PITAS 25 - Hakcipta - Biatah Bidayuh

Pitas Solomon adi Bŭkŭn

¹ Ati inŭh kada pinganang bijak so Solomon adi dog nguruk bara pinuris di istana Hezekiah adi raja Judah.

² Ata kibās Tapa amai kayuh adi-I sukan; ata kibās bara raja amai kayuh adi ngara nyuse.

³ Kuu dŭh puan ani anŭ di pikir raja; pikir kira-i rabis bigatung so pikir-kira ta, bigatung mun rangit puan kah tŭrŭp mun rawŭt.

⁴ Pibisig pirak so rŭnŭk-i, ka tukang pirak dapŭd ndai kayuh adi grua.

⁵ Pijo tukang pitayan adi arap so raja ka ayŭh re mritah ngga pinyitŭnggŭn.

⁶ Kan kuu mijog di sirung jawin raja, dŭhnyah suba bada adŭp mu mun daya bās ka ngakar mun daya pandai

⁷ Kana dŭ nŭŭh dog bagan bada guru di yŭn di sambu so nŭŭh dog bada mūn ka sagān amai daya bŭkŭn adi rabis bās mbŭh dog bada guru di baku nŭŭh.

⁸ Dŭhnyah bigaut di ka yŭn bisara pasar kayuh adi kuu mbŭh kiris. Kambŭi agi saksi adi bŭkŭn adi tungang kiren kuu sarah, ani meh re kuu nang?

⁹ Kambŭi kuu ngga rasū mu dŭh samah pikir-kira, nyirase-i dupan adŭp ngan; dŭhsah bada har anŭ ambu.

¹⁰ Kambŭi dŭh, sopŭrŭg daya re nang kuu dŭh bisa dog sabah nyikŭn rusia, ka dŭn mu re arap sitŭkŭd umbur mu.

¹¹ Buwa pinganang adi batur dog piruah di tika adi batur inŭh keya ka butik mas di darŭm pinggen pirak.

¹² Pinyibakan so daya adi mbŭh sukup pandai dog nggen di daya adi an dingah inŭh rabis brega so sisin mas puan kah pimakai mas adi brega.

¹³ Pinyisung adi bisa dog sabah inŭh keya ka piin madŭd di tipuh raga, di daya adi pait ayŭh.

¹⁴ Daya adi bijanji an nggen kayuh pak bŭn sawŭ nggen inŭh keya ka abun ngga sabak adi dŭh taban ujen.

¹⁵ Pinganang duduh dog piruah ngga atin tŭtŭd tungang ngarah pinyibaking ka tungang nyikuro pimritah.

¹⁶ Dŭhnyah man ju banyis rabis so patut, te kuu nguta rai-i.

¹⁷ Dŭhnyah paŭh ari muah ka yŭn dingan mu, te ngara reju di kuu ka jadi tiru di kuu.

¹⁸ Pinganang nyarah daya adi dŭh sawŭ inŭh keya ka nyerang daya pakai pedang, pukong, puan kah reja-panah.

¹⁹ Bisangan di daya adi dŭh bisa dog sabah di tika susah inŭh keya ka ngunyai pinguman ngga jipŭh adi mbŭh re rudos puan kah panu ngga kaja adi mandam.

²⁰ Biragu nang ragu gaŭn yŭn daya adi susah inŭh keya ka pirukos piraka-i di andu madud puan kah na garo di tawan-i.

²¹ Kambŭi pinganyu mu sibŭrŭk, paan ngara; kambŭi ngara badŭh asŭng, nggen piin.

²² Pingandai mu anŭ re bada ngara mangŭh, ka TUHAN re ngupah kuu.

²³ Ngitong daya bisa nimbur baji keya ka sabak utara taban ujen.

²⁴ Kana dŭ rŭŭ di tibung ramin so nŭŭh rŭŭ samah ngga sawŭn adi pinyikaii.

²⁵ Dingah agah kana so tarun yŭn adi jo inŭh keya ka nok piin adud di tika badŭh asŭng.

²⁶ Daya adi kana adi tunda daya adi arap inŭh keya ka rubang piin adi dog kinais puan kah prigi adi dog nyirasun.

²⁷ Paŭh bagŭ ju banyis dŭh inŭh kana di kuu, ka simŭnŭ gŭh suba jiroh raru bagŭ puji dŭh gŭh kana.

²⁸ Kambŭi kuu dŭh pandai kadud atin baji mu, kuu dŭh bigaya keya ka kupo dŭh biyŭn sindung, sanang dog nyerang.