PITAS 17 - Hakcipta - Biatah Bidayuh

¹ Kana dŭ man ruti adi mbŭh badŭh buang riang ngga pikir adi tanang so nŭŭh bigawai di ramin adi puno ngga kaii.

² Urun adi bijak re bikuasa di tunduh anak tuan-i adi dŭh biguna ka re dapŭd kada utung so rata-i.

³ Mas ngga pirak dog suba ngga apui, ka atin daya dog suba TUHAN.

⁴ Daya arap dingah akar adi arap, ka daya pingadong dingah pinganang kadong.

⁵ Kambŭi kuu tawŭh daya sirata, kuu ngamun Tapa adi napa ngara. Kuu re dog ukum kambŭi kuu birubi ngga nasip arap daya.

⁶ Nyamba mingangŭn di bara sukuh ngara, nimun anak mingangŭn di pimas ngara.

⁷ Daya adi dog stabi dŭh kadong daya, daya budo dŭh biyŭn kayuh biguna an-i nang.

⁸ Agi daya pikir suap bisa ndai pingandai-nginga; ngara sabah-i bisa ndai bagŭ masam kayuh.

⁹ Kambŭi kuu raan daya rindu kuu, apun ngara kan ngara ndai sarah di kuu. Ingat pingandai sarah bisa pirusak daya bijerā.

¹⁰ Daya adi bijak birajar bagŭ kayuh kan dog ngajar ndi sidah; daya budo birajar darŭm-i dog pukong siratus kari.

¹¹ Pinyikabŭs mandŭg mun pinyisung adi gaok ka daya ginaka adi ari ndai pito.

¹² Kana dŭ nŭŭh bidapŭd ngga sindŭ buāng adi manyap anak-i so nŭŭh bidapŭd ngga daya budo adi marar dŭh paya bada kraja budo-i.

¹³ Kambŭi kuu maras kana ngga arap, kuu re dŭh tungang kadi arap so ramin mu.

¹⁴ Karit adi dog piguru inŭh keya ka suang piin adi murang; pirŭŭ karit anŭ sibayuh-i jadi baga.

¹⁵ Ngukum daya adi dŭh sarah puan kah pirupas daya adi ginaka inŭh pingandai adi TUHAN tiru.

¹⁶ Daya adi budo saat duit adŭ ngga biranja sikura-i, sabab ayŭh dŭh pitar.

¹⁷ Jerā ari sais rindu. Re ngga mani jurud madis kambŭi dŭh yŭn mite turung di tika susah?

¹⁸ Kaŭs-i daya adi dŭh pitar adi bijanji an dapu tanggong utang daya bŭkŭn.

¹⁹ Suka dosa inŭh brimun ngga suka pito. Kambŭi kuu dŭh ko ko mirawa, kuu jiroh pinyusah.

²⁰ Daya adi bipikir ka minyu arap dŭh bisa dapŭd kayuh kana, adŭ-i pinyirusag.

²¹ Anak adi ndai pingandai budo kaŭs-i nyusah ka kandam pimas-i.

²² Atin adi pawŭn bada pŭrŭng bua sanang. Atin adi marar susah pijera adŭp.

²³ Akim adi arap trima suap, ka pinyitŭnggŭn dŭh dog pimanu.

²⁴ Daya adi pitar nŭtŭn ndai pingandai bijak, pak pinŭtŭn daya budo dŭh tatu.

²⁵ Anak adi budo kandam atin sama-i ka bada sindŭ-i nyesar.

²⁶ Dŭh inŭh patut bada daya adi dŭh sarah bayar ukum; pinyitŭnggŭn dŭh dog pimanu kambŭi daya adi kana dog ukum.

²⁷ Daya adi biyŭn pinyipuan piruah pinganang ngga nakit; Daya adi pirŭŭ adŭp-i inŭh daya adi pitar.

²⁸ Amai sawŭ, sirabi ka daya adi budo dog pikir bijak kambŭi ayŭh pirŭŭ adŭp-i.