PITAS 9 - Hakcipta - Biatah Bidayuh

Pinyibijak ngga Pinyibudo

¹ Pinyibijak mbŭh pijog ramin-i ka mbŭh pijog ju tiang bās-i.

² Ayŭh mbŭh simareh dāng yŭn gawai, gaur wain ngga rapah, ka sidia yŭn ngidang.

³ Ayŭh mbŭh pait daya daya gaji-i adi dayung bada bagan so tarun yŭn adi siabo bigatung di kupo:

⁴ “Mandŭg, angān adi mapung braŭg!” Ka di ngara adi budo ayŭh nang,

⁵ “Mandŭg, man pinguman ka nok wain adi aku mbŭh gaur.

⁶ Tingge udip mapung braŭg yŭn dapŭd udip. Tunda suto danding daya adi biyŭn pinyipuan.”

⁷ Kambŭi kuu nyara ngajar daya adi sambuh, kaŭs kuu re dapŭd adŭp mu dog pimangŭh adŭ. Kambŭi kuu nyara daya ginaka, kaŭs kuu re dapŭd adŭp mu kinaman.

⁸ Dŭhsah nyara ngajar daya adi sambuh; ngara re tiru di kuu ripas anŭ. Pak kambŭi kuu nyara ngajar daya adi bijak, ngara re stabi di kuu.

⁹ Ani ani kayuh nang mu di daya bijak re bada ngara rabis bijak. Tadŭ tadŭ kayuh adi kuu kidaan di daya tŭnggŭn re nambah pinyipuan ngara.

¹⁰ Kambŭi kuu raan jadi bijak kuu dŭh siŭn dŭh diŭ stabi ka taru di TUHAN. Kambŭi kuu puan Ayŭh adi Kudus, kuu biyŭn pinyimirati.

¹¹ Pinyibijak re nambah umbur mu.

¹² Kuu inŭh adi re utung kambŭi kuu biyŭn pinyibijak. Pak kambŭi kuu abah dieh, kuu inŭh adi re rugi.

¹³ Pinyibudo inŭh keya ka dayung pinyikandak, adi mapung braŭg, ka adi dŭh puan mangŭh.

¹⁴ Ayŭh guru di tiban ramin-i puan kah di baku di yŭn adi siabo bigatung di kupo,

¹⁵ ka bagan daya adi murah, adi puan kraja adŭp ngara adŭ:

¹⁶ “Mŭrŭt ramin ku, angān adi mapung braŭg!” Di ngara adi budo ayŭh nang,

¹⁷ “Piin adi dog naku nyibanyis dŭ. Ruti adi dog naku sidi dŭ.”

¹⁸ Ngara dŭh puan daya kabŭs kan mŭrŭt ramin-i; ka madin ngara adi mbŭh mŭrŭt mbŭh di ong daya adi mbŭh kabŭs.