PUĀS 4 - Hakcipta - Biatah Bidayuh

Jerusalem ripas Pinyirabu-I

¹ Mas adi mikirib jadi pirŭnŭk; batuh batuh Ramin TUHAN mbŭh mingare di aran.

² Dari dari adi mara dawŭ-i di kupo Zion ko raru brega di ata keya ka mas, pak madin daya nyirundeng ngara keya ka priok saja adi dog ndai so tana-riyat.

³ Sirabi ka sindŭ kasong tarun nyisuh gŭh anak-i, pak daya ku mbŭh keya ka manuk onta, gaok ngga anak-i.

⁴ Ngara tandah anak-i kabŭs sikirau ka kabŭs dŭh nok; anak-sŭ mite pinguman, pak mating daya nggen.

⁵ Daya adi ko dawŭ-i man pinguman adi siabo grua, madin kabŭs sikirau di aran; ngara adi udip kaya, madin kareh sapok jiroh pinguman.

⁶ Daya ku dog ukum rabis so daya Sodom dog ukum, adi nyirŭgŭh rabur sabab dog ukum Tapa.

⁷ Bara pinguru ta dŭh kais ka buda bisig mun salju, gagah, bake ka tiranah.

⁸ Madin ngara mbŭh prigure di aran ka dŭh dog natŭng, buang jawin ngara singŭt kabŭs. Kurit ngara kŭrŭng, mbŭh pisŭk ka rakat di turang ngara.

⁹ Ngara adi kabŭs darŭm perang utung dŭ so ngara adi kabŭs sundis andu, adi sikirau ndŭg ka kabŭs, dŭh biyŭn pinguman.

¹⁰ Pinyirusag adi nyatŭk daya ku raru bisā; bara sindŭ tanŭk anak ngara yŭn man.

¹¹ TUHAN mbŭh raru baji; Ayŭh sigot kupo Zion ndŭg ka rŭpŭg.

¹² Mating daya, bait raja raja so bangsa tami, sabah nang pinyerang dapŭd mŭrŭt tiban Jerusalem.

¹³ Pak-i sawŭ jadi simŭnŭ, sabab nabi nabi-i bidosa ka imam imam-i sarah amai mbŭh siŭ daya adi dŭh sarah.

¹⁴ Bara pinguru-i bigandon di aran mun daya karak. Piraka ngara bitameg ngga deya ndŭg ka mating daya raan tama ngara.

¹⁵ “Bu so ti!” daya nyirais nang. “Angān sembar! Dŭhnyah tama aku!” Jadi ngara bigandon so rais ndi di ka rais andi, dŭh dog trima daya.

¹⁶ TUHAN mbŭh dŭh tia piduri ngara; Ayŭh mesak ngara bada mingare. Di Ayŭh bara imam ngga bara pinguru ta mbŭh dŭh tia brega.

¹⁷ Kajŭn pinurung adi bŭn mandŭg, kieh tingga ndŭg ka kieh mbŭh dŭh dapŭd tingga. Kieh kajŭn pinurung so bangsa adi sibatur-i dŭh biyŭn ani ani re-i nggen.

¹⁸ Pinganyu nyibatŭh kieh; kieh dŭh dapŭd panu di aran. Tipuh ami mbŭh ripuan; pimungan ami mbŭh mandŭg.

¹⁹ Ngara tadak kieh raju so beuh mūn nyambar so rangit, Ngara nudug kieh di arong sandah; ngara tuman kieh di tarun tana-pajam.

²⁰ Ngara nakap daya adi atak pimudip ami, raja adi dog mien TUHAN, daya adi kieh sabah bada grindung kieh so pinyerang.

²¹ Tawŭh meh, daya Edom ngga daya Uz; bada adŭp ngan gaŭn darŭm angān babŭ dapŭd. Pinyirusag re mandŭg gŭh nyatŭk angān; angān gŭh re sitabet ka tibabeu amai mabuk.

²² Kupo Zion mbŭh dog ukum amai dosa-i; TUHAN re dŭh tia tandah kieh di rais tami adi yŭn ami dog taran. Pak kuu, kupo Edom, TUHAN re ngukum kuu; Ayŭh re kambur sarah mu.