RAGU 7 - Hakcipta - Biatah Bidayuh

Dari

¹ Kuu inŭh dayung adi raru ramus! Mbŭh raru ramus inŭh kaja mu pakai sendal anŭ! Bŭrŭng pŭŭh mu inŭh keya ka pingandai daya adi pandai bibutik.

² Pasid mu bŭrŭng keya ka makuk adi bŭrŭng, adi bŭn mating wain bigaur ngga rapah dieh. Kupong mu keya ka bŭtŭs gandom, dog kirurung bunga lili.

³ Sudo mu keya ka anak apid peyu, keya ka duwŭh jerak.

⁴ Tungo mu keya ka tawā bŭbŭt gajah. Batŭh mu keya ka pagong di kupo Heshbon, sindŭk tiban-bās kupo bās anŭ. Undung mu ramus mun tawā Lebanon adi mijog nura kupo Damascus.

⁵ Ubak mu keya ka Darŭd Carmel. Ubok mu raru ramus; pinyiramus-i tungang tarik atin raja.

⁶ Mbŭh raru ramus kuu, raru sangŭn; mbŭh sukup munos asŭng ku kinyam pinyiawang mu.

⁷ Ajog mu bigatung keya ka tŭngŭn kurma, ka sudo mu keya ka tundun buwa-i.

⁸ Aku re jakŭh tŭngŭn-i ka tambit buwa-i. Di aku, sudo mu inŭh keya ka tundun buwa anggor, asŭng mu buuh buwa epal,

⁹ ka baba mu keya ka wain adi grua. Isa-i wain aman ka dari adi aku awang, aman di bibis ka di jipŭh-i.

Dayung

¹⁰ Aku mbŭh tung dari adi aku awang, ka ayŭh ruai raan aku.

¹¹ Mandŭg, sayang, ja di ka sapa rais ka nyirŭmŭn di anak kupo.

¹² Ata re makat awar ka di tingga tŭngŭn anggor, di tingga kadŭ-i mbŭh timbu, kadŭ-i mbŭh mirarak ka tingga tŭngŭn delima kadŭ-i mbŭh piruah rarak-i. Diginŭ aku re nggen di kuu pinyiawang ku.

¹³ Kuu dapŭd kadŭk dagŭn uduh-uri, ka sopŭrŭg buwa adi sidi sindŭk tiban ta. Sayang, aku mbŭh nyikŭn yŭn mu buwa adi bauh ngga adi amba.