PITAS 21 - Hakcipta - Biatah Bidayuh

¹ TUHAN sanang nguasa pikir-kira raja mun Ayŭh ngatur kamaki sungi aman.

² Kuu bisa pikir sopŭrŭg kayuh adi kuu ndai batur, pak ingat nŭh, TUHAN adi puan isi atin manusia.

³ Ndai kayuh adi batur ka tŭnggŭn; anŭ pimunos asŭng TUHAN rabis so sadis adi kuu jugan ka Ayŭh.

⁴ Daya ginaka bidosa amai dog nguasa atin sambuh ngara.

⁵ Bisatur nakit ka kuu re biyŭn bagŭ; kambŭi kuu girungos, kuu re biyŭn nisŭ.

⁶ Pinyikaya adi kuu dapŭd so aran adi sarah rikas miyap, pak dŭh sibayuh-i mbŭh taban kuu ka darŭm baba pinyikabŭs.

⁷ Daya ginaka re rabur bada kraja pingandai adŭp ngara; ngara abah ndai kayuh adi batur.

⁸ Daya adi sarah panu aran adi bidikok; daya adi dŭh sarah ndai kayuh adi batur.

⁹ Kana dŭ rŭŭ di tibung ramin so nŭŭh rŭŭ samah ngga sawŭn adi pinyikaii.

¹⁰ Daya ginaka ari sikirau pingandai arap; ngara dŭh biyŭn masi di tadŭ daya.

¹¹ Kan daya adi gambung trima ukum-i, daya adi mapung braŭg birajar gŭh. Daya adi bijak birajar so kayuh adi dog ngajar di ayŭh.

¹² Tapa, Ayŭh adi tŭnggŭn, puan kayuh adi jadi di ramin arŭn daya ginaka, ka Ayŭh re ngukum daya ginaka anŭ ndŭg ka binasa.

¹³ Kambŭi kuu abah dingah sirŭŭn daya sirata mite turung, sirŭŭn adŭp mu mite turung re dŭh dog dingah.

¹⁴ Kambŭi daya baji di kuu, pinganggen dog nggen darŭm bisukan re kadud atin-i.

¹⁵ Kan pinyitŭnggŭn dog pimanu, daya adi kana gaŭn, pak daya adi arap re taru.

¹⁶ Pinyikabŭs kajŭn daya adi miriseu so pinyimirati.

¹⁷ Udip gira pawŭn, nok wain, ka man pinguman adi sidi dŭh re bada kuu kaya.

¹⁸ Daya ginaka re kinyam sangsara anŭ adi ngara ari suba ngga kudog daya adi kana.

¹⁹ Kana dŭ udip di tarun tana-pajam so udip ngga sawŭn adi pinyikaii ka adi udah baji.

²⁰ Daya bijak udip darŭm kaya raja-i, pak daya budo rikas pakai duit ngara ripas ko trima.

²¹ Udip mandis ka jujur ka kuu re udip tui; daya re stabi di kuu ka nakit ngga kuu.

²² Pingubak soldadu adi pitar dapŭd sirapas kupo adi dog jaga bara daya adi bake, ka nyirubuh sindung adi yŭn ngara bisangan.

²³ Kambŭi kuu raan pijo adŭp mu so pinyusah, nakit kingat baba mu so pinganang adi arap.

²⁴ Kiren di aku daya adi miruap ka aku re kiren di angān daya adi gambung, sambuh, ka adi dŭh biyŭn atin masi.

²⁵ Daya adi sarut tibanga adi abah nyiraja taŭn-i siŭ adŭp-i;

²⁶ daya adi mun anŭ, adŭ-i ari bipikir di kayuh adi raan-i biyŭn. Pak daya tŭnggŭn dapŭd nggen ka raan nggen bagŭ kayuh di daya.

²⁷ TUHAN tiru di sadis adi daya ginaka jugan, rabis-i kambŭi ngara jugan-i ngga pinŭtŭn adi sarah.

²⁸ Taksi daya adi kadong dŭh dog sabah, pak pinganang daya adi muko diŭ bipikir, dog trima.

²⁹ Daya tŭnggŭn mirati kayuh adi re-i ndai; daya ginaka situngang tungang-i bada adŭp-i mun adi yŭh.

³⁰ Pinyibijak manusia, pinyimirati, pinyipitar, sopŭrŭg-i mating guna kambŭi TUHAN mbŭh rawan ata.

³¹ Kuu bisa sidia dudu kuda yŭn biperang, pak TUHAN inŭh adi nggen di kuu pimanang.