PITAS 24 - Hakcipta - Biatah Bidayuh

Pinganang Bijak adi numbor Simŭng Prii

¹ Dŭhnyah sina di daya adi arap, ka dŭhnyah suba bijerā ngga ngara.

² Ngara kaŭs-i bipikir an nyusah daya; tiap kari ngara kuka baba-i marar agi adŭ daya adi kinaman.

Pinganang Bijak adi numbor Duwŭh Puru

³ Ramin arŭn dog pijog di tunduh pimŭnŭs pinyibijak ngga pinyimirati.

⁴ Di yŭn agi pinyipuan, birit dog ngisi ngga kayuh adi brega ka adi grua.

Pinganang Bijak adi numbor Duwŭh Puru-Ndi

⁵ Pinyibijak kana dŭ so pinyibake; sawŭ, pinyipuan inŭh biguna dŭ so pinyibake.

⁶ Amai sawŭ, kuu dŭh siŭn dŭh bisatur nakit diŭ so kuu matak biperang, ka kambŭi kuu trima bagŭ pinyitayan, kuu re biyŭn rabis bagŭ aran ngga mu re manang.

Pinganang Bijak adi numbor Duwŭh Puru-Duwŭh

⁷ Pinganang bijak inŭh raru tŭrŭp re daya adi budo mirati. Ngara dŭh biyŭn kayuh re-i nang kan kayuh adi biguna dog kirakar.

Pinganang Bijak adi numbor Duwŭh Puru-Taruh

⁸ Kambŭi kuu ari bisatur an ndai kayuh adi arap, kuu re trima dŭn arap daya adi pimito.

⁹ Kayuh adi daya adi arap pikir inŭh kayuh adi bidosa. Daya adi kaŭs-i ngamun daya, inŭh tiru daya kiris.

Pinganang Bijak adi numbor Duwŭh Puru-Pat

¹⁰ Kambŭi kuu ramah darŭm susah, kuu taŭn sawŭ ramah.

Pinganang Bijak adi numbor Duwŭh Puru-Rimŭh

¹¹ Nyiramat daya adi dŭh sarah kan ngara re dog nggen ukum kabŭs.

¹² Kuu bisa nang anŭ dŭh har mu, pak Tapa puan ka kiris isi atin mu. Ayŭh nyibatŭh kuu; Ayŭh puan. Ka Ayŭh re maras kuu nanyam kraja pingandai mu.

Pinganang Bijak adi numbor Duwŭh Puru-Nŭm

¹³ Nak, man ju banyis, amai ju banyis inŭh kana. Ka nimun ju banyis so sarin banyis inŭh nyibanyis di jura mu,

¹⁴ kuu bisa puan ngga tatu-i pinyibijak inŭh kana yŭn simangi. Tambit pinyibijak, ka kayuh adi kuu gruwŭn an dapŭd dŭh re piasa kuu jŭ.

Pinganang Bijak adi numbor Duwŭh Puru-Ju

¹⁵ Dŭhnyah mun daya adi ginaka adi bipekat an mirupak daya adi kana puan kah sirapas ramin arŭn ngara.

¹⁶ Munki masam daya adi kana rabu, ngara ari makat; pak pinyirusag nyatŭk daya adi ginaka.

Pinganang Bijak adi numbor Duwŭh Puru-Mai

¹⁷ Dŭhnyah gaŭn kan pinganyu mu dog nyatŭk pinyusah, ka dŭhnyah angan kan ngara rabu.

¹⁸ TUHAN re tatu puan kambŭi kuu tawŭh, ka Ayŭh dŭh suka urah adi mun anŭ; ka dŭh meh ngukum ngara.

Pinganang Bijak adi numbor Duwŭh Puru-Prii

¹⁹ Dŭhnyah tandah daya arap nyusah kuu; dŭhnyah sina di ngara.

²⁰ Daya ginaka re rikas mating; ngara dŭh biyŭn pingarap yŭn pimudip ngara jŭ.

Pinganang Bijak adi numbor Taruh Puru

²¹ Stabi ka taru di TUHAN, nak, ka stabi di raja. Dŭhnyah bigaur ngga daya adi rawan ngara;

²² daya adi mun anŭ agi andu-i re binasa. Puan mu kah pinyirusag adi Tapa, bait raja, bisa ndai?

Pinganang Bijak adi Bŭkŭn

²³ Daya bijak agi gŭh nang kayuh ati: Dŭh-i batur akim marad di kraja-i.

²⁴ Kambŭi ngara kadŭn daya adi sarah dŭh sarah, ngara re dog mangu ka dog tiru barang naan daya.

²⁵ Akim adi ngukum daya adi sarah, re mujur darŭm pimudip-i ka dapŭd dŭn kana.

²⁶ Pinyinam adi batur inŭh tandā jerā adi sawŭ.

²⁷ Dŭhnyah pijog ramin mu sibayuh ŭmŭh mu mbŭh jadi. Dŭhnyah pijog rawang mu sibayuh kuu mbŭh pandai nyiran adŭp mu.

²⁸ Dŭhnyah nggen taksi rawan daya ngga sabab adi dŭh patut, puan kah kadong pasar daya anŭ.

²⁹ Dŭhnyah nang, “Aku re ndai di ayŭh kayuh adi ayŭh ndai di aku! Aku re maras ayŭh!”

³⁰ Aku panu mutas ŭmŭh ngga teya anggor daya adi tibanga ka budo.

³¹ Sopŭrŭg-i mbŭh birasu, puno ngga tŭngŭn reja ka uduh. Sindung batuh adi maning-i mbŭh rubuh.

³² Aku tingga, bipikir, ka birajar so dieh:

³³ Mŭnyŭp ka bŭŭs kambŭi kuu raan. Dakŭp sudo mu ka rŭŭ-paya nyitiro,

³⁴ pak darŭm kuu bŭŭs udip sirata re nyerang kuu mun pirupak adi bisinyata.