RAGU 5 - Hakcipta - Biatah Bidayuh

Dari

¹ Pingaten dayung ku adi aku siŭt, aku mbŭh mŭrŭt ka darŭm teya ku. Aku nguruk rapah ngga myrrh ku; aku man ju banyis ngga mara banyis ku; aku nok wain ngga sisuh ku. Man, angān adi biawang, ka nok ndŭg ka angān mabuk ngga pinyiawang!

Dayung Ragu adi numbor Pat

² Darŭm aku bŭŭs, atin ku burah. Aku pŭmŭh dari adi aku awang nutok tiban. Bada aku mŭrŭt, dayung ku, manuk asang ku, buwa atin ku. Ubak ku bisa bada sipot-abun, ka ubok ku mirimet bada abun ngarŭm.

Dari Dayung

³ Aku mbŭh kadi piraka ku; ani sah aku kibarui dinge? Aku mbŭh ngu kaja ku; ani sah aku bada-i kais dinge?

⁴ Ayŭh adi aku awang na tangan-i di tiban, atin ku simadup kan ayŭh mbŭh sindŭk.

⁵ Aku makat an bada ayŭh mŭrŭt. Tangan ku muko dog susen inyo myrrh dieh, trinju ku bisa bada piin myrrh, darŭm aku tama abŭt tiban.

⁶ Aku kuka tiban yŭn dari adi aku awang, pak ayŭh mbŭh bu. Aku raru raan dingah sirŭŭn-i! Aku jiroh ayŭh, pak dŭh tungang dapŭd ayŭh; aku bagan ayŭh, pak mating nam.

⁷ Bara adi tukang jaga kupo bidapŭd ngga aku; ngara mukong aku ka bada aku tawan; ngara adi tukang jaga di sindung kupo sirapas jipo ku.

⁸ Bijanji ngga aku, dayung Jerusalem; kambŭi angān agi dapŭd dari adi aku awang, turung kidaan di ayŭh aku ati mbŭh raru sikirau pinyiawang.

Bara Dayung

⁹ Dayung adi siabo ramus, kana dŭ kah dari adi kuu awang so dari bŭkŭn? Ani anŭ adi raru kana pasar ayŭh adi yŭn ami patut bijanji ngga kuu?

Dayung

¹⁰ Dari adi aku awang inŭh ramus buang bake; ayŭh sadi adŭ di dupan simŭng ribu naan dari.

¹¹ Jawin-i keya ka timaga adi jarŭh; ubok-i girumbang, singŭt mun manuk kak.

¹² Batŭh-i ramus mun manuk asang di bŭngŭn piin aman di sungi, manuk asang dog mamuh ngga sisuh ka mijog di bŭngŭn anak sungi.

¹³ Paŭp-i ramus mun teya adi puno ngga rapah ka wangi. Bibis-i keya ka bunga lili, bisa ngga piin myrrh.

¹⁴ Tangan-i ramus, ka-i pakai sisin batuh grua. Pŭrŭng ganan-i keya ka bŭbŭt gajah adi jarŭh, ngga batuh nilam dog na dieh.

¹⁵ Pŭŭh-i keya ka tiang bās alabasta dog na di bangan mas. Ayŭh bās keya ka Darŭd Lebanon ngga tŭngŭn sedar-i adi ramus.

¹⁶ Baba-i sidi dog sium; sopŭrŭg kayuh pasar ayŭh piripong aku. Mun anŭ inŭh dari adi aku awang, bara dayung Jerusalem.