PITAS 22 - Hakcipta - Biatah Bidayuh

¹ Dŭn adi kana inŭh kana dŭ so pinyikaya; dog rindu daya rabis so pirak ngga mas.

² Kayuh ati inŭh adi brimun di daya kaya ngga daya sirata: soduwŭh ngara dog napa TUHAN.

³ Daya bijak mangān pinyusah kan ngara kiris-i, pak daya adi mapung braŭg tandah adŭp-i dog nyatŭk pinyusah ka nyesar sundis andu.

⁴ Tunda pinganang TUHAN, pirapat adŭp, ka kuu re kaya, dog stabi, ka tui udip.

⁵ Kambŭi kuu rindu asŭng mu, pijo adŭp mu so jarat adi mirakap daya ginaka di aran ngara.

⁶ Ngajar anak ngan aran pimudip adi batur, ka ngara re ingat-i sitŭkŭd umbur ngara.

⁷ Daya sirata inŭh urun daya kaya. Nginjam duit ka kuu inŭh urun daya adi so kuu nginjam-i.

⁸ Daya adi ndai pinyusah re dog nyatŭk pinyusah, ka baji ngara adi sipŭ anŭ re mating tia.

⁹ Daya adi kana atin-i ka kutung pinguman-i ngga daya adi sirata re dog nyiberkat TUHAN.

¹⁰ Sān daya adi gagā ngamun, ka re mating tia karit, kaii, puan kah pinganang adi dŭh biradat.

¹¹ Kambŭi kuu rindu atin adi bisig ka piminyu pinganang adi mandis, raja re jadi jerā mu.

¹² TUHAN kingat ka bada siramat pinganang adi sawŭ, buang-I dŭh nyibandar pinganang daya pingadong.

¹³ Daya tibanga rŭŭ di arŭn; ngara nang singah re man ngara kambŭi ngara ruah.

¹⁴ Pinganang dayung adi arap inŭh keya ka rubang adi tŭrŭp; kambŭi kuu bada TUHAN baji, kuu re rabu ka darŭm-i.

¹⁵ Anak-anya taŭn ari ndai sarah, pak pasut bisa ngajar ngara bada birubah.

¹⁶ Kambŭi kuu nggen pinganggen ka daya kaya puan kah kinanyuh daya sirata ngga dapŭd kaya, kuu re jadi sirata.

Taruh Puru Pinganang Bijak

¹⁷ Dingah, ka aku re ngajar kuu kayuh adi daya bijak mbŭh nang. Birajar kayuh adi ngara mbŭh ngajar,

¹⁸ ka sanang inŭh kuu kambŭi kuu ingat-i ka dapŭd nyabŭt-i.

¹⁹ Aku raan kuu na pinyabah mu di TUHAN; anŭ inŭh sabab aku an kidaan-i di kuu madin.

²⁰ Aku mbŭh nuris taruh puru betang pinganang yŭn mu. Sopŭrŭg-i brisi ngga pinyipuan ka pinyitayan adi kana,

²¹ ka re ngajar di kuu kayuh adi raru sawŭ. Komŭnŭ kan kuu dog pait bada jiroh-i, kuu re pari taban pinyinam adi batur.

Sibungas Pinganang Bijak

²² Dŭhnyah mirupak daya sirata sabab ayŭh sirata; dŭhnyah ida ida ngga ngara di tarun yŭn bisara.

²³ TUHAN re birawan yŭn ngara ka an tambit asŭng daya adi an tambit asŭng ngara.

Pinganang Bijak adi numbor Duwŭh

²⁴ Dŭhnyah bijerā ngga daya adi udah baji ka adi gŭtŭh.

²⁵ Te arap ngara bijakit ka kuu ka kuu dŭh dapŭd ngubah adŭp mu.

Pinganang Bijak adi numbor Taruh

²⁶ Dŭhnyah bijanji an dapu tanggong utang daya.

²⁷ Kambŭi kuu tipia dŭh tungang bayar, ngara re tambit samŭn ambok mu.

Pinganang Bijak adi numbor Pat

²⁸ Dŭhnyah ngana tandā baat adi tayung-babuk mu mbŭh juman.

Pinganang Bijak adi numbor Rimŭh

²⁹ Daya adi gagah nyiraja re nyiraja yŭn bara raja, dŭh yŭn daya saja.