar gambar kayuh adi mun manusia, mun manuk, mun dāng, puan kah mun anŭ adi bigawang.

²⁴ Ngapŭi Tapa mbŭh tandah adŭ ngara ndai kayuh kayuh anŭ adi kais adi adŭp ngara suka ndai; ngara mbŭh ndai kayuh adi paris ngga dingan-i.

²⁵ Ngara nyambi ajar adi sawŭ pasar Tapa ngga pinyikadong; ngara nyambah ka bituan di kayuh adi Tapa ko napa, dŭh nyambah adŭp Tapa, adi patut dog muji ndŭg situi tui! Amen.

²⁶ Sabab ngara ndai simŭnŭ, Tapa mbŭh tandah adŭ ngara ngga pingandai kais-i. Bara dayung ani mbŭh marik atur tibiat pŭrŭng ka pimunos adŭp-i di dayung dupan dayung.

²⁷ Mun anŭ gŭh bara dari, mbŭh pasan atur tibiat pŭrŭng adi taŭn yŭn dayung adŭ, ka mbŭh ripong di bara adŭp-i adi samah dari. Dari ndai pingandai adi paris dupan adŭp-i adi samah dari, ka sabab anŭ ngara mbŭh sidia di tunduh adŭp-i ukum nanyam sarah adi ngara mbŭh ndai.

²⁸ Sabab ngara abah ngaku Tapa, Tapa mbŭh tandah ngara ka darŭm pikir adi arap, isa ngara ndai kayuh adi ngara dŭh patut ndai.

²⁹ Ngara mbŭh brisi ngga barang masam sarah, arap, tama, ka akar arap; puno ngga atin sina, atin adi an siŭ daya, atin adi an birawan, atin adi an nipu, ka atin adi bidendam. Ngara ngitong

³⁰ ka kinarap dingan; ngara tiru di Tapa, ka an bakit daya, sambuh, miruap; ngara jiroh bagŭ masam aran ngga ndai arap; ngara nyibireu pinganang pimas-i;

³¹ ngara dŭh biyŭn pikir-kira atin; ngara dŭh sita janji, ngara dŭh biyŭn atin mandis ngga masi di daya.

³² Ngara puan ukum-adat Tapa nang daya adi udip mun anŭ patut dog ukum kabŭs. Gŭt-i ngara, dŭh-i babŭ ndai kayuh adi mun anŭ adŭ, pak mbŭh ngatat daya bŭkŭn ndai simŭnŭ.