PITAS 29 - Hakcipta - Biatah Bidayuh

¹ Kambŭi kuu bitambah baking tiap kari kuu dog nyara, agi andu kuu re binasa ka re dŭh dapŭd makat.

² Kan daya adi tŭnggŭn mritah, rayat gaŭn. Kan daya arap mritah, rayat sangsara.

³ Kambŭi kuu rindu pinyibijak, sama mu re sanang asŭng di kuu. Saat duit di dayung sundar inŭh kraja budo.

⁴ Kan raja mbit bat di pinyitŭnggŭn, bangsa re bake, pak kambŭi ayŭh mbit bat kaŭs di duit adŭ, pritah-i re rubuh.

⁵ Kambŭi kuu nganju jerā mu, kuu tŭŭn jarat yŭn adŭp mu.

⁶ Daya arap dog jarat dosa adŭp ngara, darŭm daya tŭnggŭn sanang buang gaŭn.

⁷ Daya kana puan hak daya sirata, pak daya ginaka dŭh mirati kayuh adi mun anŭ.

⁸ Daya adi dŭh piduri daya bŭkŭn bisa bada daya darŭm kupo guga, pak daya adi bijak bisa bada daya bamai.

⁹ Kan daya adi bijak dawa daya budo, daya budo kaŭs-i tawŭh ka ndai urah barang ka mun nyusah daya.

¹⁰ Daya ganas tiru di daya adi kana, pak daya tŭnggŭn grindung ngara.

¹¹ Daya adi budo kiren baji-i, pak daya adi bijak sabar ka nan baji-i.

¹² Kambŭi pinguasa dingah pinyiripot adi dŭh sawŭ, sopŭrŭg pinurung-i re jadi pingadong.

¹³ Daya sirata ngga daya adi kinanyuh ayŭh samah biyŭn ati: TUHAN nggen batŭh di soduwŭh ngara.

¹⁴ Kambŭi raja ngibān hak daya sirata, ayŭh re tui mritah.

¹⁵ Ngajar ngga disiplin inŭh kana yŭn anak. Kambŭi ngara dog tandah, ngara re nggen mangŭh di sindŭ-i.

¹⁶ Kan daya arap bikuasa, pingandai sarah dog mirasang. Pak daya tŭnggŭn re kiris pinyirabu ngara.

¹⁷ Disiplin anak ngan ka angān re ari mingangŭn pasar ngara. Ngara re nggen di angān atin sanang ngga damai.

¹⁸ Bangsa adi dŭh biyŭn pinandŭng so Tapa inŭh bangsa adi ari biyŭn pito. Sanang inŭh ngara adi sita ukum-adat Tapa!

¹⁹ Kuu dŭh dapŭd ngajar daya-gaji pakai baba adŭ. Ngara bisa mirati kuu, pak ngara re dŭh piduri pinganang mu.

²⁰ Agi dŭ pingarap di daya budo so di daya adi minyu ngga dŭh bipikir.

²¹ Kambŭi kuu nggen di daya-gaji mu sopŭrŭg kayuh adi ngara raan so ngara gi-sŭ, agi andu-i ngara re tambit sopŭrŭg kayuh adi kuu dapu.

²² Daya adi udah baji nimbur raru bagŭ kaii ngga pito.

²³ Atin sambuh re pirabu kuu, pak kambŭi kuu pirapat adŭp mu, kuu re dog stabi.

²⁴ Daya adi biayo ngga pinaku, rati-i ayŭh tiru di adŭp-i. Kambŭi ayŭh ngaku adŭp-i di yŭn bisara, ayŭh re dog ukum; kambŭi ayŭh dŭh ngaku, Tapa re mangu ayŭh.

²⁵ Taru kayuh adi daya pikir pasar kuu, bisa nyusah kuu. Sabah di TUHAN bisa nyiramat kuu.

²⁶ Bagŭ daya harap adŭp-i dapŭd pinurung so pinguasa, pak kaŭs-i so TUHAN adŭ daya tungang dapŭd pinyitŭnggŭn.

²⁷ Daya tŭnggŭn tiru di daya ginaka, ka daya ginaka tiru di daya tŭnggŭn.