RAGU 1 - Hakcipta - Biatah Bidayuh

¹ Ragu adi siabo kana, so Solomon.

Sibungas Ragu Dayung

² Bibis mu sium aku; Pinyiawang mu kana dŭ so wain.

³ Dagŭn mu buuh ramak; dŭn mu mbŭh keya ka wangi adi dog susen. Mating katŭn dayung re dŭh awang kuu.

⁴ Taban aku, ka ata duwŭh bikaduh bu; jadi raja ku ka taban aku ka birit mu. Ata re gaŭn udip samah, kubo nok, ka ata rŭ rŭ darŭm pinyiawang. Patut inŭh meh sopŭrŭg dayung awang kuu!

⁵ Bara dayung Jerusalem, aku singŭt pak ramus, singŭt mun bari daya Kedar di tarun tana-pajam, pak ramus mun tabir di istana Solomon.

⁶ Dŭhnyah ngamun aku amai aku singŭt, sabab sura inŭh adi bada aku singŭt. Bara jurud ku baji di aku ka bada aku nyiraja di teya anggor. Aku dŭh biyŭn masā re nakit sita ayong ku.

⁷ Kidaan di aku, kuu adi aku awang, kamaki kuu re taban kaban dāng mu di man kupai? Diki dudu dāng mu re rŭŭ so sura batŭh andu yun kumbeng? Re ngga mani aku jiroh kuu di dupan kaban biri pingingat-biri adi bŭkŭn?

Dari

⁸ Dŭh kah kuu puan tarun anŭ, O dayung adi siabo ramus? Panu di tunda kaban biri anŭ; jiroh tarun tana kupai yŭn kambing mu sindŭk bari bari bara pingingat-biri.

⁹ Kuu, dayung adi aku awang, piripong dari keya ka dayung kuda piripong dari kuda krita-kuda Pharaoh.

¹⁰ Ubok mu ramus dog paŭp mu adi nutu arong tungo mu mun batuh brega.

¹¹ Pak kieh re ndai yŭn mu kukong mas dog ngabuh ngga pirak.

Dayung

¹² Raja ku guring di panggo-i, ka wangi ku bada tarun buuh ramak.

¹³ Dari adi aku awang biyŭn dagŭn myrrh buang-i guring di sudo ku.

¹⁴ Dari adi aku awang mbŭh keya ka bunga tarun adi mirarak di teya anggor di Engedi.

Dari

¹⁵ Mbŭh ruai nang ramus-i kuu, dayung adi aku awang; batŭh mu nyirinyak ngga pinyiawang!

Dayung

¹⁶ Mbŭh ruai nang ramus-i kuu, dari adi aku raru siŭt; Raru munos asŭng ku di kuu! Uduh barŭm re jadi tarun yŭn ata guring;

¹⁷ kayuh sedar re jadi parang ramin ta, ka kayuh sipres jadi dek ramin.