PITAS 27 - Hakcipta - Biatah Bidayuh

¹ Dŭhnyah mingangŭn pasar andu sipagi. Kuu dŭh puan ani re jadi di asah andu ati ngga andu sipagi.

² Tandah daya bŭkŭn muji kuu, bait-i daya saruh; dŭhnyah muji adŭp mu.

³ Batuh ngga sumat inŭh jangan, pak pinyusah adi daya budo ndai inŭh rabis bat.

⁴ Atin baji inŭh gaok buang bisa pirusak, pak dŭh-i arap mun atin sina.

⁵ Kana dŭ nyara ngajar daya ngga atin jujur so kuu tandah ayŭh pikir kuu manŭn dŭh piduri adŭp-i.

⁶ Kuu bisa sabah jerā adi nyara ngajar kuu. Pak kambŭi pinganyu na tangan-i di kawin mu, kuu dŭh siŭn dŭh an jaga adŭp mu.

⁷ Kan kuu bisoh, kuu dŭh raan ju banyis, pak kan kuu sibŭrŭk, ndŭg ka pinguman adi pa'it sidi gŭh di baba mu.

⁸ Daya adi jo so ramin arŭn-i inŭh keya ka manuk adi jo so sarin-i.

⁹ Wangi ngga inyo adi buuh ramak bada yang mu sanang, pak pito nyusah pikir mu.

¹⁰ Dŭhnyah kambŭt jerā mu bait jerā sama mu. Kambŭi kuu dog pinyusah, dŭhnyah mite turung so madis; rasū dapŭd turung kuu rabis so madis mu adi jo.

¹¹ Kuu an bijak, nak, isa asŭng ku sanang ka dapŭd nam daya adi ngamun aku.

¹² Kan daya bijak kiris pinyusah ayŭh mangān-i, pak daya adi mapung braŭg tandah adŭp-i dog nyatŭk pinyusah ka nyesar sundis andu.

¹³ Budo inŭh daya adi bijanji an dapu tanggong utang daya bŭkŭn; buat-rata adŭp-i patut dog bitan ndu jamen janji-i.

¹⁴ Kies jerā mu awar isan isan ngga sirŭŭn bana nang siramat isan isan inŭh brimun ngga pangu.

¹⁵ Sawŭn adi pinyikaii inŭh keya ka piin adi piraseg adŭp-i bititeg di tika andu ujen.

¹⁶ Simuki kuu re bada ayŭh pirŭŭ adŭp-i? Mbŭh kah kuu suba pirŭŭ sabak puan kah suba ngagŭm inyo?

¹⁷ Daya birajar so dingan-i, nimun basi ngasa basi.

¹⁸ Nakit sita tŭngŭn ara ka kuu re biyŭn buwa ara man mu. Daya-gaji adi sita kingat tuan-i re dog stabi.

¹⁹ Nimun piin nyiramin jawin, simŭnŭ gŭh atin mu nyiramin asi sibatur-i kuu.

²⁰ Pinyiraan manusia inŭh keya ka ong daya adi mbŭh kabŭs adi marar agi adŭ tarun yŭn adi an dog ngisi.

²¹ Mas ngga pirak dog suba ngga apui; daya dog suba nanyam ka urah adi yŭn-i dog muji.

²² Sunggu kuu dapŭd mukong daya budo ndŭg ka sitangah kabŭs, kuu dŭh dapŭd mukong pinyibudo-i bada bu so ayŭh.

²³ Nakit sita biri ngga sapi mu ngga situngang tungang mu,

²⁴ sabab pinyikaya dŭh tan tui. Sirabi ka bangsa dŭh gŭh re tan adu adu.

²⁵ Kuu kapŭg kupai yŭn dāng kudip mu, pak atan anŭ kupai adi bauh timbu.

²⁶ Kuu dapŭd ndai piraka so buruh biri mu ka miris tana ngga duit adi kuu dapŭd so rega kambing mu.

²⁷ Kambing mu adi bŭkŭn re nggen sisuh di kuu, di rawang mu, ka di daya-gaji mu adi dayung.