PITAS 26 - Hakcipta - Biatah Bidayuh

¹ Muji daya adi budo inŭh keya ka salju di tipuh paras puan kah ujen di tika ngatŭm.

² Nimun manuk adi mikabur di rangit, simŭnŭ inŭh pangu dŭh bisa dog daya adi dŭh sarah.

³ Kuda ngga kaldi patut dog masut ka dog bada pakai kekang, simŭnŭ gŭh daya budo patut dog pukong.

⁴ Kambŭi kuu nam pinyiken adi sipadin, kuu mbŭh sipadin mun daya anŭ adi nggen pinyiken sipadin.

⁵ Nggen pinyinam adi sipadin yŭn pinyiken adi sipadin, ka sianŭ adi nggen pinyiken anŭ re rada adŭp-i dŭh sawŭ pandai nimun adi pikir-i.

⁶ Kambŭi kuu bada daya budo taban pinganang mu, mbŭh kana dŭ kuu kapŭg kaja adŭp mu ka jiroh pinyusah.

⁷ Keya ka daya bajang dŭh dapŭd panu ngga kaja-i, simŭnŭ gŭh daya budo dŭh dapŭd pakai pinganang pitas.

⁸ Muji daya adi budo inŭh keya ka mŭŭng batuh di sitamŭng.

⁹ Pinganang pitas di baba daya budo inŭh keya ka daya pimabuk suba kadi abŭn reja so tangan-i.

¹⁰ Asi asi adi ngupah daya budo inŭh nyusah sopŭrŭg daya.

¹¹ Daya budo adi pari ndai pingandai budo-i inŭh keya ka kasong adi pari di man uta-i.

¹² Daya adi siabo budo inŭh kana dŭ so daya adi pikir adŭp-i bijak pak sibatur-i dŭh.

¹³ Daya adi tibanga abah ruah so ramin. Ngara nang, “Agi singah di aran! Agi singah di aran passar!”

¹⁴ Daya adi tibanga kaŭs-i bigiring di ambok-i. Ngara bigiring dŭh rabis so tiban adi biguyut di tieng-i.

¹⁵ Agi daya adi ruai tibanga ndŭg ka na pinguman di baba adŭp-i dŭh gŭh an.

¹⁶ Daya tibanga nang adŭp-i rabis pitar so ju naan daya adi dapŭd nam ngga timatŭk.

¹⁷ Kiris daya bikaii ka rasu sua, pŭn ka-i dŭh har adŭp-i, mbŭh keya ka matak ka aran passar ka nakap ka tarik kasong di kajit-i.

^18-19 Daya adi kadong dingan-i ka komŭnŭ nang adŭp-i batur birubi adŭ, inŭh keya ka daya gira birubi ngga sinyata bisā.

²⁰ Mating uwang, apui pura; mating piminyu ngitong daya, kaii mating gŭh.

²¹ Nimun arang ngga uwang pijadi apui, simŭnŭ gŭh daya adi pinyikaii nimbur kaii.

²² Ngitong daya raru sidi! Suka daya tŭrŭn-i!

²³ Piminyu pinganang adi dŭh jujur adi sukan ani sibatur-i di pikir mu inŭh keya ka priok tana adi dŭh brega dog mutik ngga pirak.

²⁴ Daya pingadong sukan atin tiru-i ngga pinganang sidi.

²⁵ Sak adi yŭh, pak dŭhnyah sabah ayŭh, sabab atin-i puno ngga pinyitiru.

²⁶ Ayŭh bisa sukan atin tiru-i, pak daya re kiris pingandai arap-i.

²⁷ Daya adi tŭŭn jarat an kudog daya bŭkŭn kudog adŭp-i. Daya adi bada tana tube re dog nyatŭk batuh.

²⁸ Tiru di daya ka kuu dapŭd bada ayŭh kinaman ngga pinganang kadong. Pinganang adi dŭh so atin adi sawŭ kaŭs-i pirusak adŭ.