RAGU 6 - Hakcipta - Biatah Bidayuh

Bara Dayung

¹ Dayung adi siabo ramus, kamaki dari adi kuu awang? Kidaan di kieh kamaki ayŭh, isa kieh bisa turung kuu jiroh ayŭh,

Dayung

² Dari adi aku awang mbŭh di ka teya-i, di yŭn tŭngŭn balsam timbu. Ayŭh paan dāng-i di teya ka nguruk bunga lili.

³ Dari adi aku awang inŭh jaku, ka aku inŭh jangi; ayŭh paan dāng-i di karu bunga lili.

Ragu adi numbor Rimŭh Dari

⁴ Kuu adi aku awang, kuu ramus mun Jerusalem, ramus mun kupo Tirzah, raru ramus mun dudu kupo kupo bās anŭ.

⁵ Taran batŭh mu so aku; piningga mu bada aku ramah. Ubok mu girumbang, mun kaban kambing mūn sandah Gilead.

⁶ Jipŭh mu buda mun kaban biri adi bauh ko dog mamuh. Sopŭrŭg-i sipasang keya ka anak-apid biri, ndi mating gŭh manyap.

⁷ Paŭp mu nyirinyak so darŭm banang tutu jawin mu.

⁸ Bada raja biyŭn nŭm puru rani, mai dayung nyikŭn, ka dayung mara adi rabis so tungang dog mirang!

⁹ Pak aku rindu kaŭs-i ndi naan, ka ayŭh ramus keya ka manuk asang. Ayŭh anŭ kaŭs anak dayung nyirot sindŭ-i. Sopŭrŭg dayung tingga ka muji ayŭh; rani ngga dayung nyikŭn nang ragu puji ka ayŭh.

¹⁰ Asi ati adi mandŭg mun jawa isan isan? Ayŭh ramus buang jawa, ayŭh nyekar mun batŭh andu bait kah buran.

¹¹ Aku mbŭh mūn di karu tŭngŭn almond an tingga anak tŭngŭn kayuh-udip di rubān, an tingga dawŭn adi bauh di daan tŭngŭn anggor ka rarak di tŭngŭn delima.

¹² Aku kimŭtŭr; angān tanŭ ka bada aku rabis sikirau pinyiawang mun daya adi tukang taban krita kuda matak biperang.

Bara Dayung

¹³ Bitanda, bitanda anak dayung Shulam. Bada kieh tingga kuu bitanda. Mani angān raan tingga aku bitanda di asah jari bara daya adi tingga?